എനിക്ക് നിന്നെയിഷ്ടമാണ് പക്ഷേ പേഴ്‌സണൽ സ്‌പേസ് കൂടിയേ തീരൂ. ജെൻസീ പ്രണയബന്ധങ്ങളിൽ മുന്നോട്ടുവെയ്ക്കുന്ന ഡിമാൻഡുകളിൽ ഒന്നാണിത്. പങ്കാളിയോട് അളവറ്റ സ്‌നേഹമുണ്ടെങ്കിൽ പോലും സ്വന്തം വ്യക്തിത്വവും സ്വാതന്ത്ര്യവും പണയം വെച്ചുകൊണ്ടുള്ള ഒരു ബന്ധത്തിനും തങ്ങൾ തയ്യാറല്ലെന്ന് ഇവർ ഉറപ്പിച്ചു പറയുന്നു. പരമ്പരാഗതമായി നാം കണ്ടുവന്നിരുന്ന പ്രണയ സങ്കൽപ്പങ്ങളെയും വിവാഹ സമവാക്യങ്ങളെയും പാടെ മാറ്റിയെഴുതുന്ന ഒരു പുതിയ റിലേഷൻഷിപ്പ് ഡൈനാമിക്‌സാണ് ഇന്നത്തെ യുവത്വം പിൻതുടരുന്നത്. കൂടെത്തന്നെ വേണം, എല്ലാ കാര്യങ്ങളും ഒരുമിച്ച് മാത്രം ചെയ്യണം എന്ന പഴയകാല 'അറ്റാച്ച്‌മെന്റ്' രീതികളിൽ നിന്ന് മാറി, പങ്കാളികൾക്കിടയിൽ വ്യക്തമായ അതിരുകൾക്കും വ്യക്തിഗത വളർച്ചയ്ക്കും മുൻഗണന നൽകുന്ന രീതിയാണ് ജെൻസീ സ്വീകരിക്കുന്നത്.

To advertise here,

സ്വന്തം 'സ്‌പേസ്' പ്രധാനം

മുൻതലമുറകളിൽ പലപ്പോഴും പ്രണയത്തിലാകുക എന്നാൽ രണ്ട് വ്യക്തികൾ ഒന്നായി മാറി സ്വന്തം ആഗ്രഹങ്ങളും സ്വപ്നങ്ങളും പങ്കാളിക്കായി മാറ്റിവെക്കുക എന്നതായിരുന്നു സങ്കൽപ്പം. ഒരുമിച്ചുകാണുന്ന സ്വപ്‌നങ്ങൾക്കായി ഒന്നിച്ചു പ്രയത്‌നിക്കാനായിരുന്നു അവരുടെ മുൻഗണന.എന്നാൽ ജെൻസീയെ സംബന്ധിച്ചിടത്തോളം പ്രണയമെന്നത് രണ്ട് സ്വതന്ത്ര വ്യക്തികൾ തമ്മിലുള്ള ആരോഗ്യകരമായ ഒരു കൂട്ടുകെട്ടാണ്. അവിടെ ഒരാളുടെയും വ്യക്തിത്വം,

തങ്ങളുടെ ഹോബികൾ, കരിയർ ലക്ഷ്യങ്ങൾ, സൗഹൃദങ്ങൾ, മീ ടൈം എന്നിവ പ്രണയത്തിൽപ്പെട്ടാലും ഉപേക്ഷിക്കാൻ ഇവർ തയ്യാറല്ല. പങ്കാളിയോടൊപ്പം സമയം ചിലവഴിക്കുന്നതുപോലെ തന്നെ പ്രധാനമാണ് തങ്ങൾക്കായി മാത്രം കുറച്ച് സമയം മാറ്റിവെക്കുന്നതും എന്ന കാര്യത്തിൽ അവർക്ക് വ്യക്തതയുണ്ട്.ഇത് പ്രണയത്തിൽ നിന്ന് അകന്നുപോകുന്നതിന്റെ ലക്ഷണമല്ല, മറിച്ച് ആ ബന്ധം കൂടുതൽ കാലം ആരോഗ്യകരമായി നിലനിൽക്കാൻ ആവശ്യമായ ഇവർ വിശ്വസിക്കുന്നു.

ബൗണ്ടറി അകൽച്ചയല്ല

മുൻകാലങ്ങളിൽ ബന്ധങ്ങളിൽ 'ബൗണ്ടറികൾ' അഥവാ പരിധികൾ നിശ്ചയിക്കുന്നത് പങ്കാളിയോടുള്ള സംശയമായോ അല്ലെങ്കിൽ അകൽച്ചയുടെ തുടക്കമായോ തെറ്റിദ്ധരിക്കപ്പെട്ടിരുന്നു. എന്നാൽ ജെൻസീ തലമുറ ബൗണ്ടറികളെ കാണുന്നത് പരസ്പര ബഹുമാനത്തിന്റെയും പക്വതയുടെയും ലക്ഷണമായിട്ടാണ്.രണ്ടുപേരുടെയും ഇമോഷണൽ നീഡ്‌സ്, കമ്മ്യൂണിക്കേഷൻ ശൈലികൾ, വ്യക്തിപരമായ കാര്യങ്ങളിലെ സ്വാതന്ത്ര്യം എന്നിവയെക്കുറിച്ച് തുറന്നു സംസാരിക്കാനും വ്യക്തമായ അതിരുകൾ നിശ്ചയിക്കാനും ഇവർ മടിക്കാറില്ല. 'നിന്നെ ഞാൻ സ്‌നേഹിക്കുന്നു, എന്നാൽ നിന്റെ സാന്നിധ്യം പോലെ തന്നെ എന്റെ മാനസികാരോഗ്യവുംഎനിക്ക് പ്രധാനമാണ്' എന്ന നിലപാടാണ് ഇവർ സ്വീകരിക്കുന്നത്. ഇത് പങ്കാളികൾ തമ്മിലുള്ള അനാവശ്യമായ തർക്കങ്ങളും മാനസിക സമ്മർദ്ദങ്ങളും ഒഴിവാക്കാൻ ഗുണം ചെയ്യും.

പഴയ 'റിലേഷൻഷിപ്പ് ടൈംലൈനുകളോട്' വിട

പഠനം കഴിയുന്നു, പ്രണയിക്കുന്നു, അടുത്ത ഘട്ടമായി വിവാഹത്തിലേക്ക് കടക്കുന്നു, കുട്ടികളുണ്ടാകുന്നു.തലമുറകളായി തുടർന്നുപോന്ന ഈ പരമ്പരാഗത 'റിലേഷൻഷിപ്പ് ടൈംലൈൻ' പിന്തുടരാൻ ജെൻസീ തയ്യാറല്ല. സമൂഹം നിശ്ചയിച്ച പ്രായത്തിലോ സമയത്തോ വിവാഹിതരാകണം എന്ന ചിന്തയ്ക്ക് പകരം, തങ്ങൾക്ക് എപ്പോഴാണ് അതിന് മാനസികമായും സാമ്പത്തികമായും സജ്ജമാകുന്നത് അപ്പോൾ മാത്രം മുൻപോട്ടു പോകാനാണ് ഇവർ ആഗ്രഹിക്കുന്നത്. വിവാഹം കഴിക്കാതെ കൂടെ ജീവിക്കുന്ന ലിവിങ് ടുഗെദർ, തൽക്കാലം വിവാഹം വേണ്ടെന്നുവെക്കുന്ന രീതികൾ എന്നിവയെല്ലാം ഇവർ വളരെ സാധാരണയായി കാണുന്നു. പങ്കാളിത്തത്തിന്റെ ആഴം അളക്കേണ്ടത് വിവാഹ സർട്ടിഫിക്കറ്റ് കൊണ്ടല്ല, മറിച്ച് ഇരുവർക്കുമിടയിലെ പരസ്പര ധാരണ കൊണ്ടാണെന്നാണ് ഇവർ വിശ്വസിക്കുന്നത്.

മാനസികാരോഗ്യവും തുറന്ന ആശയവിനിമയവും

മാനസികാരോഗ്യത്തിന് ഏറ്റവും കൂടുതൽ പ്രാധാന്യം നൽകുന്ന തലമുറയാണ് ജെൻസീ. അതുകൊണ്ടുതന്നെ 'ടോക്‌സിക്കായ അല്ലെങ്കിൽ സ്വയം നഷ്ടപ്പെടുന്ന തരത്തിലുള്ള ബന്ധങ്ങളിൽ തുടരാൻ ഇവർ ഒട്ടും താല്പര്യപ്പെടുന്നില്ല. തങ്ങളുടെ വികാരങ്ങളെക്കുറിച്ചും ആശങ്കകളെക്കുറിച്ചും പങ്കാളിയോട് തുറന്നു സംസാരിക്കാനും ഇവർ മടിക്കുന്നില്ല.

ബന്ധങ്ങളിൽ ഉണ്ടാകുന്ന പ്രശ്‌നങ്ങൾ പരിഹരിക്കാൻ കൗൺസിലിംഗിനെയോ റിലേഷൻഷിപ്പ് തെറാപ്പികളെയോ സമീപിക്കാനും ഇവർക്ക് യാതൊരു മടിയുമില്ല. പ്രണയം എന്നത് മാറ്റമില്ലാതെ തുടരുന്ന ഒന്നല്ലെന്നും, അത് സമയത്തിനനുസരിച്ച് മാറാമെന്നും, അതിനനുസരിച്ച് സ്വയം മാറാൻ തയ്യാറാകണമെന്നും ഇവർക്ക് തിരിച്ചറിവുണ്ട്.ജെൻസീയുടെ ഈ പുതിയ പ്രണയ സങ്കൽപ്പം സ്വാർത്ഥതയോ ബന്ധങ്ങളോടുള്ള ഭയമോ അല്ല. മറിച്ച്, കൂടുതൽ സുതാര്യവും ആരോഗ്യകരവുമായ ഒരു പങ്കാളിത്തം കെട്ടിപ്പടുക്കാനുള്ള ശ്രമമാണ്. ഒരുമിച്ച് നിൽക്കുമ്പോഴും സ്വന്തം വ്യക്തിത്വത്തിന് നഷ്ടപ്പെടാതെ സൂക്ഷിക്കാൻ സാധിക്കുമെന്നാണ് ഇവർ തെളിയിക്കുന്നത്.