ഒ.ടി.ടി പ്ലേയുടെ ടോപ് ടെന് ട്രെന്ഡിങ് ലിസ്റ്റില് മലയാളം,തമിഴ്,തെലുഗു,ഹിന്ദി എന്നീ നാലു ഭാഷകളിലും 'പണി'യുടെ ആധിപത്യം, ആദ്യമായാണ് ഒരു മലയാള സിനിമ ഈ ഒരു നേട്ടം കൈവരിക്കുന്നത്, തിയേറ്ററില് വന് വിജയം കൈവരിച്ച ചിത്രം ഈയടുത്താണ് ഒ.ടി.ടിയില് റിലീസായത്. ഇപ്പോള് ചിത്രം ഒരേസമയം നാലു ഭാഷകളിലും തരംഗമായി മാറി. നായകന് എന്ന നിലയിലും സംവിധായകന് എന്ന നിലയിലും ആദ്യമായാണ് ഒരു മലയാളി ഈ നേട്ടം കൈവരിക്കുന്നത്
ജൂനിയര് ആര്ട്ടിസ്റ്റായി സിനിമയിലെത്തി സഹനടനായി നായക നിരയിലേക്കുയര്ന്ന് മലയാളികളുടെയും അന്യഭാഷാ പ്രേക്ഷകരുടെയുമെല്ലാം പ്രിയപ്പെട്ട നടനായി മാറിയ ജോജു ജോര്ജ് ആദ്യമായി രചനയും സംവിധാനവും നിര്വഹിച്ച ചിത്രമാണ് 'പണി'.ഹെവി ആക്ഷന് പാക്ക്ഡ് ഫാമിലി എന്റര്ടെയ്നറായി എത്തിയചിത്രം മലയാളത്തിനു പുറമേ തമിഴ്, തെലുഗു, കന്നഡ, ഹിന്ദി ഭാഷകളിലും ലഭ്യമാണ്
രണ്ടര പതിറ്റാണ്ടിലേറെ പിന്നിട്ട സിനിമാ ജീവിതത്തില് ഒട്ടേറെ മികച്ച കഥാപാത്രങ്ങളായിരുന്നു ജോജുവിന് ലഭിച്ചത്. 'ജോസഫി'ലൂടെ തന്നിലെ അഭിനേതാവിനെ ഉടച്ചുവാര്ത്ത അദ്ദേഹം ഏത് തരം കഥാപാത്രമായാലും അത് വളരെ മനോഹരമായി സ്ക്രീനിലെത്തിക്കാന് തനിക്ക് കഴിയുമെന്ന് 'നായാട്ടി'ലൂടേയും 'ഇരട്ട'യിലൂടെയുമൊക്കെ തെളിയിച്ചു. സിനിമാലോകത്ത് ഇത്രയും നാളത്തെ തന്റെ അനുഭവ സമ്പത്തുമായാണ് 'പണി'യുമായി തിരക്കഥാകൃത്തും സംവിധായകനുമായി ജോജു പ്രേക്ഷകരുടെ മുമ്പിലേക്ക് എത്തിയത്
ചിത്രത്തില് ജോജുവിന്റെ നായികയായി എത്തിയ അഭിനയ യഥാര്ഥ ജീവിതത്തില് സംസാരശേഷിയും കേള്വി ശക്തിയും ഇല്ലാത്ത പെണ്കുട്ടിയാണ്. തമിഴ്, തെലുഗു, മലയാളം ഭാഷകളിലുള്ള സിനിമകളിലും മുമ്പ് അഭിനയ വേഷമിട്ടിട്ടുണ്ട്.സാഗര്, ജുനൈസ്, ഗായിക അഭയ ഹിരണ്മയി, പ്രശാന്ത് അലക്സ്, സുജിത് ശങ്കര് തുടങ്ങി വന് താരനിരയും, കൂടാതെ അറുപതോളം പുതിയ താരങ്ങളും ചിത്രത്തില് അഭിനയിച്ചിരുന്നു.
ബിഗ് ബജറ്റില് ഒരുങ്ങിയ സിനിമയുടെ ഷൂട്ട് 110 ദിവസത്തോളം നീണ്ടുനിന്നിരുന്നു. ഒരു മാസ്സ്, ത്രില്ലര്, റിവഞ്ച് ജോണറില് എത്തിയ ചിത്രം ജോജുവിന്റെ തന്നെ പ്രൊഡക്ഷന് കമ്പനിയായ അപ്പു പാത്തു പപ്പു പ്രൊഡക്ഷന്സിന്റെയും, എ ഡി സ്റ്റുഡിയോസിന്റെയും, ശ്രീ ഗോകുലം മൂവീസിന്റെയും ബാനറില് എം റിയാസ് ആദം, സിജോ വടക്കന് എന്നിവര് ചേര്ന്നാണ് നിര്മ്മിച്ചിരിക്കുന്നത്. ശ്രീ ഗോകുലം മൂവിസിലൂടെ ഡ്രീം ബിഗ് ഫിലിംസ് ആണ് ചിത്രം വിതരണത്തിന് എത്തിച്ചത്
ഇന്ത്യന് സിനിമയിലെ തന്നെ മുന് നിര ടെക്നീഷ്യന്മാരാണ് ചിത്രത്തിന്റെ അണിയറയില് പ്രവര്ത്തിച്ചത്. വിഷ്ണു വിജയ്, സാം സി എസ് എന്നിവരാണ് സംഗീതം. ക്യാമറ വേണു ഐ.എസ്.സി, ജിന്റോ ജോര്ജ്. എഡിറ്റര്: മനു ആന്റണി, പ്രൊഡക്ഷന് ഡിസൈന്: സന്തോഷ് രാമന്, സ്റ്റണ്ട്: ദിനേശ് സുബ്ബരായന്, കോസ്റ്റ്യൂം: സമീറ സനീഷ്, മേക്കപ്പ്: റോഷന് എന്.ജി, പ്രൊഡക്ഷന് കണ്ട്രോളര്: ദീപക് പരമേശ്വരന്, പിആര്ഒ: ആതിര ദില്ജിത്ത്, മാര്ക്കറ്റിംഗ്: ഒബ്സ്ക്യൂറ എന്റര്ടെയ്ന്മെന്റ്സ്.
Content Highlights: pani movie pan indian hit ott play top trending list
Published: 16 Feb 2025, 03:28 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented