പരമ്പരാഗത ഇന്ത്യൻ വസ്ത്രങ്ങളുടെ ഭംഗിയും ആധുനിക ഫാഷന്റെ പുതുമയും ഒരുമിച്ചാൽ എങ്ങനെയിരിക്കും? ബോളിവുഡ് താരം ഖുഷി കപൂറിന്റെ ഏറ്റവും പുതിയ ദീപാവലി ലുക്ക് അതിനുള്ള ഉത്തരമാണ്. കടുത്ത പർപ്പിൾ നിറത്തിലുള്ള ഗൗണിൽ അതീവ സുന്ദരിയായാണ് താരം മുംബൈയിൽ നടന്ന ദീപാവലി ആഘോഷത്തിനെത്തിയത്. വസ്ത്രത്തിലെ സൂക്ഷ്മമായ എംബ്രോയ്ഡറി വർക്കുകളും വ്യത്യസ്തമായ ഡിസൈനുമാണ് ഫാഷൻ പ്രേമികളുടെ ശ്രദ്ധ പിടിച്ചുപറ്റിയത്. മുംബൈയിൽ നടന്ന ജോ മലോൺ ദീപാവലി ആഘോഷത്തിലാണ് ഖുഷി കപൂർ പങ്കെടുത്തത്. ഫാഷൻ ഡിസൈനർ അർപിത മേത്തയായിരുന്നു പരിപാടിയുടെ സംഘാടക. അർപിത മേത്ത ഡിസൈൻ ചെയ്ത വസ്ത്രമാണ് ഖുഷി തിരഞ്ഞെടുത്തത്. ഇന്ത്യൻ കരകൗശലവിദ്യയുടെ ഭംഗി നിലനിർത്തിക്കൊണ്ടുതന്നെ ആധുനിക ഫാഷന്റെ പ്രത്യേകതകളും ഉൾപ്പെടുത്തിയ വസ്ത്രമായിരുന്നു ഇത്.

To advertise here,

പർപ്പിൾ ഗൗണിലെ പരമ്പരാഗത കരവിരുത്

കടും പർപ്പിൾ നിറത്തിലുള്ള നീളൻ ഗൗണാണ് ഖുഷി ധരിച്ചത്. ഒറ്റനോട്ടത്തിൽ ആധുനിക പാർട്ടി വസ്ത്രമാണെന്ന് തോന്നുമെങ്കിലും ഇന്ത്യൻ പരമ്പരാഗത വസ്ത്രനിർമാണത്തിലെ നിരവധി പ്രത്യേകതകൾ ഇതിലുണ്ട്. പൂക്കളുടെ രൂപത്തിൽ ചെയ്ത മുകൈഷ് വർക്കുകളാണ് വസ്ത്രത്തിന്റെ പ്രധാന ആകർഷണം. ചെറിയ ലോഹക്കഷണങ്ങളോ തിളങ്ങുന്ന നൂലുകളോ ഉപയോഗിച്ച് തുണിയിൽ അലങ്കാരങ്ങൾ തീർക്കുന്ന പരമ്പരാഗത എംബ്രോയ്ഡറി രീതിയാണ് മുകൈഷ് വർക്ക്. വെളിച്ചം പതിക്കുമ്പോൾ തിളങ്ങുന്ന ഈ അലങ്കാരങ്ങൾ വസ്ത്രത്തിന് കൂടുതൽ ഭംഗി നൽകും. ഗൗണിന്റെ അരികുകളിൽ സ്വർണനിറത്തിലുള്ള ലേസ് എംബ്രോയ്ഡറിയും നൽകിയിട്ടുണ്ട്. സൈഡ് സ്ലിറ്റിൽ കണ്ണാടിക്കഷണങ്ങൾ പതിപ്പിച്ച ഹാങ്ങിങ് അലങ്കാരങ്ങളും ഉൾപ്പെടുത്തിയിട്ടുണ്ട്. പാശ്ചാത്യ വസ്ത്രത്തിന്റെ രൂപകൽപനയ്‌ക്കൊപ്പം ഇന്ത്യൻ വസ്ത്രങ്ങളിലെ പരമ്പരാഗത അലങ്കാരങ്ങൾ ചേർത്തതാണ് ഗൗണിനെ വ്യത്യസ്തമാക്കുന്നത്.

ഹാൾട്ടർ നെക്ക്, കട്ട് ഔട്ട് ഡിസൈൻ

ഗൗണിന്റെ കഴുത്തിന്റെ ഭാഗത്തെ ഹാൾട്ടർ നെക്ക് ഡിസൈനും ശ്രദ്ധേയമാണ്. സ്ലീവ്‌ലെസ് ഡ്രസിന്റെ ഇരുവശങ്ങളിലും കട്ട് ഔട്ട് ഡിസൈൻ നൽകിയിട്ടുണ്ട്. ബാക്ക് ഓപ്പൺ രീതിയിലാണ് വസ്ത്രം രൂപകൽപന ചെയ്തിരിക്കുന്നത്. രത്‌നങ്ങൾ പതിപ്പിച്ച സ്ട്രാപ്പുകളും ഇതിന്റെ പ്രത്യേകതയാണ്. ഗൗണിനൊപ്പം പരമ്പരാഗത ഇന്ത്യൻ വസ്ത്രങ്ങളുടെ ഓർമയുണർത്തുന്ന ഷിഫോൺ ദുപ്പട്ടയും താരം ഉപയോഗിച്ചു. സ്വർണനിറത്തിലുള്ള സറി എംബ്രോയ്ഡറിയും അരികുകളിൽ കണ്ണാടികൾ പതിപ്പിച്ച അലങ്കാരങ്ങളുമുള്ള ദുപ്പട്ടയാണ് തിരഞ്ഞെടുത്തത്. ആധുനിക ഗൗണിനൊപ്പം ദുപ്പട്ട ചേർത്തത് വസ്ത്രത്തിന് ഉത്സവാഘോഷങ്ങൾക്ക് അനുയോജ്യമായ ഭംഗി നൽകി.

ആഭരണങ്ങളിലും പർപ്പിൾ നിറത്തിന്റെ സാന്നിധ്യം

വസ്ത്രത്തിന് ചേരുന്ന ആഭരണങ്ങളാണ് ഖുഷി തിരഞ്ഞെടുത്തത്. പർപ്പിൾ നിറത്തിലുള്ള വലിയ കല്ല് പതിപ്പിച്ച സ്വർണ ചോക്കർ നെക്ലേസായിരുന്നു പ്രധാന ആകർഷണം. പൂക്കളുടെ ആകൃതിയിലുള്ള സ്വർണ കമ്മലുകളും ശ്രദ്ധേയമായ മോതിരങ്ങളും ഇതിനൊപ്പം അണിഞ്ഞു. വസ്ത്രത്തിൽ ധാരാളം എംബ്രോയ്ഡറി വർക്കുകൾ ഉണ്ടായിരുന്നതിനാൽ ആഭരണങ്ങൾ അമിതമായി ഉപയോഗിക്കാതിരിക്കാൻ താരം ശ്രദ്ധിച്ചു. ഇതോടെ ഗൗണിന്റെ ഡിസൈനും നിറവും കൂടുതൽ എടുത്തുനിന്നു. സ്വർണനിറത്തിലുള്ള എംബ്രോയ്ഡറി ചെയ്ത പോട്‌ലി ബാഗും സ്വർണനിറത്തിലുള്ള ഹൈഹീൽ ചെരിപ്പുകളും ലുക്കിന്റെ ഭാഗമായി.

മിനിമൽ മേക്കപ്പ്

വസ്ത്രത്തിലെ അലങ്കാരങ്ങൾക്ക് പ്രാധാന്യം നൽകുന്ന രീതിയിലായിരുന്നു ഖുഷിയുടെ മേക്കപ്പ്. നേർത്ത ഐലൈനർ, മസ്‌കാര, മൃദുവായ സ്‌മോക്കി ഐഷാഡോ എന്നിവയും ഉപയോഗിച്ചു.

കവിളുകളിൽ നേരിയ പിങ്ക് ബ്ലഷും ഹൈലൈറ്ററും നൽകി. ചുവപ്പും തവിട്ടും കലർന്ന തിളക്കമുള്ള ലിപ്സ്റ്റിക്കാണ് ഖുഷിയണിഞ്ഞത്.മുടി നടുവിൽ വകഞ്ഞ് പിന്നിലേക്ക് ഒതുക്കിക്കെട്ടിയ ടോപ് നോട്ട് ഹെയർസ്‌റ്റൈലാണ് താരം തിരഞ്ഞെടുത്തത്. ആഭരണങ്ങളും വസ്ത്രത്തിന്റെ കഴുത്തിലെ ഡിസൈനും വ്യക്തമായി കാണാൻ ഈ ഹെയർസ്‌റ്റൈൽ സഹായിച്ചു.