ശ്രീനഗർ: ജമ്മു കശ്മീരിലെ കത്വ ജില്ലയിൽ സി.ഐ.എസ്.എഫ്. ജവാൻ സഹപ്രവർത്തകർക്ക് നേരെ നടത്തിയ വെടിവെപ്പിൽ അസിസ്റ്റന്റ് കമാൻഡന്റ് ഉൾപ്പെടെ നാല് ഉദ്യോഗസ്ഥർ കൊല്ലപ്പെട്ടു. കത്വയിലെ ബാസോലി പ്രദേശത്ത് ഹിമാചൽപ്രദേശ് അതിർത്തിയോട് ചേർന്ന് സ്ഥിതിചെയ്യുന്ന 'സേവാ' ജലവൈദ്യുത പദ്ധതിയുടെ സുരക്ഷയ്ക്കായി നിയോഗിക്കപ്പെട്ടിരുന്ന ക്യാമ്പിലാണ് സംഭവമെന്ന് പി.ടി.ഐ. റിപ്പോർട്ട് ചെയ്തു.

To advertise here,

ഉദ്യോഗസ്ഥർ തമ്മിലുണ്ടായ വാക്കുതർക്കമാണ് വെടിവെപ്പിലേക്ക് നയിച്ചതെന്നാണ് ലഭിക്കുന്ന വിവരം. തർക്കത്തിന് പിന്നാലെ ഒരു ജവാൻ തോക്കെടുത്ത് സഹപ്രവർത്തകർക്ക് നേരെ തുരുതുരാ വെടിയുതിർക്കുകയായിരുന്നു. വെടിവെപ്പിൽ ഗുരുതരമായി പരിക്കേറ്റ നാല് ഉദ്യോഗസ്ഥരും സംഭവസ്ഥലത്തുതന്നെ മരിച്ചു.

വിവരം ലഭിച്ച ഉടൻതന്നെ മുതിർന്ന പൊലീസ് ഉദ്യോഗസ്ഥരും സി.ഐ.എസ്.എഫ് ഉന്നതരും സ്ഥലത്തെത്തി കേസിൽ അന്വേഷണം ശക്തമാക്കിയിട്ടുണ്ട്. വെടിയുതിർത്ത ജവാനെ കസ്റ്റഡിയിലെടുത്തതായും സംഭവത്തെക്കുറിച്ച് കൂടുതൽ അന്വേഷണം പുരോഗമിക്കുകയാണെന്നും അധികൃതർ അറിയിച്ചു.