തന്റെ കരിയറിൽ ഉടനീളം നേരിടേണ്ടി വന്ന ബോഡി ഷെയ്മിംഗിനെക്കുറിച്ചും ശസ്ത്രക്രിയ നടത്തിയെന്ന തരത്തിലുള്ള വ്യാജ പ്രചരണങ്ങളെക്കുറിച്ചും തുറന്നുപറഞ്ഞ് നടി കീർത്തി സുരേഷ്. താൻ തടിച്ചിരുന്ന സമയത്ത് മെലിയാൻ ആവശ്യപ്പെട്ടവർ തന്നെ, ഇപ്പോൾ മെലിഞ്ഞപ്പോൾ തനിക്ക് പഴയ ലുക്കായിരുന്നു നല്ലതെന്ന് പറയുന്നതിലെ വിരോധാഭാസത്തെ താരം ചോദ്യം ചെയ്തു. ലോകം എങ്ങനെയാണ് ചിന്തിക്കുന്നതെന്ന് തനിക്ക് അത്ഭുതം തോന്നുന്നുവെന്നും താരം തന്റെ കുറിപ്പിൽ വ്യക്തമാക്കി.

To advertise here,

2013-ൽ അഭിനയരംഗത്തേക്ക് എത്തുമ്പോൾ ഫിറ്റ്നസിനെക്കുറിച്ച് തനിക്ക് വലിയ ധാരണയില്ലായിരുന്നുവെന്ന് കീർത്തി ഇൻസ്റ്റാഗ്രാമിലൂടെ പറഞ്ഞു. എന്നാൽ 2018-ൽ പുറത്തിറങ്ങിയ മഹാനടി എന്ന ചിത്രത്തിന് ശേഷം താൻ ഗൗരവമായി വ്യായാമം ചെയ്യാൻ തുടങ്ങിയെന്നും കീർത്തി വെളിപ്പെടുത്തി. ഒൻപത് മാസത്തിനുള്ളിൽ 10 കിലോ ഭാരം കുറച്ചപ്പോൾ, അത് ശസ്ത്രക്രിയയിലൂടെയാണെന്ന് പലരും ആരോപിച്ചത് വേദനിപ്പിച്ചു. തന്റെ മാറ്റങ്ങൾ സ്വാഭാവികമായ കഠിനാധ്വാനത്തിലൂടെ ഉണ്ടായതാണ്. മുഖത്തുപോലും താൻ മാറ്റങ്ങൾ വരുത്തിയിട്ടില്ലെന്നും കീർത്തി കൂട്ടിച്ചേർത്തു.

ഫിറ്റ്നസ് യാത്രയിൽ യോഗ വലിയ മാറ്റങ്ങൾ കൊണ്ടുവന്നതായും 2020 മുതൽ അത് തന്റെ ജീവിതത്തിന്റെ ഭാഗമാണെന്നും താരം പങ്കുവെച്ചു. "ഇന്ന് ഞാൻ എന്നെ കാണുന്നതിൽ അഭിമാനിക്കുന്നു. എന്നിട്ടും ആളുകൾ എന്നെക്കുറിച്ച് അഭിപ്രായങ്ങൾ പറയുകയാണ്. നിങ്ങൾ തടിച്ചാൽ അവർ മെലിഞ്ഞിരിക്കാൻ പറയും, മെലിഞ്ഞാൽ അവർ തടിച്ചതായിരിക്കാൻ ഇഷ്ടപ്പെടും. ലോകം എങ്ങനെ പ്രവർത്തിക്കുന്നു എന്ന് ഞാൻ ചിലപ്പോൾ അത്ഭുതപ്പെടുന്നു," അവർ എഴുതി.

അടുത്ത കാലത്ത് തനിക്ക് ചില ശാരീരികവും മാനസികവുമായ തിരിച്ചടികൾ ഉണ്ടായതായും കഴിഞ്ഞ കുറച്ചു മാസങ്ങളായി താൻ പൊതുവേദികളിൽ നിന്ന് മാറി നിൽക്കുകയായിരുന്നുവെന്നും കീർത്തി സമ്മതിച്ചു. എങ്കിലും ഈ യാത്രയിൽ താൻ ഒരിക്കലും പരാജയം സമ്മതിക്കില്ലെന്നും, ഇടവേളകൾ ആവശ്യമാണെങ്കിൽ അത് എടുക്കുമെങ്കിലും കരുത്തോടെ തിരിച്ചുവരുമെന്നും താരം ഉറപ്പിച്ചു പറയുന്നു.

നിരവധിപേരാണ് കീർത്തിയുടെ കുറിപ്പിന് പ്രതികരണങ്ങളുമായെത്തിയത്. ആരാധകർക്ക് പുറമെ, കല്യാണി പ്രിയദർശൻ, മഞ്ജിമ മോഹൻ, പ്രഗ്യ ജയ്സ്വാൾ, അതുല്യ രവി തുടങ്ങിയ സഹപ്രവർത്തകരും കീർത്തിയെ പിന്തുണച്ചെത്തി. തെലുങ്കിൽ ഉപ്പ് കാപ്പുറമ്പ്, തമിഴിൽ റിവോൾവർ റീത്ത എന്നീ ചിത്രങ്ങളാണ് കീർത്തിയുടേതായി ഒടുവിൽ പുറത്തിറങ്ങിയത്. തമിഴിൽ 'കന്നിവെടി', 'സത്യവാൻ സാവിത്രി', തെലുങ്കിൽ 'റൗഡി ജനാർദ്ദനൻ', മലയാളത്തിൽ 'തോട്ടം', ഹിന്ദിയിൽ 'റാഫ്താർ' എന്നിവയാണ് കീർത്തി നായികയായി അണിയറയിൽ ഒരുങ്ങുന്ന ചിത്രങ്ങൾ.