കോഴിക്കോട്: സമസ്തയിലെ മുസ്ലിം ലീഗ് വിരുദ്ധരും അനുകൂലികളും തമ്മിലുള്ള അഭിപ്രായഭിന്നത കൂടുതൽ രൂക്ഷമാകുന്നു. വഖഫ് ബോർഡ് നിയമനവുമായി ബന്ധപ്പെട്ട് കഴിഞ്ഞ ദിവസം സമസ്ത മുശാവറ അംഗം ഉമർ ഫൈസി മുക്കം മലപ്പുറത്ത് നടത്തിയ പ്രസ്താവനയ്ക്ക് മറുപടിയുമായി നാസർ ഫൈസി കൂടത്തായി വാർത്താസമ്മേളനം വിളിച്ച് രംഗത്തെത്തി.

To advertise here,

“ഉമർ ഫൈസി മുക്കം സിപിഎം ചട്ടുകമായി പ്രവർത്തിക്കുകയാണ്. അദ്ദേഹത്തിന്റെ പ്രസ്താവന സമസ്തയ്ക്ക് കളങ്കമുണ്ടാക്കി. സമസ്ത മുശാവറ ഉചിതമായ തീരുമാനം എടുക്കണം. സിപിഎം സമസ്തയിൽ ഭിന്നിപ്പുണ്ടാക്കാൻ ശ്രമിക്കുന്നു. ഇത് സിപിഎം നടത്തുന്ന രാഷ്ട്രീയക്കളിയാണ്. ഉമർ ഫൈസി മുക്കം അതിന്റെ ഭാഗമായി നിൽക്കുന്നു. വഖഫ് ബോർഡ് ചെയർമാനും തെറ്റായ പ്രചാരണം നടത്തുന്നു. വഖഫ് ബോർഡിൽ ആർഎസ്എസ് പ്രതിനിധികളെ നിയമിക്കുന്നില്ല. അനാവശ്യ വിവാദമാണ് ഉണ്ടാക്കുന്നത്. ഇത് സമൂഹത്തിൽ തെറ്റിദ്ധാരണയുണ്ടാക്കുന്നതാണ്.” നാസർ ഫൈസി കൂടത്തായി പറഞ്ഞു.

“അമുസ്ലിങ്ങളെ നിയമിക്കണമെന്നാണ് കേന്ദ്രം പറഞ്ഞത്. അമുസ്ലിങ്ങളെ നിയമിക്കുന്നതിൽ യാതൊരു പ്രശ്നവുമില്ല. നിയമനം നടത്തേണ്ടത് കേരള സർക്കാറാണ്. കേരള സർക്കാർ നിയമനം നടത്താത്തത് കൊണ്ടാണ് രണ്ട് ഒഴിവുകൾ വന്നത്. കള്ളൻ കള്ളൻ എന്ന് വിളിച്ച് കള്ളനെ തേടുന്ന അവസ്ഥയാണ് കണ്ടുകൊണ്ടിരിക്കുന്നത്.” അദ്ദേഹം പറഞ്ഞു.

സെപ്റ്റംബർ 11-ന് മലപ്പുറത്ത് വഖഫ് വിശദീകരണ യോഗം നടത്തും. വഖഫ് ബോർഡ് നിയമനങ്ങളുമായി ബന്ധപ്പെട്ടാണ് വിശദീകരണം. മന്ത്രി പി. കെ. കുഞ്ഞാലിക്കുട്ടി ഉദ്ഘാടനം ചെയ്യും. വഖഫ് ബോർഡ് നിലനിൽക്കണമെന്ന് ആഗ്രഹിക്കുന്നതിനാലാണ് വിശദീകരണ യോഗം നടത്തുന്നതെന്നും നാസർ ഫൈസി പറഞ്ഞു.

ഓഗസ്റ്റ് 23-ന് മലപ്പുറം ജില്ലാ സിപിഎം സംഘടിപ്പിച്ച വഖഫ് നിയമവും യുഡിഎഫ് കീഴടങ്ങലും എന്ന സെമിനാറിലായിരുന്നു ഉമർ ഫൈസിയുടെ വിവാദ പ്രസ്താവന. രണ്ട് അമുസ്ലിങ്ങളെ വെക്കാത്ത വഖഫ് ബോർഡ് ശരിയല്ലെന്നും അത് പിരിച്ചുവിടുകയാണെങ്കിൽ രണ്ട് ആർഎസ്എസുകാരെ വെച്ച് പരിഹരിച്ചുകൊള്ളാമെന്ന് സർക്കാർ കോടതിയിൽ പറഞ്ഞെന്നുമാണ് ഉമർ ഫൈസി പ്രസംഗിച്ചത്.