ചണ്ഡിഗഢ്: ബലാത്സംഗക്കേസ് കുറ്റവാളിയും ദേരാ സച്ചാ സൗദ തലവനുമായ ഗുര്‍മീത് റാം റഹിം സിങ്ങിന് 20 ദിവസത്തെ പരോള്‍ അനുവദിച്ചു. ചൊവ്വാഴ്ച പുലർച്ചെ 5.30-ഓടെ അതീവരഹസ്യമായാണ് റാം റഹിം സിങിനെ ജയിലിൽ നിന്ന് പുറത്തെത്തിച്ചത്. ജയിലിൽ നിന്നിറങ്ങിയ ശേഷം ഗുര്‍മീത് ഹരിയാണയിലെ സിർസയിലെ ദേരാ ആശ്രമത്തിലേക്ക് മാറിയതായാണ് റിപ്പോർട്ടുകൾ. 

To advertise here,

2017-ൽ ജയിലിലായതിന് ശേഷം 12-ാം തവണയാണ് ഇയാൾക്ക് പരോൾ അനുവദിക്കുന്നത്. 2024 ഒക്ടോബർ രണ്ടിനാണ് അവസാനം ​പരോൾ അനുവദിച്ചിരുന്നത്. ഹരിയാണ നിയമസഭാ തിരഞ്ഞെടുപ്പ് കാലത്താണ് പരോൾ അനുവദിച്ചതെങ്കിലും ഇതുമായി ബന്ധപ്പെട്ട പ്രവർത്തനങ്ങളിൽ പങ്കെടുക്കുന്നതിനും പ്രസം​ഗം നടത്തുന്നതിനും ഇയാൾക്ക് വിലക്കുകണ്ടായിരുന്നു. 

ആശ്രമത്തിലെ രണ്ട് അന്തേവാസികളെ ബലാത്സംഗം ചെയ്ത കുറ്റത്തില്‍ ഗുര്‍മിത് ശിക്ഷ അനുഭവിച്ചുകൊണ്ടിരിക്കുകയാണ്. 2017-ലായിരുന്നു ഈ കേസിൽ ഇയാൾ 20 വർഷത്തെ തടവിന് ശിക്ഷിക്കപ്പെടുന്നത്. പിന്നീട്, 16 വർഷം മുമ്പ് രാം ചന്ദര്‍ ഛത്രപതിയെന്ന മാധ്യമപ്രവര്‍ത്തകനെ കൊലപ്പെടുത്തിയ കേസിലും ഗുര്‍മീത് റാം റഹിം സിങ് കുറ്റക്കാരനാണെന്ന് കോടതി കണ്ടെത്തി.