ഡിവോഴ്സ് ചെയ്യുന്നതിലും നല്ലത് ആത്മഹത്യ ചെയ്യുന്നതായിരുന്നു എന്നുവരെ കേട്ടു- അഞ്ജു ജോസഫ് അഭിമുഖം

ഡിവോഴ്‌സ് എന്ന തീരുമാനമെടുക്കാനുള്ള ആത്മധൈര്യമെങ്ങനെയാണ് നേടിയത്

ഒരുപാട് നാളുകൊണ്ടാണ്  ആ ധൈര്യം ലഭിച്ചത്. ഒരു മനുഷ്യന് ഒരാളെ സ്‌നേഹിച്ചിട്ട് അത് നിർത്താൻ പറ്റുന്നത് എങ്ങനെയാണെന്ന് എന്നെ സംബന്ധിച്ചിടത്തോളം വലിയൊരു ചോദ്യചിഹ്നമായിരുന്നു. അത് മനസ്സിലാക്കിയെടുത്തപ്പോൾ ആ തീരുമാനമെടുക്കാനായി. അന്ന് ഒപ്പം നിന്നത് സുഹൃത്തുക്കളാണ്. പക്ഷേ ആരോടും പറയാതെയാണ് ആ തീരുമാനമെടുത്തത്. ഒറ്റയ്ക്ക് തീരുമാനമെടുത്തു. ആ തീരുമാനം സൈക്കോളജിസ്റ്റിനെ വിളിച്ച് അറിയിച്ചു. അദ്ദേഹത്തോടാണ് മുൻപങ്കാളിയോട് കാര്യമറിയിക്കാൻ പറഞ്ഞത്. ആ തീരുമാനമെടുക്കുന്നത് വരെയുള്ളൂ പ്രശ്‌നം. ആ വലിയ തീരുമാനം നമ്മളെടുത്ത് കഴിഞ്ഞു. പിന്നെ വരുന്ന കുടുംബത്തിലെ പ്രശ്‌നമോ നാട്ടുകാരുടെ പ്രശ്‌നമോ ഒന്നും നമ്മളെ ബാധിക്കില്ല. എന്ത് വന്നാലും കുലുക്കമില്ല എന്ന ആറ്റിറ്റിയൂഡാണ്. എന്നാൽ അയാളോട് സ്‌നേഹം വെച്ചുകൊണ്ട് ആ തീരുമാനം എടുക്കാൻ പറ്റുക എന്നത് ബുദ്ധിമുട്ടാണ്. അവരെ വെറുക്കേണ്ട എന്ന് പഠിക്കും. അവരോട് സൗഹൃദം നിലനിർത്തിക്കൊണ്ട് തന്നെ ബന്ധം അവസാനിപ്പിക്കാം എന്ന് മനസില്ലാക്കാം. നമുക്ക് അല്ലെങ്കിൽ മറ്റേയാൾക്ക് ടോക്‌സിക് ആണെന്ന് മനസ്സിലാക്കി കഴിഞ്ഞാൽ അവസാനിപ്പിക്കുന്നത് അല്ലേ നല്ലത്. എന്നിട്ട് നമ്മുടെ പ്രശ്‌നം എന്താണെന്ന് മനസ്സിലാക്കി തിരുത്താൻ ശ്രമിക്കുക. അവർക്ക് തിരുത്താൻ ആഗ്രഹമുണ്ടെങ്കിൽ അവരും തിരുത്തട്ടെ. അതല്ലേ നല്ലത്. 

ജീവിതത്തിൽ സൗഹൃദത്തിന് മൂല്യം നൽകുന്നയാളാണോ? 

ഏതൊരു ബന്ധത്തിലും അതിന്റേതായ എഫേർട്ടിടുന്നയാളാണ്. എന്റെയൊരു കാഴ്ചപ്പാടിൽ ബന്ധങ്ങൾ ഈസിയായിരിക്കണം. അവരെ പറഞ്ഞ് മനസ്സിലാക്കി ബന്ധം മുന്നോട്ട് കൊണ്ടുപോവേണ്ടി വരരുത്. ഞാനും ഐശുവുമാണെങ്കിലും ഞങ്ങൾ ഒരേ ഇൻഡസ്ട്രിയിൽ ജോലി ചെയ്യുന്നവരാണ്. ഒന്നിച്ചുണ്ടാവുന്ന സമയം വളരെ കുറവാണ്. ഒന്നിച്ചിരിക്കുന്ന സമയത്ത് ഞങ്ങൾ ചില്ല് ചെയ്യും. എന്തെങ്കിലും ബുദ്ധിമുട്ട് വന്നാൽ വിളിക്കും. അപ്പോൾ ഇന്നലെ സംസാരിച്ച് തീർന്നത് പോലെ ഒരു മാസം കഴിഞ്ഞോ രണ്ട് മാസം കഴിഞ്ഞോ ഞങ്ങൾക്ക് സംസാരിക്കാൻ കഴിയും. എല്ലാ കൂട്ടുകെട്ടുകളിലും അങ്ങനെയാണ്. എല്ലാ റിലേഷനിൽ ഞാൻ എഫേർട്ട് ഇടും പക്ഷേ വേണ്ട സമയത്ത് മാത്രം. 

2025-ലും മാനസികാരോഗ്യം മോശമാണെന്ന് പറയുന്നതും സൈക്കോളജിസ്റ്റിനെ കാണുന്നതുമൊക്കെ അപരാധമാണെന്ന ചിന്താഗതി നിലനിൽക്കുന്നുണ്ട്. അതിൽ മാറ്റം വേണ്ടതില്ലേ. ശാരീരികാരോഗ്യം പോലെ തന്നെ പ്രധാനമാണ് മാനസികാരോഗ്യമെന്നും ഏതൊരു അസുഖം പോലെ ചികിത്സ വേണ്ടതാണ് മനസ്സിനെ ബാധിക്കുന്ന രോഗങ്ങൾക്കെന്നും തിരിച്ചറിയേണ്ടതില്ലേ.

മാറ്റം വരുത്തേണ്ടതാണ്. നമ്മളെല്ലാവരും മാറ്റത്തോട് വിമുഖതയുള്ളവരാണല്ലോ. നമ്മുടെ ദിനചര്യ ഒന്ന് മാറിയാൽ പോലും ബുദ്ധിമുട്ടാണ്. അത് തന്നെയാണ് ഇക്കാര്യത്തിലും. കൂടുതലാളുകൾ തെറപ്പിയിലേക്ക് എത്തണമെന്നുണ്ട്. അതിന് തെറപ്പിസ്റ്റുകൾ ഫീസ് കുറയ്ക്കണമെന്നും എനിക്ക് അഭിപ്രായമുണ്ട്. ഏറെ ചെലവേറിയതാണ്. എല്ലാവർക്കും താങ്ങാനാകുന്ന ചെലവിൽ തെറപ്പി ലഭ്യമാകണം. പക്ഷേ ആ സ്റ്റിഗ്മ ഇപ്പോഴും നിലനിൽക്കുന്നുണ്ട്. എത്ര പഠിപ്പും വിവരവുമുള്ള ആളുകളാണെങ്കിൽ പോലും അതുണ്ട്. ഞാൻ തെറപ്പിക്ക് പോകുന്നത് കണ്ട് എന്റെ ചെയ്ഞ്ച് കണ്ടിരിക്കുന്ന ആളുകളുണ്ട്. ഞാൻ എവിടെയായിരുന്നു എന്ന് എനിക്ക് നല്ല ബോധ്യമുണ്ട്. നിലത്ത് കിടന്ന് ഇഴഞ്ഞുകൊണ്ടിരുന്ന അവസ്ഥയിൽ നിന്ന് ഇപ്പോൾ ഞാൻ നടന്ന് ഒരു രണ്ട് സ്റ്റെപ്പ് എങ്കിലും മുകളിൽ കയറിയിട്ടുണ്ടെങ്കിൽ അതിനൊരു പ്രധാന കാരണം തെറപ്പിയാണ്. തെറപ്പിക്ക് പോയതുകൊണ്ട് മാത്രം കാര്യമില്ല അതിനകത്ത് പറയുന്ന കാര്യങ്ങൾ നമ്മൾ ജീവിതത്തിൽ‌ നടപ്പിലാക്കുകയും വേണം. നമ്മൾ അതിന്റെ പുറകിൽ വർക്ക് ചെയ്യാൻ തയ്യറാണെങ്കിൽ മാത്രമേ വ്യത്യാസം ഉണ്ടാകൂ. തെറപ്പിക്ക് പോയിട്ടും യാതൊരു മാറ്റവുമില്ല എന്ന് പറയുന്നവരെ കണ്ടിട്ടുണ്ട്. തെറപ്പിസ്റ്റിനെ കുറ്റം പറയും. പക്ഷേ അവർ‌ പറയുന്ന കാര്യങ്ങൾ ചെയ്തെങ്കിൽ മാത്രമേ മാറ്റം വരൂ. ഒരു  പാട്ട് നമ്മളെ പാട്ട് പഠിപ്പിക്കുകയാണെങ്കിൽ പഠിപ്പിക്കാനേ പറ്റുകയുള്ളൂ, പഠിക്കുക എന്നുള്ളത് നമ്മുടെ കൈയിലാണ്. 

പിന്നെ മറ്റൊരു കാര്യം, എന്റെ മാറ്റം കണ്ടിട്ടും ചികിത്സ തേടാൻ വിസമ്മതിക്കുന്നവരുണ്ട്. ഞാൻ കൂടെ കൊണ്ടുപോയി അവരെ പരിചയപ്പെടുത്തി കൊടുത്തിട്ടുണ്ട്. പക്ഷേ അവർ വിമുഖത കാണിക്കും. ആദ്യത്തെ ഒരു സെഷൻ പോകും അതുകഴിഞ്ഞിട്ട് പേടിയാകും. മാറ്റത്തിനോടുള്ള പേടി തന്നെയാണ്. ഒരു കപ്പിളിനെ നമ്മൾ തെറപ്പിക്ക് വിട്ടാൽ അവർ ആദ്യം ചിന്തിക്കുക ദൈവമേ ഇവർ ഇത് തല്ലിപ്പിരിക്കുമോ എന്നായിരിക്കും. പക്ഷെ  കപ്പിൾ തെറപ്പി തല്ലിപ്പിരിക്കാനുള്ളതല്ല നമ്മുടെ നല്ലതിന് വേണ്ടിയിട്ടാണ്. 

ഒരു റിലേഷൻഷിപ്പ് വിജയിച്ചില്ലെങ്കിൽ പുതിയതിലേക്ക് കടക്കാൻ പേടിയുണ്ടാകാറുണ്ട്. പഴയ ബന്ധം പോലെ തന്നെയാകുമോ അല്ലെങ്കിൽ വർക്ക് ഔട്ട് ആയില്ലെങ്കിൽ അയാളുമായിട്ടുള്ള സൗഹൃദം പോകുമോ എന്നിങ്ങനെ. ആദിത്യയുമായുള്ള റിലേഷനിൽ അങ്ങനെ ഒരു പേടി ഉണ്ടായിരുന്നോ?

തീർച്ചയായിട്ടും ഉണ്ടായിരുന്നു. ഞങ്ങൾ രണ്ടുപേരും സിം​ഗിളായിരുന്നു ആ സമയത്ത്. ആദ്യം പറയുമ്പോൾ കുറച്ച് പേടിയായിരുന്നു. ഇതെങ്ങാനും പൊട്ടിയാൽ ആ സൗഹൃദം നശിച്ചു പോകും എന്നുള്ള ഒരു ടെൻഷൻ തന്നെയായിരുന്നു ആദ്യം. രണ്ടുപേർക്കും ട്രസ്റ്റ് ഇഷ്യൂസുമുണ്ട്. വർക്ക് ചെയ്തു കഴിഞ്ഞപ്പോൾ മനസ്സിലായി നമ്മുടെ ഏറ്റവും അടുത്ത സുഹൃത്ത് തന്നെ പാർട്നറായി വരുന്നത് മനോഹരമായ കാര്യമാണെന്ന്. എന്ത് പ്രശ്നമുണ്ടെങ്കിലും എനിക്ക് വിളിക്കാം. ഞാൻ ഒന്ന് നോക്കിയാൽ അതെന്തിനാണെന്ന് ആദിത്യക്കും തിരിച്ച് ആദിത്യയെ എനിക്കും മനസ്സിലാക്കാൻ പറ്റും. പ്രണയം എന്ന ഘട്ടത്തിലേക്ക് കയറാൻ കുറച്ചു ബുദ്ധിമുട്ടുണ്ടായിരുന്നു. ഒന്ന് രണ്ട് വർഷമെടുത്തു അതിലേക്കെത്താൻ. മൂന്ന് നാല് വ‍ർഷം ‍ഡേറ്റ് ചെയ്തു നോക്കിയിട്ട് വർക്ക് ഔട്ടായാൽ വിവാഹത്തിലേക്ക് പോകാം അല്ലെങ്കിൽ ബെയ് പറയാമെന്നോർത്തു. 

ഒരു പാർട്ണറിൽ നിന്ന് ആഗ്രഹിക്കുന്ന കാര്യങ്ങൾ എന്തൊക്കെയാണ്

ഇത് പറഞ്ഞാൽ എന്റെ തെറപ്പിസ്റ്റ് എന്നെ ഓടിക്കും. നമ്മുടെ ബേസിക്കായ വാല്യൂ സിസ്റ്റം മാറ്റേണ്ട ആവശ്യമുണ്ടെന്ന് എപ്പോഴും എന്നോട് പറയാറുണ്ട്. അന്നും ഇന്നും എന്റെ വാല്യൂ സിസ്റ്റം എന്ന് പറഞ്ഞാൽ സത്യസന്ധതയും ഇൻ്റ​ഗ്രിറ്റിയുമാണ്. സത്യസന്ധതയും ഇന്റഗ്രിറ്റിയും തമ്മിലുള്ള വ്യത്യാസമെന്താണെന്ന് വെച്ചാൽ, ഞാനും എന്റെ പാർട്ണറും സത്യസന്ധമായി കാര്യങ്ങൾ ചെയ്യുക ഇന്റഗ്രിറ്റി എന്ന് പറയുമ്പോൾ ഞാൻ നോക്കാത്ത സമയത്തും അയാൾ വിശ്വസ്തത കാണിക്കുക എന്നുള്ളതാണ്. പിന്നെ മറ്റൊന്ന് ആത്മാർഥതയുണ്ടായിരിക്കണം, ബ​ഹുമാനമുണ്ടായിരിക്കണം. പിന്നെ ഉപദ്രവവും അക്രമവുമൊന്നും പാടില്ല. എന്തെങ്കിലും പ്രശ്നമുണ്ടെങ്കിൽ തന്നെ നമുക്ക് തമ്മിലിരുന്ന് സംസാരിച്ച് തീർക്കാമല്ലോ. അടിയുടെയും ഇടിയുടെയും ആവശ്യമില്ലല്ലോ. അങ്ങനെയുള്ള കുറച്ചു കാര്യങ്ങൾ. പിന്നെ ഒരു റിലേഷൻഷിപ്പിലേക്ക് ഇറങ്ങുമ്പോൾ കുറച്ച് എഫേർ‌ട്ടൊക്കെ ഇടണ്ടേ. പരസ്പര ബഹുമാനമാണ് ഏറ്റവും പ്രധാനം. ഒത്തുപോകുന്നില്ല എന്ന് കണ്ടാൽ അടിയിലേക്കെത്തുന്നത് വരെ നിൽക്കരുത്. സ്വന്തം ജീവനും ജീവിതത്തിനും പ്രാധ്യാന്യം കൊടുക്കുക. അതിനേക്കാൾ മുകളിലല്ല ഒരു പ്രണയവും. നിങ്ങൾ ഇതിനകത്ത് നിന്ന് മരിക്കേണ്ട ആവശ്യമില്ല. പലരും എന്നോട് പറഞ്ഞിട്ടുണ്ട്  ഡിവോഴ്‌സ് ചെയ്യുന്നതിനേക്കാൾ അഞ്ജു ആത്മഹത്യ ചെയ്യുന്നതായിരുന്നു നല്ലതെന്ന്. ഇത് ഞാൻ കേൾക്കേണ്ടി വന്നിട്ടുണ്ട്. ഡിവോഴ്സ് ഒരിക്കലും കുടുംബമോ സമൂഹമോ അം​ഗീകരിക്കുന്നതല്ല. പക്ഷേ നിങ്ങളാവണം നിങ്ങളുടെ പ്രയോരിറ്റി.

ഈ വർഷം ജീവിതത്തിൽ കൊണ്ടുവരണമെന്ന് ആഗ്രഹിക്കുന്ന മാറ്റമെന്താണ്. ലോകത്തിലാ​ഗ്രഹിക്കുന്ന മാറ്റമെന്താണ്.

ഞാനങ്ങനെ വലിയ റെസൊല്യൂഷൻസ് എടുക്കുന്ന ആളൊന്നുമല്ല. കാരണം റെസൊല്യൂഷൻസ് എടുത്താൽ അങ്ങനെ പാലിക്കാൻ പറ്റാറില്ല. വലിയ റെസൊല്യൂഷൻസ് ഒന്നുമില്ല. കുറച്ചുകൂടി കർശനമായി നോ പറയണമെന്ന് ഒരു തീരുമാനമെടുത്തിട്ടുണ്ട്. അതാണ് എന്റെ ജീവിതത്തിൽ കൊണ്ടുവരണമെന്നാഗ്രഹിക്കുന്ന മാറ്റം. ബൗണ്ടറി വെക്കാനൊക്കെ പഠിച്ചുവരുന്നതേയുള്ളൂ. തുടങ്ങിയിട്ടേയുള്ളൂ യുദ്ധം. നോ പറയാൻ ശ്രമിക്കാറുണ്ട്. പക്ഷേ പറഞ്ഞു ശീലമില്ലാത്തതുകൊണ്ട് കുറച്ചു സമയമെടുക്കും പറയാൻ. കുറച്ചുകൂടി പെട്ടെന്ന് നോയിലേക്ക് എത്തണമെന്ന് ആഗ്രഹമുണ്ട്. 

ഞാനൊക്കെ തന്തവൈബിന്റെയും തള്ളവൈബിന്റെയും അറ്റത്തുള്ള ആളാണെന്നാണ് തോന്നുന്നത്. കാരണം ഞാനൊരു സോഷ്യൽ പേഴ്സണല്ല. പിള്ളേരൊക്കെ ഡ്രിങ്ക് ചെയ്യാനായി വിളിച്ചാൽ ഞാൻ അതിനകത്തൊന്നുമില്ലാത്ത ആളാണ്. അപ്പോ തന്നെ തള്ളവൈബ് എന്ന് എഴുതി തള്ളി. കുറച്ചുനേരമൊക്കെ പിടിച്ചുവെക്കും. പക്ഷേ ഒരു പത്തരയായി കഴിഞ്ഞാൽ എങ്ങനെയെങ്കിലും ഒന്ന് ഉറങ്ങണമെന്നേയുള്ളൂ. പിന്നെ നമുക്ക് എല്ലാവർക്കുമൊരു ഫേസുണ്ടല്ലോ, റോക്ക് കേൾക്കുക പോപ്പ് കേൾക്കുക അങ്ങനെ. ഞാനിപ്പോഴും അങ്ങനത്തെ പാട്ടുകൾ കേൾക്കാറുണ്ട് പാട്ടുകാരിയെന്ന നിലയിൽ നമ്മൾ അപ്‌ഡേറ്റഡായിരിക്കണമെല്ലോ. പക്ഷേ കാറോടിക്കുമ്പോൾ ജോൺസൺ മാഷിന്റെ പാട്ടുകൾ,വിദ്യാസാഗർ സാറിന്റെ പാട്ടുകൾ അങ്ങനെ ആ ഒരു മൂഡിലേക്ക് കേറിയിട്ടുണ്ട്. അത് തേർട്ടി പ്ലസിൽ വന്നൊരു വ്യത്യാസമാണ്. ഒന്നും ചെയ്യാനില്ല. ഞാൻ അത് ആസ്വദിക്കുന്നുണ്ട്. മറ്റേ ഫേസും നമ്മൾ ആസ്വദിച്ചിരുന്നെല്ലോ. ഒരു തേർട്ടി പ്ലസിൽ അങ്ങനെ ഒരുപാട് മാറ്റങ്ങൾ വരും. പിന്നെ ശാരീരികപരമായി നമുക്ക് വ്യത്യാസങ്ങളുണ്ടാകാറുണ്ടന്നെ. നടുവേദനയും കാലുവേദനയുമങ്ങനെ. പണ്ടൊക്കെ ഒരു പരിപാടി കഴിഞ്ഞുവന്നാൽ ആരെങ്കിലും സോഷ്യലൈസ് ചെയ്യമാന്നൊക്കെ പറഞ്ഞുവന്നാൽ ഞാൻ മുന്നിലുണ്ടാകും. ഇപ്പോ രണ്ടുമണിക്കൂർ ഷോ ഒക്കെ കഴിഞ്ഞുവന്നാൽ കുളിക്കണം, എവിടെയെങ്കിലും കിടക്കണമെന്നേ ഉള്ളൂ. ഞാൻ ഒട്ടും വീടിനു പുറത്തേക്കിറങ്ങുന്ന ആളല്ല. പറ്റിയാൽ പുസ്തകം വായിച്ച് വീട്ടിലിരിക്കും.

പിന്നെ ലോകത്തിൽ ഉണ്ടാവണമെന്ന് ഞാനാഗ്രഹിക്കുന്ന മാറ്റം ആളുകൾ കുറച്ചുകൂടി ദയയോടെ പെരുമാറണമെന്നാണ്. ആ ഒരു മാറ്റം ഞാൻ എപ്പോഴും പ്രതീക്ഷിക്കുന്നതാണ്. ഒരുപാട് ആളുകൾ വെറുപ്പ് പടർത്തുന്നു. അതിന്റെ ഒന്നും ആവശ്യമില്ല. നമ്മളെല്ലാവരും മനുഷ്യരല്ലേ നമുക്ക് മറ്റേ മനസമാധാനമായിട്ട് ജീവിച്ചാൽ പോരേ. ജീവിക്കുക ജീവിക്കാനനുവദിക്കുക. മറ്റുള്ളവർ എങ്ങനെയെങ്കിലും ജീവിച്ചോട്ടെ അവർക്ക് സമാധാനമായിട്ട് സന്തോഷമായി ജീവിച്ചോട്ടെ.