ന്യൂഡൽഹി: കോൺഗ്രസ് പാർട്ടിയിൽ രാഹുൽ ഗാന്ധിയുടെയും പ്രിയങ്ക ഗാന്ധിയുടെയും നേതൃത്വത്തിൽ രണ്ട് വിരുദ്ധ ചേരികൾ രൂപപ്പെട്ടിട്ടുണ്ടെന്നും ആഭ്യന്തര ഭിന്നത രൂക്ഷമാണെന്നും ബി.ജെ.പി ആരോപിച്ചു. പ്രിയങ്ക ഗാന്ധി പാർട്ടിയിൽ ഉയർന്നുവരുന്നതും താൻ രാഷ്ട്രീയമായി തഴയപ്പെടാനുള്ള സാധ്യതയും ഭയന്ന്, 'ഇന്ത്യ' മുന്നണി അടുത്തിടെ സംഘടിപ്പിച്ച പ്രമുഖ പ്രതിഷേധ പരിപാടികളിൽ സംസാരിക്കുന്നതിൽനിന്ന് രാഹുൽ ഗാന്ധി പ്രിയങ്കയെ ബോധപൂർവം തടയുകയായിരുന്നുവെന്ന് ബി.ജെ.പി വക്താക്കളായ സംബീത് പാത്രയും പ്രദീപ് ഭണ്ഡാരിയും കുറ്റപ്പെടുത്തി.

To advertise here,

ഈ പ്രതിഷേധ പരിപാടികൾ ഗാന്ധി കുടുംബത്തിനുള്ളിലെ കടുത്ത മത്സരവും ഭയവും പുറത്തുകൊണ്ടുവന്നതായി സംബീത് പാത്ര ആരോപിച്ചു. ഇരു പരിപാടികളിലും സംസാരിക്കാൻ അവസരം നിഷേധിക്കപ്പെട്ടതിനെത്തുടർന്ന് പ്രിയങ്ക ഗാന്ധി തികച്ചും അസ്വസ്ഥയായാണ് കാണപ്പെട്ടത്. എം.പിമാർപോലുമല്ലാത്ത നിരവധിയാളുകൾക്ക് സംസാരിക്കാൻ അവസരം നൽകിയപ്പോഴും പ്രിയങ്കയെ ബോധപൂർവ്വം ഒഴിവാക്കുകയായിരുന്നുവെന്നും അദ്ദേഹം വിമർശിച്ചു. "ഗാന്ധി കുടുംബത്തിനുള്ളിൽ രാഹുൽ ഗാന്ധി അടിയറവ് ഭയക്കുകയാണോ, പ്രിയങ്ക ഉയർന്നു വന്നാൽ താൻ പാർശ്വവത്കരിക്കപ്പെടുമെന്ന് ഭയന്നാണോ ഈ കളി, ഗാന്ധി കുടുംബത്തിനുള്ളിൽ പ്രിയങ്കയുടെ വോട്ടും മോഷണം പോയോ?" എന്നും അദ്ദേഹം ചോദിച്ചു.

കോൺഗ്രസിൽ 'രാഹുൽ ക്യാമ്പ്', 'പ്രിയങ്ക ക്യാമ്പ്' എന്നിങ്ങനെ രണ്ട് ചേരികൾ ഔദ്യോഗികമായി രൂപപ്പെട്ടിട്ടുണ്ടെന്ന് ബി.ജെ.പി വക്താവ് പ്രദീപ് ഭണ്ഡാരി ആരോപിച്ചു. പാർട്ടിയുടെ മുൻ ജനറൽ സെക്രട്ടറിയെന്ന മുതിർന്ന പദവി ഉണ്ടായിരുന്നിട്ടും രാംലീല മൈതാനത്തെ റാലിയിൽ സംസാരിക്കാൻ രാഹുൽ പ്രിയങ്കയ്ക്ക് അനുവാദം നൽകിയില്ലെന്ന് അദ്ദേഹം പറഞ്ഞു. മോക്ക് പാർലമെന്റ് നടപടികളിൽ, പ്രിയങ്കയെ രണ്ടാം നിരയിൽ ഇരുത്തുകയും സംസാരിക്കാനുള്ള സമയം നിഷേധിക്കുകയും ചെയ്തതായി ഭണ്ഡാരി കുറ്റപ്പെടുത്തി.