പ്രസവശേഷമുള്ള ശരീരത്തിലെ മാറ്റങ്ങളുടെ പേരിൽ സമൂഹമാധ്യമങ്ങളിൽ വിമർശനം നേരിട്ട ബോളിവുഡ് താരം കത്രീന കൈഫ് ഒടുവിൽ മൗനം വെടിഞ്ഞു. അമ്മയായതിന് പിന്നാലെ പഴയ ശരീരസൗന്ദര്യം വീണ്ടെടുക്കണമെന്ന സമ്മർദത്തിന് വഴങ്ങാനില്ലെന്നാണ് താരത്തിന്റെ നിലപാട്. സ്വന്തം ആരോഗ്യത്തിനും കുഞ്ഞിനും പ്രാധാന്യം നൽകുമെന്നും ശാരീരികക്ഷമത വീണ്ടെടുക്കാൻ തനിക്ക് അനുയോജ്യമായ സമയം എടുക്കുമെന്നുമാണ് കത്രീന വ്യക്തമാക്കിയിരിക്കുന്നത്.

To advertise here,

ആഘോഷവേദിയിലെ ചിത്രങ്ങൾക്ക് പിന്നാലെ വിമർശനം

സെപ്റ്റംബർ 14-ന് അംബാനി കുടുംബത്തിന്റെ ഗണേശ ചതുർഥി ആഘോഷങ്ങളിൽ പങ്കെടുക്കാൻ ഭർത്താവ് വിക്കി കൗശലിനൊപ്പമാണ് കത്രീന കൈഫ് എത്തിയത്. മുംബൈയിലെ ആന്റിലിയയിൽ നടന്ന ആഘോഷത്തിൽ പരമ്പരാഗത വസ്ത്രം ധരിച്ചെത്തിയ താരത്തിന്റെ ചിത്രങ്ങൾ സമൂഹമാധ്യമങ്ങളിൽ ശ്രദ്ധനേടി. അമ്മയായതിന് ശേഷം മാസങ്ങൾക്കിടെ കത്രീന പങ്കെടുത്ത പ്രധാന പൊതുപരിപാടികളിലൊന്നായിരുന്നു ഇത്. എന്നാൽ ആഘോഷവേദിയിലെ താരത്തിന്റെ സാന്നിധ്യത്തേക്കാൾ ചർച്ചയായത് പ്രസവശേഷമുള്ള ശരീരത്തിലെ മാറ്റങ്ങളാണ്. ഗർഭധാരണത്തിന് മുമ്പുള്ള ചിത്രങ്ങളും പുതിയ ചിത്രങ്ങളും ചേർത്തുവച്ച് താരത്തിന്റെ ശരീരഘടനയെ പരിഹസിക്കുന്ന പോസ്റ്റുകൾ സാമൂഹികമാധ്യമങ്ങളിൽ വ്യാപകമായി പ്രചരിച്ചു. ശരീരഭാരത്തെയും രൂപമാറ്റത്തെയും കുറിച്ചുള്ള വിമർശനങ്ങളും ഉയർന്നു.അതേസമയം, കത്രീനയെ പിന്തുണച്ച് നിരവധി സ്ത്രീകളും രംഗത്തെത്തി. പ്രസവശേഷം സ്ത്രീകൾ എത്രയും വേഗം പഴയ ശരീരഘടനയിലേക്ക് മടങ്ങണമെന്ന പ്രതീക്ഷ തന്നെ തെറ്റാണെന്നും സ്ത്രീകളുടെ സ്വാഭാവിക ശാരീരികമാറ്റങ്ങളെ പരിഹസിക്കുന്നത് അവസാനിപ്പിക്കണമെന്നും അവർ ആവശ്യപ്പെട്ടു.

'സ്ത്രീയുടെ ശരീരം കടന്നുപോകുന്ന മാറ്റങ്ങൾ എല്ലാവർക്കും അറിയാം'

വോഗ് ഇന്ത്യയ്ക്ക് നൽകിയ അഭിമുഖത്തിലാണ് ബോഡി ഷെയ്മിങ്ങിനെക്കുറിച്ച് കത്രീന പ്രതികരിച്ചത്. മറ്റുള്ളവരുടെ അഭിപ്രായങ്ങൾക്കനുസരിച്ച് നിരന്തരം മാറിക്കൊണ്ടിരിക്കണമെന്ന് ആവശ്യപ്പെടുന്ന ലോകത്താണ് നാം ജീവിക്കുന്നതെന്ന് കത്രീന പറഞ്ഞു. പ്രസവശേഷം ഒരു സ്ത്രീയുടെ ശരീരത്തിലുണ്ടാകുന്ന മാറ്റങ്ങളെക്കുറിച്ച് ഭൂരിഭാഗം ആളുകൾക്കും ധാരണയുണ്ട്. എന്നിട്ടും ആ ശരീരത്തെ വിമർശനാത്മകമായി മാത്രം കാണാൻ ഒരാൾ തീരുമാനിക്കുന്നുവെങ്കിൽ അത് അയാളുടെ വ്യക്തിപരമായ തിരഞ്ഞെടുപ്പാണ്. അറിവില്ലായ്മയുടെ പേരിൽ അതിനെ ന്യായീകരിക്കാനാകില്ലെന്നും കത്രീന വ്യക്തമാക്കി. ജീവിതത്തിലെ മനോഹരമായ ഈ ഘട്ടത്തിലും ഇനി മുന്നോട്ടുള്ള യാത്രയിലുമാണ് താൻ ശ്രദ്ധ കേന്ദ്രീകരിക്കാൻ ആഗ്രഹിക്കുന്നതെന്നും താരം കൂട്ടിച്ചേർത്തു.

'തിരിച്ചുപോകാനോ? ഞാൻ മുന്നോട്ടാണ് വന്നിരിക്കുന്നത്'

പ്രസവശേഷം സ്ത്രീകൾ പഴയ ശരീരഘടനയിലേക്ക് എത്രയും വേഗം തിരിച്ചെത്തണമെന്ന പൊതുസമ്മർദത്തെയും കത്രീന ചോദ്യം ചെയ്തു.'തിരിച്ചുപോകണമെന്നോ? എവിടേക്ക്? എന്റെ ഹൃദയത്തിൽ ഏറെക്കാലമായി ഉണ്ടായിരുന്ന ഒരു ആഗ്രഹം സഫലമാക്കിക്കൊണ്ട് ഞാൻ ജീവിതത്തിൽ ഒരു പടി മുന്നോട്ടാണ് വന്നിരിക്കുന്നത്. പിന്നെ എന്തിനാണ് ഞാൻ പിന്നിലേക്ക് പോകാൻ ആഗ്രഹിക്കുന്നത്?' എന്നായിരുന്നു അവരുടെ ചോദ്യം. മാതൃത്വം തന്റെ ജീവിതത്തിലെ ഏറെ ആഗ്രഹിച്ചിരുന്ന അനുഭവമാണെന്നും കത്രീന പറഞ്ഞു. കുഞ്ഞ് വിഹാന്റെ മുഖം ആദ്യമായി കണ്ട നിമിഷത്തെക്കുറിച്ചും താരം അഭിമുഖത്തിൽ സംസാരിച്ചു. പ്രസവശേഷമുള്ള ആദ്യ ദിവസങ്ങളിൽ കുഞ്ഞിനെ നോക്കിയിരുന്നപ്പോൾ അനുഭവിച്ച വികാരം വാക്കുകളിൽ വിവരിക്കാനാകാത്തതായിരുന്നുവെന്ന് കത്രീന പറഞ്ഞു. താനും വിക്കിയും കടന്നുപോയ മനോഹരമായ നാലുവർഷത്തെ യാത്രയാണ് വിഹാന്റെ ജനനത്തിലേക്ക് നയിച്ചതെന്നും അവർ പറഞ്ഞു.

'എന്റെ ശരീരത്തിന് അനുയോജ്യമായ സമയത്ത് ഫിറ്റ്‌നസ് വീണ്ടെടുക്കും'

ശാരീരികക്ഷമതയെക്കുറിച്ച് തനിക്ക് വ്യക്തമായ ധാരണയുണ്ടെന്നും കത്രീന വ്യക്തമാക്കി. ഏറ്റവും ഊർജസ്വലമായി അനുഭവപ്പെടുന്ന ശാരീരികാവസ്ഥ ഏതാണെന്ന് തനിക്ക് അറിയാം. ആ അവസ്ഥയിലേക്ക് തിരിച്ചെത്താൻ ആഗ്രഹമുണ്ടെങ്കിലും അതിനായി മറ്റുള്ളവർ നിശ്ചയിക്കുന്ന സമയപരിധി പിന്തുടരില്ലെന്നാണ് കത്രീനയുടെ നിലപാട്. 'എന്റെ ഫിറ്റ്‌നസ് തീരുമാനങ്ങളെക്കുറിച്ച് എനിക്ക് നല്ല ബോധ്യമുണ്ട്. എന്റെ ശരീരം ഏറ്റവും ഊർജസ്വലമായി അനുഭവപ്പെടുന്ന അവസ്ഥ ഏതാണെന്നും അറിയാം. എനിക്ക് അനുയോജ്യമായ വേഗത്തിൽ ഞാൻ അവിടെയെത്തും,' കത്രീന പറഞ്ഞു. അമ്മയായതിന് പിന്നാലെ ശരീരഭാരം കുറയ്ക്കുന്നതോ പഴയ രൂപത്തിലേക്ക് മടങ്ങുന്നതോ മാത്രമല്ല തന്റെ ജീവിതത്തിലെ പ്രധാന ലക്ഷ്യമെന്നും ആരോഗ്യത്തിനും മാതൃത്വത്തിനും വ്യക്തിപരമായ സന്തോഷത്തിനുമാണ് ഇപ്പോൾ മുൻഗണനയെന്നും അവരുടെ വാക്കുകൾ വ്യക്തമാക്കുന്നു.

സ്ത്രീകളുടെ സ്വാഭാവിക മാറ്റങ്ങൾ എപ്പോഴാണ് സൗന്ദര്യക്കുറവായത്?

സ്ത്രീശരീരത്തെക്കുറിച്ചുള്ള സമൂഹത്തിന്റെ സൗന്ദര്യസങ്കൽപ്പങ്ങളെയും കത്രീന വിമർശിച്ചു. സ്ത്രീത്വത്തിന്റെ സ്വാഭാവികമായ സവിശേഷതകളെപ്പോലും സൗന്ദര്യക്കുറവായി ചിത്രീകരിക്കുന്ന പ്രവണതയാണ് ഇന്ന് കാണുന്നതെന്ന് താരം ചൂണ്ടിക്കാട്ടി. സ്ത്രീയുടെ ശരീരഘടന, സ്തനങ്ങളുടെ രൂപം, പ്രസവശേഷം ചർമത്തിലുണ്ടാകുന്ന മാറ്റങ്ങൾ തുടങ്ങിയവയെല്ലാം സ്ത്രീജീവിതത്തിന്റെ സ്വാഭാവിക ഭാഗങ്ങളാണ്. എന്നാൽ ഇത്തരം മാറ്റങ്ങളെ വിരൂപതയായി കാണുകയും സൗന്ദര്യക്കുറവിനെ ചികിത്സിക്കേണ്ട പ്രശ്‌നമായി അവതരിപ്പിക്കുകയും ചെയ്യുന്ന സമീപനമാണ് സമൂഹത്തിൽ വളരുന്നതെന്നും കത്രീന അഭിപ്രായപ്പെട്ടു.

അമ്മയായാൽ സൗന്ദര്യത്തിന്റെ അളവുകോൽ മാറണമോ?

പ്രസവശേഷം സ്ത്രീകൾ നേരിടുന്ന സൗന്ദര്യസമ്മർദത്തെക്കുറിച്ചുള്ള ചർച്ചകൾക്ക് കത്രീനയുടെ പ്രതികരണം വീണ്ടും വഴിതുറന്നിരിക്കുകയാണ്.പ്രസവത്തിന് പിന്നാലെ എത്ര വേഗത്തിൽ ശരീരഭാരം കുറച്ചു, പഴയ വസ്ത്രങ്ങൾ വീണ്ടും ധരിക്കാൻ കഴിയുന്നുണ്ടോ, ഗർഭധാരണത്തിന് മുമ്പുള്ള രൂപം തിരിച്ചുകിട്ടിയോ തുടങ്ങിയ ചോദ്യങ്ങളിലൂടെയാണ് പലപ്പോഴും സ്ത്രീകളുടെ ആരോഗ്യവും സൗന്ദര്യവും വിലയിരുത്തപ്പെടുന്നത്. സിനിമാതാരങ്ങളുടെ കാര്യത്തിൽ ഈ സമ്മർദം കൂടുതൽ ശക്തമാണ്. അവരുടെ പഴയതും പുതിയതുമായ ചിത്രങ്ങൾ താരതമ്യം ചെയ്ത് ശരീരത്തിലെ ഓരോ മാറ്റവും പൊതുചർച്ചയാക്കുന്ന പ്രവണതയും വ്യാപകമാണ്. എന്നാൽ പ്രസവശേഷമുള്ള ആരോഗ്യവും ശാരീരികമായ വീണ്ടെടുപ്പും ഓരോ സ്ത്രീക്കും വ്യത്യസ്തമാണ്. അതിന് എല്ലാവർക്കും ബാധകമായ ഒരു സമയപരിധി നിശ്ചയിക്കാനാകില്ല. ചുറ്റുള്ളവരുടെ പ്രതീക്ഷകൾക്കനുസരിച്ച് ശരീരത്തെ മാറ്റിയെടുക്കുന്നതല്ല, സ്വന്തം ആരോഗ്യവും സന്തോഷവും പരിഗണിച്ച് മുന്നോട്ടുപോകുന്നതാണ് പ്രധാനമെന്ന സന്ദേശമാണ് കത്രീനയുടെ വാക്കുകൾ നൽകുന്നത്.