തമന്ന ഭാട്ടിയയും സിദ്ധാർത്ഥ് മൽഹോത്രയും പ്രധാന വേഷങ്ങളിൽ എത്തുന്ന പുതിയ ചിത്രമാണ് 'ദ വാൻ' (Vvaan). തമന്ന അഭിനയിച്ച് ചിത്രത്തിലേതായി പുറത്തിറങ്ങിയ ഗാനം ശ്രദ്ധനേടുകയാണ്. ബിഹാർ, കിഴക്കൻ ഉത്തർപ്രദേശ്, ജാർഖണ്ഡ്, നേപ്പാളിന്റെ തെക്കൻ പ്രദേശങ്ങൾ എന്നിവിടങ്ങളിൽ ആഘോഷിക്കുന്ന ഛാഠ് പൂജയുടെ ചടങ്ങുകളാണ് ഗാനരംഗത്തിലുള്ളത്. ഛാഠി മയ്യ (Chhathi Maiya) എന്ന ഗാനം പുറത്തിറങ്ങി 24 മണിക്കൂറിനുള്ളിൽ എട്ട് മില്യണിലധികം കാഴ്ചക്കാരെ നേടിയിരിക്കുകയാണ്. വെള്ളിത്തിരയിൽ ഛാഠ് പൂജയെ ഏറ്റവും വലിയ രീതിയിൽ അവതരിപ്പിച്ച ഗാനങ്ങളിലൊന്നാണിതെന്നാണ് പ്രേക്ഷകർ അഭിപ്രായപ്പെടുന്നത്.

To advertise here,

ഭക്തിയിലൂടെയും വിശ്വാസത്തിലൂടെയും തലമുറകളെയും കുടുംബങ്ങളെയും സമുദായങ്ങളെയും തമ്മിൽ ബന്ധിപ്പിക്കുന്ന ഒരു വലിയ വികാരമാണ് ഛാഠ് ആഘോഷം. മൂന്ന് രാത്രികളും നാല് പകലുകളും നീണ്ടുനിൽക്കുന്നതാണ് ഈ ഉത്സവത്തിന്റെ ആചാരങ്ങൾ. ബോളിവുഡ് സിനിമയിലൂടെ ഛാഠ് പൂജയെ വലിയ സ്ക്രീനിൽ കാണാൻ കഴിഞ്ഞതിൽ ബിഹാർ, യു.പി, ജാർഖണ്ഡ് എന്നിവിടങ്ങളിലെ ജനങ്ങൾ വലിയ സന്തോഷവും അഭിമാനവും പ്രകടിപ്പിച്ചു. ഭോജ്പുരി സംസ്കാരത്തിന്റെയും ഭാഷയുടെയും സമ്പന്നതയെ ചിത്രം മനോഹരമായി ആവിഷ്കരിക്കുന്നുണ്ടെന്നാണ് സോഷ്യൽ മീഡിയയിൽ ഉയർന്നുവന്നിരിക്കുന്ന അഭിപ്രായം.

വിശാൽ മിശ്രയാണ് സംഗീത സംവിധാനം. ബിഹാറിന്റെ മണ്ണിലെ ഭക്തിയും സംസ്കാരവും ആദരിക്കുന്ന ഈ ഗാനം പുറത്തുവന്നതോടെ വലിയ ജനപ്രീതിയാണ് ലഭിച്ചുകൊണ്ടിരിക്കുന്നത്. അഭിനേതാക്കൾ പങ്കുവെച്ച വീഡിയോ ഗാനത്തിന് കമന്റുകളുടെ പ്രവാഹമാണ്.

തിയേറ്ററുകളിൽ ഈ ഗാനം വരുമ്പോൾ എല്ലാവരും ഒന്നിച്ച് പാടാൻ കാത്തിരിക്കുകയാണെന്ന് പലരും കുറിച്ചു. എന്നാൽ, ഈ ഗാനത്തിന്റെ വരികൾ ഹിന്ദിയിലാണ് എഴുതിയിരിക്കുന്നത് എന്നും, ഭോജ്പുരി ഭാഷയിലായിരുന്നെങ്കിൽ ഇതിന്റെ സ്വാധീനം കൂടുതൽ ശക്തമാകുമായിരുന്നു എന്നും ചില പ്രേക്ഷകർ ചൂണ്ടിക്കാണിച്ചു. ഛാഠ് പൂജയ്ക്ക് തൊട്ടുമുമ്പ് വിശാൽ മിശ്ര മറ്റൊരു കിടിലൻ ഗാനം കൂടി സമ്മാനിച്ചിരിക്കുന്നു. ഇത് ഇഷ്ടപ്പെടാതിരിക്കാൻ എങ്ങനെ സാധിക്കും? എന്റെ വേരുകളെക്കുറിച്ച് എപ്പോഴും അഭിമാനിക്കുന്നു. ഛാഠ് പൂജ ബിഗ് സ്ക്രീനിൽ എത്തിച്ചതിന് ബോളിവുഡിന് നന്ദി എന്നെല്ലാമാണ് മറ്റുപ്രതികരണങ്ങൾ.
Also Read: സിദ്ധാർഥ് മൽഹോത്ര- തമന്ന ഭാട്ടിയ ചിത്രം ‘ദ വാൻ: ഫോഴ്സ് ഓഫ് ദി ഫോറസ്റ്റ്’ റിലീസ് തീയതി പുറത്ത്

മനുഷ്യലോകത്തിന് അപ്പുറമുള്ള ഇരുണ്ട അമാനുഷിക ശക്തികളോട് പോരാടാൻ നിർബന്ധിതനാകുന്ന ഒരു നായകന്റെ കഥയാണ് 'ദ വാൻ' പറയുന്നത്. സ്വന്തം വേരുകളിലേക്ക് മടങ്ങിയെത്തുകയും സ്വയം വീണ്ടെടുപ്പിന്റെ പാത പിന്തുടരുകയും ചെയ്യുന്ന ഒരു യുവാവിനെക്കുറിച്ചാണ് ഈ ചിത്രം സംസാരിക്കുന്നത്. നാടൻ കഥകൾ എപ്പോഴും തനിക്ക് വലിയ പ്രചോദനമാണെന്ന് ചിത്രത്തിന്റെ സംവിധായകനായ ദീപക് കുമാർ മിശ്ര വ്യക്തമാക്കിയിട്ടുണ്ട്. ചിത്രം സെപ്റ്റംബർ 25-ന് റിലീസ് ചെയ്യും.