ന്യൂഡൽഹി: ഡൽഹി സർവകലാശാലയിൽ എബിവിപിയുടെ വനിതാനേതാവ് അധ്യാപകന്റെ മുഖത്തടിച്ചു. അധ്യാപകസംഘടനകൾ നടപടിയാവശ്യപ്പെട്ടതോടെ സംഭവത്തിൽ അന്വേഷണത്തിന് സർവകലാശാല ആറംഗ സമിതിയുണ്ടാക്കി. രണ്ടാഴ്ചയ്ക്കകം വൈസ് ചാൻസലർക്ക് റിപ്പോർട്ട് നൽകണം.

To advertise here,

ഡൽഹി സർവകലാശാലയ്ക്കുകീഴിലെ ബി.ആർ. അംബേദ്കർ കോളേജിലെ അച്ചടക്കസമിതി കൺവീനറായ പ്രൊഫ. സുജീത് കുമാറിനുനേരേയാണ് എബിവിപി സംഘത്തിൽനിന്ന് ആക്രമണമുണ്ടായത്. സർവകലാശാലാ വിദ്യാർഥി യൂണിയനിൽ ജോയന്റ് സെക്രട്ടറിയായ ദീപികാ ഝായാണ് അധ്യാപകന്റെ മുഖത്തടിച്ചത്.

വ്യാഴാഴ്ച പ്രിൻസിപ്പലിന്റെ ഓഫീസിൽനടന്ന സംഭവത്തിന്റെ സിസിടിവി ദൃശ്യങ്ങൾ പുറത്തുവന്നു. എബിവിപി പ്രവർത്തകർ അധ്യാപകനെ വളഞ്ഞിരിക്കുന്നതും കയർത്തുസംസാരിക്കുന്നതും ദൃശ്യങ്ങളിൽ വ്യക്തമാണ്. മുറിയിലുണ്ടായിരുന്ന പോലീസുകാർ ഇവരെ പിടിച്ചുമാറ്റുന്നതും കാണാം. ഗുരുപൂജ ആഘോഷിക്കുന്ന എബിവിപിയുടെ ഭാഗത്തുനിന്നുണ്ടായ അധ്യാപക മർദനം വ്യാപക പ്രതിഷേധത്തിനും ഇടയാക്കി.

വീഡിയോ പുറത്തുവന്നതോടെ അധ്യാപകരിൽനിന്ന് പ്രതിഷേധം ശക്തമായി. കാമ്പസിൽ എബിവിപി ഉൾപ്പെട്ട സംഘർഷത്തെക്കുറിച്ചുള്ള പരാതി കേൾക്കുന്നതിനിടെയായിരുന്നു സംഭവമെന്നാണ് അധ്യാപകർ പറയുന്നത്. വിദ്യാർഥി കൗൺസിൽ പ്രസിഡന്റായി തിരഞ്ഞെടുക്കപ്പെട്ട എൻഎസ്‌യു നേതാവിനെ എബിവിപി സംഘം ആക്രമിച്ചതാണ് പ്രശ്നത്തിന് കാരണം. അതിലുൾപ്പെട്ട ചില എബിവിപി പ്രവർത്തകരെ മുൻപ്‌ അച്ചടക്കനടപടിയെടുത്ത് സസ്പെൻഡ്ചെയ്തിരുന്നു.

അതേസമയം, അധ്യാപകൻ മദ്യലഹരിയിലായിരുന്നെന്നും മോശം വാക്കുകളുപയോഗിച്ചെന്നും തന്നെ തുറിച്ചുനോക്കിയെന്നും എബിവിപി നേതാവ് ദീപികാ ഝാ ആരോപിച്ചു. പെട്ടെന്നുണ്ടായ ദേഷ്യത്തിലാണ് പ്രതികരിച്ചതെന്നും വിശദീകരിച്ച് ദീപിക ഖേദം പ്രകടിപ്പിച്ച് പ്രസ്താവനയിറക്കി. ദൃശ്യങ്ങളിൽ തെളിവുണ്ടായിട്ടും കുറ്റക്കാർക്കെതിരേ സർവകലാശാല നടപടിയെടുക്കുന്നില്ലെന്ന് എൻഎസ്‌യു കുറ്റപ്പെടുത്തി. അധ്യാപകന് പിന്തുണയുമായി പ്രകടനം നടത്തിയ ഇടതുവിദ്യാർഥിസംഘടനകൾ കാമ്പസിൽ എബിവിപിയുടെ കോലം കത്തിച്ചു.