ദേശീയപാതകളിലെ ടോൾ പ്ലാസകളുടെ 20 കിലോമീറ്റർ ചുറ്റളവിൽ താമസിക്കുന്നവർക്കായി വാർഷിക പാസ് അനുവദിച്ചേക്കും. നിലവിലെ പ്രതിമാസ പാസുകൾക്കു പകരം കൂടുതൽ ലാഭകരവും എളുപ്പത്തിൽ ഉപയോഗിക്കാവുന്നതുമായ വാർഷിക പാസ് കൊണ്ടുവരുന്നതിലൂടെ പ്രാദേശിക യാത്രക്കാരുടെ ബുദ്ധിമുട്ടുകളും സാമ്പത്തികഭാരവും കുറയ്ക്കാനാണ് കേന്ദ്ര റോഡ് ഗതാഗത, ഹൈവേ മന്ത്രാലയം ലക്ഷ്യമിടുന്നത്.

To advertise here,

വാർഷിക പാസിന് 3,000 രൂപ ഈടാക്കിയേക്കും. നിലവിലെ പ്രതിമാസ നിരക്കുകളേക്കാൾ (പ്രതിവർഷം 4,200 രൂപ) 28 ശതമാനം കുറവാണിത്. തടസ്സരഹിത 'മൾട്ടി-ലേൻ ഫ്രീ ഫ്ലോ' (MLFF) ടോൾ സംവിധാനം കാര്യക്ഷമമായി നടപ്പിലാക്കാനും ടോൾ കുടിശ്ശിക സംബന്ധിച്ച തർക്കങ്ങളും ഇ-നോട്ടീസുകളും കുറയ്ക്കാനും ഈ നീക്കം സഹായിക്കും.

വ്യവസ്ഥകൾ

അർഹത: ദേശീയപാതകളിലെ ഒരു ടോൾ പ്ലാസയുടെ 20 കിലോമീറ്റർ ചുറ്റളവിൽ താമസിക്കുന്ന അർഹരായ പ്രദേശവാസികൾക്ക് (വാണിജ്യേതര സ്വകാര്യ വാഹന ഉടമകൾക്ക്) പാസ് ലഭിക്കും.

ഉപയോഗപരിധി: രജിസ്‌ട്രേഷൻ സമയത്ത് തിരഞ്ഞെടുക്കുന്ന നിർദിഷ്ട ടോൾ പ്ലാസയിലൂടെ ഒരു വർഷത്തേക്ക് പരിധിയില്ലാത്ത യാത്രകൾ നടത്താൻ ഈ പാസിലൂടെ കഴിയും. ഇതൊരു രാജ്യവ്യാപക പാസല്ല, മറ്റ് ടോൾ പ്ലാസകളിൽ ഉപയോഗിക്കാൻ കഴിയില്ല.

ലാഭകരമാണോ?

  • നിലവിൽ പ്രദേശവാസികൾ വാണിജ്യേതര ആവശ്യങ്ങൾക്കായി പ്രതിമാസം 350 രൂപ ചെലവിട്ടാണ് ഡിജിറ്റൽ ലോക്കൽ പാസുകൾ ഉപയോഗിക്കുന്നത്. ഇത് പുതുക്കിക്കൊണ്ടിരിക്കണം എന്നുമാത്രമല്ല, ഒരു വർഷത്തേക്ക് മൊത്തം 4,200 രൂപ ചെലവു വരികയും ചെയ്യും.
  • നിർദിഷ്ട ലോക്കൽ വാർഷിക പാസിന്റെ നിരക്ക് 3,000 രൂപയായിരിക്കും. നിലവിലെ പ്രതിമാസ നിരക്കുമായി താരതമ്യം ചെയ്യുമ്പോൾ 28 ശതമാനം ലാഭം നൽകുന്നു.
  • ദേശീയപാതകൾക്കായുള്ള 3,075 രൂപയുടെ വാർഷിക പാസ് 200 യാത്രകൾക്ക് അനുമതി നൽകുമ്പോൾ പുതിയ ലോക്കൽ വാർഷിക പാസ് തിരഞ്ഞെടുത്ത ടോൾ പ്ലാസയിൽ മാത്രം ഒരു വർഷത്തേക്ക് പരിധിയില്ലാത്ത യാത്രകൾ അനുവദിക്കുന്നു.

നടപ്പാക്കൽ ഇങ്ങനെ

രാജ്മാർഗ് യാത്ര ആപ്പ്: അപേക്ഷകന്റെ വിലാസം, വാഹന വിവരങ്ങൾ, ബന്ധിപ്പിച്ച ഫാസ്ടാഗ് എന്നിവ ആപ്പ് വഴി ഓൺലൈനായി പരിശോധിച്ച് ഉറപ്പുവരുത്തിയ ശേഷമായിരിക്കും പാസ് അനുവദിക്കുക. തങ്ങളുടെ സ്ഥിരം ടോൾ പ്ലാസയിൽ ഈ സൗകര്യമുണ്ടോ എന്ന് അപേക്ഷകർക്ക് ആപ്പിലൂടെ പരിശോധിക്കാം.

  • നാഷണൽ ഹൈവേ അതോറിറ്റി നിലവിൽ മുന്നൂറോളം ടോൾ പ്ലാസകളിൽ ഡിജിറ്റൽ ലോക്കൽ പാസ് സൗകര്യം നൽകുന്നുണ്ട്. രാജ്യത്തൊട്ടാകെയുള്ള 1,150 ടോൾ പ്ലാസകളിലേക്കും പുതിയതായി വരുന്ന പ്ലാസകളിലേക്കും ഇത് വ്യാപിപ്പിക്കും.
  • പരമ്പരാഗത ബൂത്തുകളിൽ നിർത്താതെ വാഹനങ്ങൾക്ക് കടന്നുപോകാൻ കഴിയുന്ന ബാരിയർ-രഹിത 'മൾട്ടി-ലേൻ ഫ്രീ ഫ്ലോ' (MLFF) സംവിധാനം കൂടുതൽ കാര്യക്ഷമമാക്കാൻ ഡിജിറ്റൽ വാർഷിക പാസുകൾ സഹായിക്കും.