ന്യൂഡല്‍ഹി: രാജ്യം ഏകീകൃത സിവില്‍ കോഡിലേക്ക് മാറാന്‍ സമയമായില്ലേ എന്ന് ഡല്‍ഹി ഹൈക്കോടതി. അത് തര്‍ക്കങ്ങള്‍ ഇല്ലാതാക്കുമെന്നും കോടതി നിരീക്ഷിച്ചു.
'വ്യക്തി നിയമങ്ങള്‍ക്കോ ആചാരപരമായ നിയമങ്ങള്‍ക്കോ ദേശീയ നിയമങ്ങളെ മറികടക്കാന്‍ കഴിയാത്ത ഒരൊറ്റ ചട്ടക്കൂട് ഉറപ്പാക്കുന്ന ഏകീകൃത സിവില്‍ കോഡിലേക്ക് മാറാന്‍ സമയമായി' ഡല്‍ഹി ഹൈക്കോടതി വ്യക്തമാക്കി.
ഇന്ത്യന്‍ ഭരണഘടനയില്‍ ഓരോ പൗരനും മൗലികാവകാശമായി ഉറപ്പുനല്‍കുന്ന മതസ്വാതന്ത്ര്യത്തെ ഏകീകൃത സിവില്‍കോഡ് ഇല്ലാതാക്കുമെന്ന് യുസിസിയെ എതിർക്കുന്നവർ ചൂണ്ടിക്കാണിക്കുമെന്നതില്‍ സംശയമില്ല. എന്നിരുന്നാലും, വ്യക്തികളെ ക്രിമിനല്‍ കേസുകളിലേക്ക് നയിക്കുന്ന ആചാരങ്ങളിലേക്ക് അത്തരം സ്വാതന്ത്ര്യം വ്യാപിപ്പിക്കാന്‍ കഴിയില്ലെന്നും കോടതി പറഞ്ഞു.
പ്രായപൂര്‍ത്തിയാകാത്ത പെണ്‍കുട്ടിയെ വിവാഹം കഴിച്ചതിന് കേസെടുത്തുതുമായി ബന്ധപ്പെട്ടുള്ള ഹര്‍ജിയിലാണ് ഹൈക്കോടതി ബെഞ്ചിന്റെ നിരീക്ഷണങ്ങള്‍.
ജനന രേഖകളിലും എഫ്ഐആറിലും പ്രായപൂര്‍ത്തിയാകാത്തവളായി രേഖപ്പെടുത്തിയിട്ടുണ്ടെങ്കിലും, തനിക്ക് പ്രായപൂര്‍ത്തിയായെന്നും ഇസ്ലാമിക നിയമപ്രകാരം സാധുവായ വിവാഹ സര്‍ട്ടിഫിക്കറ്റോടെ സ്വമേധയാ ഹര്‍ജിക്കാരനെ വിവാഹം കഴിച്ചതാണെന്നും അതിജീവിത അവകാശപ്പെട്ടു. ജാമ്യാപേക്ഷയില്‍ അതിജീവിത ഹര്‍ജിക്കാരനെ പിന്തുണയ്ക്കുകയും ചെയ്തു.
ഇസ്ലാമിക വ്യക്തി നിയമവും രാജ്യത്തെ ശിക്ഷാനിയമങ്ങളും തമ്മിലുള്ള വൈരുദ്ധ്യങ്ങള്‍ കോടതി തുടര്‍ന്ന് ചൂണ്ടിക്കാട്ടി.
ഇസ്ലാമിക വ്യക്തിനിയമം പെണ്‍കുട്ടികള്‍ക്ക് 15 വയസ്സില്‍ ഋതുമതിയാകുമ്പോള്‍ വിവാഹത്തിന് അനുമതി നല്‍കുമ്പോള്‍, ഐപിസി/ബിഎന്‍എസ്, പോക്‌സോ നിയമങ്ങള്‍ മതപരമായ ആചാരങ്ങള്‍ പരിഗണിക്കാതെ പ്രായപൂര്‍ത്തിയാകാത്തവരുമായുള്ള വിവാഹമോ ലൈംഗിക ബന്ധമോ നിരോധിക്കുകയും അത്തരം പ്രവൃത്തികളെ ക്രിമിനല്‍ കുറ്റമാക്കുകയും ചെയ്യുന്നുവെന്ന് കോടതി പറഞ്ഞു. തുടര്‍ന്ന് കോടതി ഹര്‍ജിക്കാരന് ജാമ്യം അനുവദിക്കുകയും ചെയ്തു.
Content Highlights: Delhi High Court bats for Uniform Civil Code; cites conflict in personal laws and criminal law
Published: 26 Sept 2025, 02:58 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented