ഫാഷൻ പരീക്ഷണങ്ങളിൽ പ്രായം ഒരിക്കലും ഒരു പരിമിതിയല്ലെന്ന് വീണ്ടും തെളിയിക്കുകയാണ് ഹോളിവുഡ് ഗായികയും നടിയുമായ ജെന്നിഫർ ലോപ്പസ്. ശരീരം വെളിപ്പെടുത്തുന്ന സുതാര്യമായ ബോഡിസ്യൂട്ടും അതിനൊപ്പം വ്യത്യസ്തമായ ജാക്കറ്റും അണിഞ്ഞാണ് താരം ഇത്തവണ ശ്രദ്ധ നേടിയത്. ന്യൂയോർക്ക് സിറ്റിയിൽ നടന്ന സിറിയസ് എക്‌സ്എമ്മിന്റെ ഫ്രണ്ട് റോ അഭിമുഖ പരിപാടിയിലായിരുന്നു ജെന്നിഫറിന്റെ വേറിട്ട ഫാഷൻ അവതരണം.57-ാം വയസ്സിലും പരീക്ഷണാത്മകമായ വസ്ത്രധാരണത്തിലൂടെ ഫാഷൻ ലോകത്തെ വിസ്മയിപ്പിക്കുന്ന താരം, മാർക് ജേക്കബ്‌സിന്റെ ഡിസൈനിലുള്ള സുതാര്യമായ ബോഡിസ്യൂട്ടാണ് തിരഞ്ഞെടുത്തത്. റെട്രോ ഫാഷനും 1970-കളിലെ ബൊഹീമിയൻ ശൈലിയും ആധുനിക ഗ്ലാമറും ഒരുമിപ്പിച്ച ലുക്കായിരുന്നു ഇത്.

To advertise here,

also read  : 'എന്റെ നിഘണ്ടുവിൽ തോൽവി എന്ന വാക്കില്ല'; വോഗ് വേദിയിൽ ആൻസി സോജൻ 

ജാക്കറ്റും സുതാര്യമായ ബോഡിസ്യൂട്ടും

ജെന്നിഫറിന്റെ ലുക്കിലെ ഏറ്റവും ശ്രദ്ധേയമായ ഘടകം കടും ചോക്ലേറ്റ് ബ്രൗൺ നിറത്തിലുള്ള അലങ്കാരപ്പണികളോടുകൂടിയ ജാക്കറ്റാണ്. മുൻവശത്ത് വലിപ്പമേറിയ പൂക്കളുടെ രൂപത്തിലുള്ള അലങ്കാരങ്ങളും ഫ്രിൽ വർക്കുകളും ജാക്കറ്റിന് പ്രത്യേക ഭംഗി നൽകുന്നു. ചെമ്പിന്റെയും വെങ്കലത്തിന്റെയും നിറത്തിലുള്ള എംബ്രോയ്ഡറിയും ത്രിമാന രൂപത്തിലുള്ള പൂക്കളും തോളിലും നെഞ്ചിന്റെ ഭാഗത്തും നൽകിയിട്ടുണ്ട്. ജാക്കറ്റിനുള്ളിൽ തിളക്കമുള്ള എമറാൾഡ് ഗ്രീൻ നിറത്തിലുള്ള ടോപ്പും അതിനടിയിൽ പ്ലം പർപ്പിൾ നിറത്തിലുള്ള സുതാര്യമായ ബോഡിസ്യൂട്ടുമാണ് താരം അണിഞ്ഞത്. ശരീരത്തോട് ചേർന്നുനിൽക്കുന്ന ഫിറ്റിങ്ങും ഉയർന്ന കട്ടിലുള്ള ലെഗ് ഓപ്പണിങ്ങുമാണ് ബോഡിസ്യൂട്ടിന്റെ പ്രത്യേകത. അധികം അലങ്കാരപ്പണികളില്ലാത്ത ഡിസൈൻ അതിന്റെ സുതാര്യമായ ഫാബ്രിക്കിന് കൂടുതൽ ലുക്ക് നൽകുന്നു.

also read : വസ്ത്രം പാകമാകാൻ ലിംഫാറ്റിക് ഡ്രെയിനേജ് മസാജ് ചെയ്തു; വെളിപ്പെടുത്തലുമായി അനന്യ പാണ്ഡെ

അരയിലെ ചെയിൻ; ലുക്കിലെ താരം

വസ്ത്രത്തിനൊപ്പം തിരഞ്ഞെടുത്ത ആക്‌സസറികളും ശ്രദ്ധേയമാണ്. കടും പ്ലം നിറത്തിലുള്ള പോയിന്റഡ് ടോ പമ്പ്‌സ് ഷൂസാണ് അണിഞ്ഞത്. മെറ്റാലിക് ടർക്കോയ്‌സ് നിറത്തിലുള്ള സിലിണ്ടർ ആകൃതിയിലുള്ള പ്രത്യേക ആക്‌സസറിയും ലുക്കിന് മാറ്റുകൂട്ടി. കഴുത്തിനോട് ചേർന്നുകിടക്കുന്ന ചെറിയ സ്വർണനിറത്തിലുള്ള നെക്ലേസാണ് ആഭരണങ്ങളിൽ ഒന്ന്. എന്നാൽ ലുക്കിലെ പ്രധാന ആകർഷണം അരയിൽ അണിഞ്ഞ മൾട്ടി ലെയേർഡ് ചെയിനാണ്. വെള്ളിയുടെയും സ്വർണത്തിന്റെയും നിറത്തിലുള്ള അലങ്കാരങ്ങളും താഴേക്ക് തൂങ്ങിക്കിടക്കുന്ന ചെറിയ മെറ്റാലിക് ഘടകങ്ങളും ചേർന്ന ചെയിൻ വസ്ത്രത്തിന് വിന്റേജ് ബൊഹീമിയൻ ഭംഗി നൽകുന്നു.

മേക്കപ്പും ഹെയർസ്‌റ്റൈലും സിംപിൾ

വസ്ത്രത്തിൽ ധാരാളം നിറങ്ങളും അലങ്കാരങ്ങളും ഉള്ളതിനാൽ മേക്കപ്പിൽ അധികം പരീക്ഷണങ്ങൾക്ക് താരം മുതിർന്നില്ല. നീളമുള്ള മുടി സ്‌ട്രെയ്റ്റ് ചെയ്ത് ലെയേർഡ് സ്‌റ്റൈലിലാണ് ഒരുക്കിയത്. ചർമത്തിന് തിളക്കം നൽകുന്ന ഡ്യൂവി മേക്കപ്പാണ് തിരഞ്ഞെടുത്തത്. ബ്രൗൺ, വെങ്കല നിറങ്ങളിലുള്ള ഐഷാഡോ, കൃത്യമായി വരച്ച ഐലൈനർ, കട്ടിയുള്ള കൺപീലികൾ എന്നിവ കണ്ണുകൾക്ക് കൂടുതൽ ഭംഗി നൽകി. ബ്രൗണിഷ് ന്യൂഡ് ലിപ്സ്റ്റിക്കാണ് ചുണ്ടുകളിൽ ഉപയോഗിച്ചത്.