ദൈവമേ...! ഇത്രയടുപ്പമുള്ള പപ്പുവേട്ടനെ എങ്ങനെ മുഖത്തടിക്കും? | കുട്ട്യേടത്തി വിലാസിനിയുമായി അഭിമുഖം

ഈ സിനിമയില്‍ റീടേക്കില്ലാതെയായിരുന്നു ഞാന്‍ അഭിനയിച്ചു കൊണ്ടിരുന്നത്. എന്നാല്‍, ഇടയ്ക്ക് ഒരു രംഗം വീണ്ടുമെടുക്കേണ്ടി വന്നു. വൃത്തിയില്ലാത്ത, ആരേയും അനുസരിക്കാത്ത, സൗന്ദര്യമില്ലാത്ത മാളൂട്ടി മരം കേറിയും പറമ്പ് മുഴുവന്‍ നടക്കുന്നവളുമായിരുന്നല്ലോ. വാസൂട്ടിക്കൊപ്പം മാങ്ങ പറിക്കാനായി മരത്തില്‍ കയറണമായിരുന്നു. 'മാവില്‍ കയറാന്‍ വിലാസിനിക്ക് ഏണി എടുത്ത് കൊടുക്ക്' എന്ന് സംവിധായകന്‍ പറഞ്ഞപ്പോള്‍, 'ഏണിയൊന്നും വേണ്ട സാറേ, ഞാന്‍ തന്നെ കയറിക്കോളാം' എന്ന് ഞാന്‍ പറഞ്ഞത് ഇന്നും ഓര്‍മയുണ്ട്. എന്റെ വീട്ടില്‍നിന്ന് ഞാന്‍ മരം കയറുന്നതിന് എന്റെയമ്മ എന്നെ ഒരുപാട് വഴക്കുപറഞ്ഞിരുന്നു. അതുകൊണ്ടുതന്നെ ആ സാഹസം മാളുവിനെപ്പോലെ എനിക്കും എളുപ്പമായിരുന്നു.

അങ്ങനെ, മാളുട്ടി മരത്തില്‍ കയറി മാങ്ങ പറിച്ചിടുന്നത് കാണുന്ന പപ്പ്വേട്ടന്റെ (കുതിരവട്ടം പപ്പു) കഥാപാത്രം; 'പെണ്ണ് മരം കേറി'യെന്ന് ഉറക്കെ വിളിച്ചുപറയുമ്പോള്‍ അദ്ദേഹത്തിന്റെ മുഖത്തടിക്കുന്ന രംഗമായിരുന്നു എനിക്ക് റീടേക്ക് എടുക്കേണ്ടി വന്നത്. മാളൂട്ടിയെ കളിയാക്കികൊണ്ട് പപ്പ്വേട്ടന്‍ അലറുമ്പോള്‍ മരത്തില്‍നിന്ന് ചാടിയിറങ്ങി ഞാന്‍ തല്ലണം. 'അവന്റെ ചെകിട്ടത്ത് അടിക്കണമെന്നാണ്' പി.എന്‍. മേനോന്‍ സാര്‍ പറഞ്ഞുതന്നത്. പപ്പ്വേട്ടന്‍ എന്നെ ചെറുപ്പം മുതലേ അറിയുന്നൊരാളായിരുന്നു. ഒരു മണിക്കൂറില്‍ ഒരു നാടകമുണ്ടാക്കി കാര്‍ണിവലില്‍ കളിക്കുകയൊക്കെ ചെയ്യുമായിരുന്നു ഞങ്ങള്‍. അത്രയ്ക്കടുപ്പമുള്ള ആളെയാണ് തല്ലേണ്ടത്. ദൈവമേ എങ്ങനെ ആ മുഖത്തടിക്കുമെന്നായി എന്റെ മനസ്സില്‍. ഞാനാകെ കുഴങ്ങി. 

ഷൂട്ട് തുടങ്ങി. ഞാന്‍ മരത്തില്‍നിന്ന് ചാടി, നാടകത്തിന്റെ സ്റ്റൈലില്‍ അദ്ദേഹത്തിന്റെ മുഖത്തടിക്കുന്ന പോലെ കാണിച്ചു. അപ്പോള്‍ പി.എന്‍. സാറ് ദേഷ്യപ്പെട്ടു. ശരിക്കും അടിക്കാന്‍ പറഞ്ഞു. രണ്ടാമതും ഞാന്‍ ചാടി, അടിച്ചില്ല. അപ്പോഴും എന്നെ വഴക്കുപറഞ്ഞു. ആ സമയത്ത് സംവിധായകന്‍ പറയുന്നത് അനുസരിക്കാന്‍ എനിക്കാകെ ഭയമായിരുന്നു. തൊട്ടുമുന്നിലുള്ളത് പപ്പ്വേട്ടനാണ്. അടുത്ത തവണ ഞാന്‍ ശരിക്കും അടിച്ചു. അദ്ദേഹത്തിന്റെ മുഖമാകെ ചുവന്നു. മറക്കാനാകില്ല അത്.            

സത്യന്‍ സാറിനെക്കുറിച്ച് നേരത്തെ പറഞ്ഞുവെച്ചല്ലോ. അദ്ദേഹത്തോടൊപ്പം അഭിനയിക്കാന്‍ പോകുന്നുവെന്ന കാര്യം എനിക്ക് വലിയ അമ്പരപ്പായിരുന്നു. അസുഖബാധിതനായിരുന്നെങ്കിലും അദ്ദേഹം ആ സിനിമയിലെ വേഷത്തെ മനോഹരമായി അവതരിപ്പിച്ചു. സിനിമയില്‍ കാളക്കളി കാണിക്കുന്നുണ്ട്. ആ  സീനൊക്കെ അഭിനയിക്കുമ്പോള്‍ 'സത്യന് ഡ്യൂപ്പ് ഇടാം' എന്ന് പി.എന്‍. മോനോന്‍ സാര്‍ പറഞ്ഞു. അതുകേട്ട സത്യന്‍ സാര്‍ സമ്മതിച്ചില്ല. 'അസുഖമല്ലേ' എന്ന് പറഞ്ഞപ്പോള്‍ ദേഷ്യപ്പെടുകയും താന്‍തന്നെ ചെയ്യുമെന്ന് പറയുകയും ചെയ്തു. 

'കുട്ട്യേടത്തി'ക്കായികൊണ്ട തല്ല്‌

കുട്ട്യേടത്തി വെറുക്കപ്പെട്ടവളായിരുന്നു. അവളും സത്യന്റെ കഥാപാത്രവും തമ്മില്‍ അടുപ്പമാണെന്ന കിംവദന്തിയില്‍ കലിമൂത്ത് അമ്മയുടെ തല്ല് മുഴുവന്‍ മാളുട്ടി കൊള്ളുന്നുണ്ട്. ആ തല്ലെല്ലാം ഒറിജിനലായിരുന്നു. പല സീനിലും വേദനകൊണ്ട് ഞാന്‍ പുളഞ്ഞു. 'കുട്ട്യേടത്തി' കഥയെക്കുറിച്ച് വാസ്വേട്ടന്‍ പറഞ്ഞു തന്നിരുന്നു. ഞാനത് വായിച്ചിരുന്നില്ല. പിന്നീട് സിനിമക്ക് ശേഷമാണ് ആ കഥയടങ്ങിയ പുസ്തകം എന്റെ കൈയില്‍ കിട്ടുന്നതും ഞാനത് വായിക്കുന്നതും. 

സിനിമയുടെ അവസാനഭാഗത്ത് ഞാന്‍ ഒരുപാട് കഷ്ടപ്പെട്ടു. അന്നത്തെ കാലത്ത് ഇന്നത്തെ പോലെയുള്ള കണ്ടുപിടിത്തങ്ങളൊന്നുമില്ലല്ലോ. കഥയില്‍ മാളുട്ടി തൂങ്ങി മരിക്കുകയാണ്. അതഭിനയിക്കുമ്പോള്‍ കൈയും കാലും തൂങ്ങിയാടണം. സംവിധായകന് അതെല്ലാം വളരെ കൃത്യമായിതന്നെ കിട്ടണമായിരുന്നു. ആ സീന്‍ ഷൂട്ട് ചെയ്യുമ്പോള് രണ്ട് പ്രാവശ്യം ഓരോ സ്ഥലത്തും എന്നെ തൂക്കിനിര്‍ത്തി. അതൊന്നും ശരിയാകാതെ വന്നപ്പോള്‍ ഒരു പുളി മരത്തില്‍ വണ്ണമുള്ള കയര്‍ കെട്ടി എന്റെ നെഞ്ചിലൂടെയിട്ട് മേലേക്ക് വലിച്ചുതൂക്കി. വേദന സഹിച്ചാണ് ഞാനിരുന്നത്. ഷൂട്ടിങ്ങിന് ശേഷം നോക്കിയപ്പോള്‍ എന്റെ നെഞ്ചില്‍ ചോര കല്ലിച്ച് നില്‍ക്കുകയായിരുന്നു. ഇന്നത്തെ കാലത്താണ് അതെല്ലാമെങ്കില്‍ വല്ല അവാര്‍ഡുകളും കിട്ടും. 

പേരും കൈവന്ന പ്രശസ്തിയും 

കുട്ട്യേടത്തി എന്ന പേരിലാണ് ഇന്നും ഞാനറിയപ്പെടുന്നത്. സിനിമ കഴിഞ്ഞ് ഞാന്‍ വീണ്ടും നാടകത്തില്‍ സജീവമായി. സിനിമക്ക് മുമ്പ് കോഴിക്കോട് കുറേ അമെച്വര്‍ നാടകങ്ങള്‍ ചെയ്തിരുന്നു. കോഴിക്കോട് വിലാസിനി എന്ന പേരിലാണ് അതിലെല്ലാം അഭിനയിച്ചിരുന്നത്. നോട്ടീസിലെല്ലാം ആ പേരായിരുന്നു. 'കുട്ട്യേടത്തി' സിനിമയില്‍ അഭിനയിച്ച ശേഷം തിരിച്ച് നാടകത്തിലേക്ക് വന്നപ്പോള്‍ എല്ലാവരും 'കുട്ട്യേടത്തി വിലാസിനി' എന്ന് വിളിക്കാന്‍ തുടങ്ങി. അതെങ്ങനെയാണ് ആ പേര് വ്യാപകമായതെന്ന് എനിക്കറിയില്ല. എല്ലാ പത്രത്തിലും 'കുട്ട്യേടത്തി' സിനിമയെക്കുറിച്ച് വാര്‍ത്തയൊക്കെ വന്നിരുന്നു. 

ഈ സിനിമ കഴിഞ്ഞ് പെട്ടെന്നാണ് പേര് മാറിയത്. അതെങ്ങനെയെന്ന് എനിക്കുതന്നെ അറിയില്ല. പിന്നെ ടൈറ്റിലായി, നോട്ടീസില്‍ ആ പേരുവന്നു, നാടകക്കാര്‍ അനൗണ്‍സ് ചെയ്യുമ്പോഴും 'കുട്ട്യേടത്തി'യെന്ന് പേരിന് മുന്നില്‍ വന്നു. സംഗമം തിയ്യറ്ററിലും ആ പേരുവന്നു. എന്റെ പേര് വെച്ച് നാടകം ബുക്ക് ചെയ്യുന്ന സ്ഥിതിയുണ്ടായിരുന്നു. അന്ന് ഒരു സിനിമ നടി നാടകത്തില്‍ അഭിനയിക്കുന്നു എന്ന് പറഞ്ഞാല്‍ ഭയങ്കര കാര്യമായിരുന്നു. ഇന്ന് അതിനൊന്നും പ്രസക്തിയില്ല. 

അന്ന് കോഴിക്കോട് തിരുത്തിയാട് വിലാസിനി എന്നൊരു കലാകാരിയുണ്ടായിരുന്നു. അവര്‍ പിന്നീട് കോഴിക്കോട് വിലാസിനി എന്ന പേരിലാണ് അറിയപ്പെട്ടത്. എന്റെ പേര് കുട്ട്യേടത്തി വിലാസിനി എന്നും അവരുടെ പേര് പിന്നീട് എന്റെ പഴയ പേരുമായി മാറി.  

'കുട്ട്യേടത്തി'യിലെ അഭിനയത്തിന് എനിക്ക് ദേശീയ പുരസ്‌കാരം ലഭിച്ചിരുന്നു. സ്‌പെഷ്യല്‍ അവാര്‍ഡ്. ഡല്‍ഹിയില്‍ വെച്ചായിരുന്നു സമ്മാനദാനച്ചടങ്ങ്. പക്ഷേ, സംവിധായകനും എനിക്കും മാത്രമേ പോകാന്‍ പറ്റുമായിരുന്നുള്ളു. ഇവിടെനിന്ന് ഒറ്റയ്ക്ക് പോകേണ്ടതു കാരണം എനിക്ക് ചടങ്ങില്‍ പങ്കെടുക്കാന്‍ കഴിഞ്ഞില്ല. പേടിയായിരുന്നു. ആ വലിയ അംഗീകാരം എന്നും മനസ്സിലുണ്ട്. 

വര്‍ഷങ്ങളായി, വാസ്വേട്ടനെ കാണണം 

'കുട്ട്യേടത്തി'യിലെ എന്റെ അഭിനയത്തെക്കുറിച്ച് അഭിപ്രായമൊന്നും അദ്ദേഹം പറഞ്ഞില്ല. സംഗമം തിയ്യേറ്ററിലായിരുന്നതുകൊണ്ട് പിന്നീട് ഞാന്‍ നാടകത്തിന്റെ തിരക്കുകളിലേക്ക് പോയി. വാസ്വേട്ടന്റെ മറ്റു ചില സിനിമകളില്‍ ഞാന്‍ അഭിനയിച്ചിട്ടുണ്ട്. വാരിക്കുഴി, ഋതുഭേദം, സുകൃതം, തീര്‍ത്ഥാടനം എന്നീ പടങ്ങള്‍ ചെയ്തപ്പോഴും അദ്ദേഹത്തെ കണ്ടിരുന്നു. സിനിമ കഴിഞ്ഞ് പിന്നെ വാസ്വേട്ടനെ ഞാനധികം കണ്ടിട്ടില്ല.

മൂന്ന് വര്‍ഷങ്ങള്‍ക്ക് മുമ്പ് ഒരു പേപ്പറിന്റെ ആവശ്യത്തിനായി ഞാന്‍ അദ്ദേഹത്തെ സമീപിച്ചിരുന്നു. ഫോണിലൂടെ ബന്ധപ്പെടുമ്പോള്‍ വാസ്വേട്ടന്‍ അധികം സംസാരിക്കാറില്ല. അദ്ദേഹത്തെ ഒന്ന് കാണണമെന്നുണ്ട്. കാണാന്‍ കഴിയുമായിരിക്കും.