മോക്ക് പാർലമെന്റിന് പകരം 'ജനകീയ കുറ്റവിചാരണ'; നാളത്തെ പ്രതിഷേധ പരിപാടിയുടെ പേരും രൂപവും മാറ്റി ഇന്ത്യാസഖ്യം

ന്യൂഡൽഹി: ചീഫ് ഇലക്ഷൻ കമ്മിഷണർ ഗ്യാനേഷ് കുമാറിനെതിരെ ഇന്ത്യാ മുന്നണി നേതാക്കൾ നടത്തുന്ന 'മോക്ക് പാർലമെന്റ്' പ്രതിഷേധ പരിപാടിയുടെ പേരും രൂപവും മാറ്റി. പാർലമെന്റിനെ പരിഹസിച്ചുകൊണ്ടുള്ള പ്രതിഷേധ നടപടികൾ ഒഴിവാക്കുന്നതിനായി പരിപാടിയെ 'ജൻ മഹാഭിയോഗ്' (ജനകീയ കുറ്റവിചാരണ) എന്ന് പുനർനാമകരണം ചെയ്തതായി കോൺഗ്രസ് നേതാക്കൾ അറിയിച്ചു. വെള്ളിയാഴ്ച കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിലാണ് ഈ പ്രതിഷേധ പരിപാടി സംഘടിപ്പിക്കുന്നത്.

മുമ്പ് സർക്കാർ പക്ഷവും പ്രതിപക്ഷവും മുഖാമുഖംനിന്ന് പ്രസീഡിങ് ഓഫീസറുടെ സാന്നിധ്യത്തിൽ സംവാദം നടത്തുന്ന പാർലമെന്ററി മാതൃകയിലായിരുന്നു പരിപാടി ആസൂത്രണം ചെയ്തിരുന്നത്. എന്നാൽ, ഈ രീതിയിൽ മാറ്റംവരുത്താൻ ഇന്ത്യ മുന്നണി നേതാക്കൾ ചേർന്ന യോഗത്തിൽ തീരുമാനമായി.

മുൻ ലോക്സഭാ സ്പീക്കർ മീരാ കുമാറിനാണ് ജനകീയ കുറ്റവിചാരണ നടപടികളുടെ ചുമതല. സമാജ്‌വാദി പാർട്ടിയിൽനിന്നുള്ള ഒരു എം.പി ഇവരെ സഹായിക്കും. മുൻ ലോക്സഭാ സ്പീക്കർ മീരാ കുമാർ, പ്രിയങ്ക ഗാന്ധി, ജയറാം രമേശ്, ദെരേഖ് ഒബ്രിയാൻ, മഹുവാ മാജി ഉൾപ്പെടെയുള്ള നേതാക്കൾ യോഗത്തിൽ പങ്കെടുത്തു.

വെള്ളിയാഴ്ച ഉച്ചയ്ക്ക് മൂന്ന് മണി മുതൽ വൈകിട്ട് 7.30 വരെയാണ് നടപടികൾ ക്രമീകരിച്ചിരിക്കുന്നത്. കോൺഗ്രസ് അധ്യക്ഷൻ മല്ലികാർജുൻ ഖാർഗെ വാദങ്ങൾ ആരംഭിക്കുകയും ലോക്സഭാ പ്രതിപക്ഷ നേതാവ് രാഹുൽ ഗാന്ധി ഉപസംഹരിക്കുകയും ചെയ്യും. 19 രാഷ്ട്രീയ പാർട്ടികളിൽനിന്നുള്ള നേതാക്കൾ സംസാരിക്കും. ഇവർക്ക് അഞ്ച് മിനിറ്റ് വീതമാണ് സമയം അനുവദിച്ചിട്ടുള്ളത്. എന്നാൽ, സമാജ്‌വാദി പാർട്ടിക്കും തൃണമൂൽ കോൺഗ്രസിനും 10 മിനിറ്റ് വീതം നൽകും. കൂടാതെ വോട്ടർ പട്ടികയിൽനിന്ന് പേര് ഒഴിവാക്കപ്പെട്ടവർക്കും സിവിൽ സൊസൈറ്റിയിലെ മൂന്ന് അംഗങ്ങൾക്കും സംസാരിക്കാൻ അവസരമുണ്ടാകും. ആകെ 30 ഓളം പേർ സംസാരിക്കും.

തിരഞ്ഞെടുപ്പ് കമ്മിഷൻ നടപ്പിലാക്കിയ തീവ്ര വോട്ടർ പട്ടിക പരിഷ്കരണമാണ് പരിപാടിയുടെ പ്രധാന വിഷയം. ഇത് 13.5 കോടി വോട്ടർമാരെ ബാധിച്ചുവെന്നും തങ്ങളുടെ കണക്കനുസരിച്ച് ഇത് 16.5 കോടിയാണെന്നുമാണ് കോൺഗ്രസിൻ്റെ വാദം. കോൺഗ്രസും മറ്റ് ഇന്ത്യ സഖ്യകക്ഷികളും യൂട്യൂബ് ചാനലുകളിലൂടെയും സോഷ്യൽ മീഡിയ പ്ലാറ്റ്‌ഫോമുകളിലൂടെയും പരിപാടി തത്സമയം സംപ്രേഷണം ചെയ്യും. ദേശീയഗാനത്തോടെയാകും പരിപാടി അവസാനിക്കുക.