നിലമ്പൂര്: നിലമ്പൂര് ഉപതിരഞ്ഞെടുപ്പില് തൃണമൂല് കോണ്ഗ്രസ് സ്ഥാനാര്ഥിയായി മത്സരിക്കുന്ന പി.വി.അന്വര് അന്തരിച്ച കോണ്ഗ്രസ് നേതാവ് വി.വി.പ്രകാശിന്റെ വീട്ടില് സന്ദര്ശനം നടത്തി. നാമനിര്ദേശ പത്രിക സമര്പ്പിച്ച ശേഷം പ്രചാരണത്തിന്റെ തുടക്കമിടാനായിട്ടാണ് അന്വര് മുന് ഡിസിസി അധ്യക്ഷനും 2021-ല് തന്റെ എതിര് സ്ഥാനാര്ഥിയുമായിരുന്ന വി.വി.പ്രകാശിന്റെ എടക്കരയിലെ വീട്ടിലെത്തിയത്. വി.വി.പ്രകാശിന്റെ ഭാര്യ സ്മിതയോടും മക്കളോടും അന്വര് വോട്ടഭ്യര്ഥിച്ചു. എന്നാല് എന്നും കോണ്ഗ്രസിനൊപ്പം നില്ക്കുമെന്ന് സ്മിത പിന്നീട് പ്രതികരിച്ചു. 'വി.വി.പ്രകാശ് മരിച്ചപ്പോള് പുതപ്പിച്ചത് കോണ്ഗ്രസ് പതാകയാണ്. ആ പാര്ട്ടി തന്നെയായിരിക്കും ഞങ്ങളുടെ മരണംവരെയും. ഞങ്ങള് എന്നും കോണ്ഗ്രസ് പാര്ട്ടിക്കൊപ്പമാണ്. അതില്കൂടുതല് ഒന്നും പറയാനില്ല' സ്മിത പറഞ്ഞു.
പ്രകാശിന്റെ വീട് സന്ദര്ശിച്ച അന്വറിന്റെ നീക്കത്തിന് ഏറെ രാഷ്ട്രീയ പ്രധാന്യമുണ്ട്. 2021-ല് വി.വി.പ്രകാശ് പരാജയപ്പെട്ടത് ആര്യാടന് ഷൗക്കത്ത് പാലം വലിച്ചതിനെത്തുടര്ന്നാണെന്ന് ആരോപണങ്ങളുയര്ന്നിരുന്നു. കുടുംബത്തിന്റെ ചില പ്രതികരണങ്ങള് ചൂണ്ടിക്കാട്ടി അദ്ദേഹത്തിന്റെ മരണം സംബന്ധിച്ചും അന്വറും ഇടതുപക്ഷവും ആരോപണങ്ങളുയര്ത്തിയിരുന്നു.
2021-ല് 2700 വോട്ടുകള്ക്കാണ് വി.വി.പ്രകാശ് ഇടതുസ്വതന്ത്രനായിരുന്ന പി.വി.അന്വറിനോട് പരാജയപ്പെട്ടത്. അന്ന് നിലമ്പൂരില് യുഡിഎഫ് സ്ഥാനാര്ഥിയായി മത്സരിക്കുന്നതിനായി വി.വി.പ്രകാശിനൊപ്പം ആര്യാടന് ഷൗക്കത്തും രംഗത്തുണ്ടായിരുന്നു.
Content Highlights: TMC candidate P.V. Anvar visits the family of deceased Congress leader V.V. Prakash
Published: 02 Jun 2025, 08:14 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented