വീട്ടിൽ തയ്യാറാക്കുന്ന സാധാരണ ഭക്ഷണവും ഇഷ്ടപ്പെട്ട വ്യായാമങ്ങളും ജീവിതത്തിന്റെ ഭാഗമാക്കുകയാണ് നടി രവീണ ടണ്ടന്റെ രീതി. ഉച്ചയ്ക്ക് പരിപ്പും പച്ചക്കറിയും തൈരും വീട്ടിൽ തയ്യാറാക്കിയ നെയ്യും. പഞ്ചസാര കൂടുതലുള്ള പാനീയങ്ങളോട് 'നോ' പറയും. വ്യായാമത്തിന് നീന്തലും യോഗയും നടത്തവും ഓട്ടവും അടങ്ങുന്ന രവീണയുടെ ദിനചര്യ വളരെ ലളിതമാണ്. ഒരു അഭിമുഖത്തിലാണ് ഇതിനെക്കുറിച്ചാണ് രവീണ പറഞ്ഞത്. തന്റെ പതിവ് ഭക്ഷണത്തെക്കുറിച്ച് ചോദിച്ചപ്പോൾ വളരെ സാധാരണമായ ഇന്ത്യൻ ഉച്ചഭക്ഷണമാണ് രവീണ പറഞ്ഞത്.

To advertise here,

‘ഉച്ചയ്ക്ക് സാധാരണമായി പരിപ്പ്, പച്ചക്കറി, തൈര് എന്നിവയാണ് കഴിക്കുന്നത്. വയർ നിറഞ്ഞിരിക്കണമെന്ന് എനിക്ക് തോന്നാറുണ്ട്. തൈരിൽ പ്രോബയോട്ടിക്കുകളുണ്ട്. തേങ്ങാവെള്ളം ലഭ്യമല്ലെങ്കിൽ തൈര് കഴിക്കാറുണ്ട്.’-രവീണ പറഞ്ഞു. പരിപ്പ് സസ്യാധിഷ്ഠിത പ്രോട്ടീന്റെ ഉറവിടമാണ്. പച്ചക്കറികളിൽനിന്ന് നാരുകളും വിവിധ പോഷകങ്ങളും ലഭിക്കും. തൈരിൽ ജീവിച്ചിരിക്കുന്ന ചില ഗുണകരമായ ബാക്ടീരിയകൾ ഉണ്ടായേക്കാം. എന്നാൽ എല്ലാ തൈരിലും ഒരേ അളവിൽ പ്രോബയോട്ടിക്കുകൾ ഉണ്ടാകണമെന്നില്ല. ഭക്ഷണം തന്റെ കുടുംബജീവിതത്തിന്റെ പ്രധാന ഭാഗമാണെന്നും രവീണ പറയുന്നു. ‘ഉച്ചഭക്ഷണം കഴിക്കുമ്പോൾ രാത്രി എന്താണ് കഴിക്കേണ്ടതെന്നാണ് ഞങ്ങളുടെ ചർച്ച. രാത്രി ഭക്ഷണം കഴിക്കുമ്പോഴാകട്ടെ നാളത്തെ ഉച്ചഭക്ഷണത്തിന് എന്തുണ്ടാക്കണമെന്നാണ് ചിന്തിക്കുന്നത്’, താരം തമാശയായി പറഞ്ഞു. ഭർത്താവ് അനിൽ തഡാനി പുതിയ വിഭവങ്ങൾ പരീക്ഷിക്കാൻ ഇഷ്ടപ്പെടുന്നയാളാണെന്നും അവർ പറഞ്ഞു. യൂട്യൂബിലും മറ്റും വ്യത്യസ്ത പാചകരീതികൾ കണ്ടുപഠിച്ച് അദ്ദേഹം വീട്ടിൽ പരീക്ഷിക്കാറുണ്ടെന്നാണ് രവീണ പറയുന്നത്. ഭക്ഷണം ആസ്വദിക്കുമ്പോഴും എന്താണ് കഴിക്കുന്നതെന്ന കാര്യത്തിൽ ശ്രദ്ധ പുലർത്തുന്നുണ്ടെന്നും താരം വ്യക്തമാക്കി.

വീട്ടിൽ തന്നെ നെയ്യ് തയ്യാറാക്കും

വീട്ടിൽ തന്നെ നെയ്യ് തയ്യാറാക്കുന്നതാണ് രവീണയുടെ കുടുംബത്തിലെ മറ്റൊരു ശീലം. 'ഞങ്ങൾ സ്വന്തമായി നെയ്യ് ഉണ്ടാക്കാറുണ്ട്', താരം പറഞ്ഞു. നെയ്യ് ഉപയോഗിക്കുന്നതുകൊണ്ടുമാത്രം ഒരു ഭക്ഷണക്രമം ആരോഗ്യകരമാകില്ല. അതിന്റെ അളവും ഒരാളുടെ മൊത്തത്തിലുള്ള ഭക്ഷണക്രമവും പ്രധാനമാണ്. കൊഴുപ്പുകൾ ഉൾപ്പെടെ എല്ലാത്തിന്റെയും അളവ് ശ്രദ്ധിക്കേണ്ടതുണ്ട്. അതേസമയം, അത്യന്തം കർശനമായ ഭക്ഷണനിയന്ത്രണത്തിനുപകരം വീട്ടിൽ തയ്യാറാക്കുന്ന സാധാരണ ഭക്ഷണത്തിന് പ്രാധാന്യം നൽകുന്നതാണ് രവീണയുടെ സമീപനം.

സോഫ്റ്റ് ഡ്രിങ്കുകൾ വീട്ടിൽ വേണ്ട

സോഡ നിറച്ച മധുരപാനീയങ്ങൾ ഒഴിവാക്കുന്നതിൽ രവീണയ്ക്ക് വ്യക്തമായ നിലപാടുണ്ട്. താൻ മാത്രമല്ല, കുട്ടികളെയും ഇത്തരം പാനീയങ്ങൾ കുടിക്കാൻ പ്രോത്സാഹിപ്പിച്ചിട്ടില്ലെന്ന് അവർ പറയുന്നു. സോഡയും സോഫ്റ്റ് ഡ്രിങ്കുകളും കഴിക്കാതിരിക്കാനാണ് ശ്രമിക്കുന്നത്. കുട്ടികളെയും അത് കുടിക്കാൻ പ്രോത്സാഹിപ്പിച്ചിട്ടില്ല. പഞ്ചസാരയുടെ അളവ് വളരെ കൂടുതലുള്ള പാനീയങ്ങളും ഒഴിവാക്കും', രവീണ പറഞ്ഞു.

സ്വന്തം കൃഷിയിടത്തിലെ മഞ്ഞൾ ഉപയോഗിച്ച് കഷായം

വീട്ടിൽ തയ്യാറാക്കുന്ന ഒരു കഷായത്തെക്കുറിച്ചും രവീണ അഭിമുഖത്തിൽ പറഞ്ഞിരുന്നു. സ്വന്തം കൃഷിയിടത്തിൽനിന്ന് ലഭിക്കുന്ന മഞ്ഞളാണ് ഇതിനായി ഉപയോഗിക്കുന്നതെന്നാണ് താരം പറഞ്ഞത്. അയമോദകം, ഗ്രാമ്പൂ, കുരുമുളക്, മഞ്ഞൾ, ഇഞ്ചി എന്നിവ വെള്ളത്തിൽ ചേർത്ത് തിളപ്പിക്കും. ഇതിനൊപ്പം അല്പം നെയ്യും ചേർക്കാറുണ്ടെന്ന് രവീണ പറഞ്ഞു. കുട്ടികൾക്കും ഈ പാനീയം നൽകാറുണ്ടെന്നും അവർ വ്യക്തമാക്കി.

ഭക്ഷണത്തിലെന്നപോലെ വ്യായാമത്തിലും തനിക്ക് ഇഷ്ടമുള്ള കാര്യങ്ങളാണ് രവീണ തിരഞ്ഞെടുക്കുന്നത്. എനിക്ക് നീന്തൽ വളരെ ഇഷ്ടമാണ്. ധാരാളം കാർഡിയോ വ്യായാമങ്ങളും ചെയ്യാറുണ്ട്. അതാണ് എന്റെ ശരീരത്തിന് കൂടുതൽ അനുയോജ്യമെന്ന് തോന്നുന്നത്. കൂടുതൽ ഭാരമുയർത്തിയുള്ള പരിശീലനം എനിക്ക് അത്ര പറ്റില്ല'- രവീണ പറഞ്ഞു. യോഗ, നീന്തൽ, നടത്തം, ഓട്ടം എന്നിവയാണ് താരം ഇഷ്ടപ്പെടുന്ന പ്രധാന വ്യായാമങ്ങൾ.

ഫിറ്റ്‌നസിനൊപ്പം ചർമസംരക്ഷണത്തെക്കുറിച്ചും രവീണ സംസാരിച്ചു. എണ്ണ ഉപയോഗിച്ചുള്ള മസാജുകൾ തനിക്ക് ഇഷ്ടമാണെന്നും പ്രായം കൂടുന്നതിനനുസരിച്ച് ചർമത്തിലെ വരൾച്ച ശ്രദ്ധിക്കേണ്ടതുണ്ടെന്നും അവർ പറഞ്ഞു. ശരീരത്തിന് എണ്ണ മസാജ് വളരെ പ്രധാനമാണെന്നാണ് എനിക്ക് തോന്നുന്നത്. ചർമത്തിൽ ഈർപ്പം നിലനിർത്തണമെന്നും അവർ പറഞ്ഞു.