അഹങ്കാരിയാണോ എന്ന ചോദ്യത്തിന് മറുപടിയുമായി നടൻ നസ്ലിൻ. 'സീൻ' സിനിമയുടെ വിജയത്തിന് പിന്നാലെ കൊച്ചിയിൽ നടന്ന വാർത്താസമ്മേളനത്തിൽ ചോദ്യങ്ങൾക്ക് മറുപടി പറയുകയായിരുന്നു നടൻ. ചോദ്യത്തോട് പ്രതികരിക്കാനില്ലെന്ന് പറഞ്ഞ താരം, താൻ അഹങ്കാരിയാണോ എന്ന് മറുചോദ്യം ഉന്നയിച്ചു. പിന്നാലെ ഇടപെട്ട സംവിധായകൻ ജിത്തു അഹങ്കാരികൾ അത് സ്വയം സമ്മതിക്കാറില്ലെന്ന് മറുപടി നൽകി.

To advertise here,

ചോദ്യം ഉയർന്നപ്പോൾ, 'എന്തേ ഈ ചോദ്യം വന്നില്ലെന്ന് നസ്ലിൻ ആലോചിച്ചുകൊണ്ടിരിക്കുകയായിരുന്നു', എന്ന് പറഞ്ഞ് നസ്രിയ ഇടപെട്ടു. ചോദ്യം പൂർത്തിയായപ്പോൾ, 'ഞാൻ ഇപ്പോൾ അഹങ്കാരിയാണോ' എന്നായിരുന്നു നസ്ലിന്റെ മറുചോദ്യം. പിന്നാലെ, ഒന്നും പറയാനില്ലെന്ന് പറഞ്ഞ് താരം ഒഴിഞ്ഞുമാറി.

തുടർന്നാണ് ജിത്തു ഇടപെട്ടത്. 'അഹങ്കാരിയാണെന്ന് ഏതെങ്കിലും അഹങ്കാരി സമ്മതിക്കുമോ? അത് അവരോട് ചോദിച്ചിട്ട് കാര്യമില്ല. ഇവൻ അഹങ്കാരി ആണോ എന്ന് മറ്റുള്ളവരോട് ചോദിക്കണം' എന്നായിരുന്നു ജിത്തുവിന്റെ വാക്കുകൾ.

തുടർന്ന് നസ്ലിൻ അഹങ്കാരിയാണോ എന്ന് നസ്രിയയയോട് ചോദിച്ചു. പാവമാണെന്നായിരുന്നു നടിയുടെ മറുപടി. 'സീൻ' വിജയത്തിന് പിന്നാലെ 'പ്രേമലു 2' സിനിമ ഉപേക്ഷിച്ചതുമായി ബന്ധപ്പെട്ട് സാമൂഹികമാധ്യമങ്ങളിൽ ചർച്ച നടന്നിരുന്നു. ഇതിന്റെ പശ്ചാത്തലത്തിലായിരുന്നു നസ്ലിനോട് ചോദ്യം.

അതേസമയം, ‘സീൻ’ കണ്ടതിന് പിന്നാലെ ഭാവിയിലെ സൂപ്പർതാരമാണെന്ന് തന്നെ പ്രശംസിച്ച സംവിധായകൻ അറ്റ്‌ലിക്ക് നസ്ലിൻ നന്ദി പറഞ്ഞു. നന്ദി അറിയിച്ച് അറ്റ്‌ലിക്ക് ഇൻസ്റ്റഗ്രാമിൽ മെസേജ് അയച്ചിരുന്നതായി താരം പറഞ്ഞു. സിനിമകൾക്ക് കഥ കേൾക്കുന്നതും തിരഞ്ഞെടുക്കുന്നതും താൻതന്നെയാണെന്ന് ചോദ്യത്തിന് മറുപടിയായി നസ്ലിൻ പറഞ്ഞു.