താമരത്തേരോട്ടത്തിന് തടയിടാൻ എന്താണ് 2024-ൽ കോൺഗ്രസിന്റെ പൂഴിക്കടകൻ?

എന്നാൽ, ദക്ഷിണേന്ത്യയിലെ രീതിയല്ല അങ്ങ് ഉത്തേരേന്ത്യൻ സംസ്ഥാനങ്ങളിൽ കോൺ​ഗ്രസ് പഴറ്റിയത്. തീവ്രഹിന്ദുത്വയെ മൃദുഹിന്ദുത്വം കൊണ്ട് നേരിടാനുള്ള ശ്രമത്തിൽ പാർട്ടിക്ക് കെെപൊള്ളി. പതിറ്റാണ്ടുകളായി ബി.ജെ.പിയുടെ തിരഞ്ഞെടുപ്പ് ആവനാഴിയിലെ ഏറ്റവും വലിയ ആയുധമാണ് രാമക്ഷേത്ര നിർമാണം. തീർഥാടനസൗകര്യമൊരുക്കുന്നതിന്റെ കാര്യത്തിൽ യു.പിയിലെ ഭക്തർക്കു ലഭിക്കുന്ന എല്ലാ ആനുകൂല്യങ്ങളും മധ്യപ്രദേശിലെ വോട്ടർമാർക്ക് ലഭിക്കുമെന്ന് അമിത് ഷാ നേരിട്ട് വന്ന് ഉറപ്പുനൽകി. എന്നാൽ, 'ബാബരിയുടെ താഴുകൾ തുറന്നത് രാജീവാ'ണെന്നായിരുന്നു കമൽനാഥിന്റെ പ്രതികരണം. മതേതരകക്ഷികളുമായി ചേർന്ന് രാജ്യത്തിന്റെ ജനാധിപത്യം സംരക്ഷിക്കാനൊരുങ്ങുന്ന കോൺ​ഗ്രസിൽ നിന്നും ഉയർന്ന വാദമാണിതെന്ന് നോക്കണം. ദക്ഷിണേന്ത്യൻ സംസ്ഥാനങ്ങളിൽ നെഹ്രുവിയൻ രാഷ്ട്രീയം മുന്നോട്ടുവയ്ക്കുന്ന കോൺ​ഗ്രസ് ഉത്തരേന്ത്യയിലെത്തുമ്പോൾ കളം മാറ്റി ചവിട്ടുന്നെന്ന ആരോപണം അരക്കിട്ടുറപ്പിക്കുന്നതാണ് ഇത്തരം പ്രസ്താവനകൾ. 

ലോക്സഭാ തിരഞ്ഞെടുപ്പിന് മുന്നോടിയായി സാഹചര്യം അനുകൂലമാക്കണമെങ്കിൽ കോൺ​ഗ്രസ് ഏറെ വിയർപ്പൊഴുക്കേണ്ടി വരും. കേരളവും, തമിഴ്നാടും ബി.ജെ.പി വിരുദ്ധ സംസ്ഥാനങ്ങളായി തുടരുമെന്ന് തന്നെ കരുതാം. ഇരുസംസ്ഥാനങ്ങളിലുമായി 59 സീറ്റുകളുണ്ട് ലോക്സഭയിൽ. തമിഴ്നാട്ടിൽ സ്റ്റാലിന്റെ നില സുരക്ഷിതമാണ്. കേരളത്തിൽ ഇത്തവണ 19-1 പോലെ തരം​ഗമൊന്നുമുണ്ടായില്ലെങ്കിലും സീറ്റ് ബി.ജെ.പിയിലേക്ക് പോകില്ലെന്ന ആത്മവിശ്വാസം കോൺ​ഗ്രസിനുണ്ട്. 

നിലവിലെ അനുകൂല സാഹചര്യം തുടർന്നാൽ കർണാടകയും തെലങ്കാനയും കോൺ​ഗ്രസിന് കൂടുതൽ സീറ്റുകൾ നൽകിയേക്കാം. എന്നിരുന്നാലും, നിലവിലെ ബി.ജെ.പിയുടെ തേരോട്ടത്തിൽ നിയമസഭാ തിരഞ്ഞെടുപ്പിലെ സാഹചര്യം ലോക്സഭയിൽ തുടരാനാകുമോ എന്ന ഭയവും പാർട്ടിക്കുണ്ട്. സംസ്ഥാനഭരണം തങ്ങളുടെ കെെപ്പിടിയിലൊതുക്കിയെങ്കിലും അത്ര എളുപ്പമായിരിക്കില്ല ലോക്സഭയിൽ സ്ഥിതി. ആന്ധ്രയിൽ വെെ.എസ് ജ​ഗന്റെ പ്രതാപത്തിന് കാര്യമായ പരിക്കുകളില്ലാത്തിടത്തോളം വൈഎസ്ആര്‍ കോണ്‍ഗ്രസ് തന്നെ സംസ്ഥാനത്ത് അധീശത്വം തുടരും. ഒഡിഷയിലും സ്ഥിതി അനുകൂലമായേക്കാം. 

ദക്ഷിണേന്ത്യ ഭദ്രമായി കോൺ​ഗ്രസിനൊപ്പം തുടരുമ്പോഴും ചോദ്യചിഹ്നമാകുന്നത് മധ്യ, ഉത്തരേന്ത്യൻ സംസ്ഥാനങ്ങളാണ്. ബിഹാർ നിതീഷിലൂടെയും ബം​ഗാൾ മമതയിലൂടെയും പിടിക്കാനാകുമെന്ന് കോൺ​ഗ്രസ് കരുതുന്നുണ്ട്. മഹാരാഷ്ട്രയിലെ 48 സീറ്റുകളും പ്രധാനമാണ്. ഡൽഹിയിലും പഞ്ചാബിലും ആം ആദ്മി പാർട്ടിയുടെ തീരുമാനം നിർണായകമാണ്. സഖ്യത്തിൽ ഏതെങ്കിലും തരത്തിലുള്ള വിള്ളലുണ്ടായാൽ ഡൽഹി കോൺ​ഗ്രസിന് കെെവിട്ടുപോകും. 

ഇന്ത്യാ സഖ്യത്തിലെ പ്രധാനികളെല്ലാം കേന്ദ്രം ഭരണം രൂപീകരിക്കുന്നതിനാവശ്യമായ സംഖ്യ ഉറപ്പ് നൽകുമ്പോഴും ഹിന്ദി ഹൃദയഭൂമിയിലെ കോൺ​ഗ്രസിന്റെ പ്രകടനം ഏത് വിധത്തിലായിരിക്കുമെന്നതാണ് പാർട്ടി നേതൃത്വത്തെ കുഴക്കുന്നത്. 150-നടുത്ത് സീറ്റുകളുണ്ട് ഹിന്ദി ഹൃ​ദയഭൂമിയിൽ. കോൺ​ഗ്രസും ബി.ജെ.പിയും തമ്മിൽ നേരിട്ടുള്ള പോരാട്ടമാണ് ഇവിടങ്ങളിൽ. തങ്ങളാൽ ഒരു ഉറപ്പും നൽകാനാവാത്ത നിലയിലാണ് കോൺ​ഗ്രസ് ഇവിടങ്ങളിലുള്ളതെന്നതാണ് സഖ്യം നേരിടുന്ന പ്രധാന വെല്ലുവിളി. 

ജോഡോ യാത്രയും സനാതന ധർമവും 
ഭാരത് ജോഡോ കോൺ​ഗ്രസ് പ്രവർത്തകർക്കേകിയ ഊർജ്ജം ചില്ലറയല്ല. നിരന്തര തോൽവികളിൽ വീണുകിടന്ന പാർട്ടിയെ തിരികെ ഉയർത്തെഴുന്നേൽപ്പിക്കാനുള്ള ദൗത്യവുമായി അവർക്ക് മുന്നിൽ പക്വതയുള്ള നേതാവായി രാഹുൽ സംസാരിച്ചു. ഭരണഘടനയുടെ മൂല്യങ്ങളും മതേതര ചിന്താ​ഗതിയും രാഹുൽ ഉയർത്തിപ്പിടിച്ചപ്പോൾ ജനാധിപത്യ വിശ്വാസികളും രാഹുലിനൊപ്പം അണിനിരന്നു. പിന്നാലെ, കർണാടക കൂടെ അനുകൂലമായതോടെ പാർട്ടി തിരിച്ചുവരവിന്റെ പാതയിലാണെന്ന് പ്രവർത്തകർ വിശ്വസിച്ചു. കർണാടകയ്ക്ക് പിന്നാലെ കേന്ദ്രവും തങ്ങൾക്കൊപ്പം ഇങ്ങ് പോരുമെന്ന് അവർ സ്വപ്നം കണ്ടു. എന്നാൽ, മാസങ്ങൾക്കിപ്പുറം അവർ തിരിച്ചറിയുന്നുണ്ടാകാം, ആ ലക്ഷ്യം എത്ര അകലെയാണെന്ന്.  

ജോഡോ യാത്രയ്ക്ക് പിന്നാലെ അനുകൂലമായിരുന്ന നിരവധി സാഹചര്യങ്ങൾ നിലനിർത്തിക്കൊണ്ടുപോകാൻ കോൺ​ഗ്രസിന് സാധിച്ചില്ല. മുന്നോട്ട് വച്ച വിഷയങ്ങളുടെ മെറിറ്റ് വോട്ടാക്കി മാറ്റാൻ ഇനിയും കോൺ​ഗ്രസിന് സാധിച്ചിട്ടില്ല. ജാതി സെൻസസ് മുതൽ സനാതന ധർമം വരെയുള്ള വിഷയങ്ങളിൽ സഖ്യത്തിനുള്ളിൽ തന്നെ ഭിന്നാഭിപ്രായങ്ങളുണ്ടായിരുന്നു എന്നതും ശ്രദ്ധേയമാണ്. 

ജാതി സെൻസസുമായി ബന്ധപ്പെട്ട വിഷയത്തിൽ കണക്കുകൾ നൽകാത്തത് കോൺ​ഗ്രസായിരുന്നുവെന്നായിരുന്നു അഖിലേഷ് യാദവിന്റെ പരിഹാസം. അവർ തിരഞ്ഞുകൊണ്ടിരിക്കുന്ന വോട്ട് അവരുടെ കൂടെ ഇല്ല എന്ന് കോൺഗ്രസിന് ബോധ്യപ്പെട്ടിരിക്കുന്നു. വെറും വോട്ടിന് വേണ്ടിയുള്ള പ്രഹസനമാണ് കോൺ​ഗ്രസ് നടത്തുന്നതെന്നും യാദവ് ആഞ്ഞടിച്ചു. ഉദയനിധി സ്റ്റാലിന്റെ സനാതന വിവാദവും തിരിച്ചടിച്ചു. പ്രസ്താവന നിമിഷനേരംകൊണ്ട് ബി.ജെ.പി ഐ.ടി സെൽ ഏറ്റെടുത്തു. മോദി മുതൽ അമിത് ഷാ വരെയുള്ളവർ വിഷയത്തിൽ പ്രതികരിച്ചു. 

തിരഞ്ഞെടുപ്പിന് ദിവസങ്ങൾക്ക് മുൻപാണ് രാഹുലിന്റെ പനൗതി പരാമർശം കൂടെയുണ്ടാകുന്നത്.  ദുശ്ശകുനം സ്റ്റേഡിയത്തിൽ എത്തിയതോടെ ഇന്ത്യ ലോകകപ്പ് ഫെെനൽ പരാജയപ്പെട്ടുവെന്ന് രാജസ്ഥാനിലെ തിരഞ്ഞെടുപ്പ് റാലിക്കിടെ രാഹുൽ കത്തിക്കയറി. അധികം വെെകാതെ തന്നെ തനിക്കു നാക്കു പിഴച്ചെന്ന് രാഹുൽ തിരിച്ചറി‍ഞ്ഞിട്ടുണ്ടാകാം. പ്രധാനമന്ത്രിയെ അധിക്ഷേപിച്ചുവെന്ന് ചൂണ്ടിക്കാട്ടി വിഷയം പ്രചരിപ്പിക്കുന്നതിന് വലതുപക്ഷ പ്രൊഫെെലുകൾക്ക് അധികം തലപുകയ്ക്കേണ്ടി വന്നില്ല. 

Rahul Gandhi, Sonia Gandhi | Photo: AFP

അവകാശവാദവുമായി നിതീഷ്, അടങ്ങിയിരിക്കുമോ മമത?
പ്രതിപക്ഷ സഖ്യത്തിന്റെ ശിൽപിയാണ് നിതീഷ്, വള്ളം കരയ്ക്കടുപ്പിക്കാൻ അദ്ദേഹത്തിന് മാത്രമേ സാധിക്കുകയുള്ളൂ. തിരഞ്ഞെടുപ്പ് ഫലത്തിന് പിന്നാലെ ജെ.ഡി.യു സംസ്ഥാന ജനറൽ സെക്രട്ടറി നിഖിൽ മണ്ഡൽ എക്സിൽ കുറിച്ച വാക്കുകളാണിത്. ഏറെ വെെകിയില്ല, ഫലം ഭാവിയിലേക്കുള്ള സന്ദേശമാണെന്ന് ചൂണ്ടിക്കാട്ടി ബിഹാർ മന്ത്രി വിജയ് കുമാർ ചൗധരിയും രം​ഗത്തെത്തി. ഒട്ടും അപ്രതീക്ഷിതമല്ലായിരുന്നു ഇത്തരം പ്രസ്താവനകൾ. കോൺ​ഗ്രസ് വീഴുന്നിടത്ത് ആദ്യം ഉയരുന്ന ചോദ്യം ഇന്ത്യ മുന്നണിയുടെ നേതൃത്വത്തെക്കുറിച്ചാണെന്ന നല്ല ബോധ്യമുണ്ട് നിതീഷ് കുമാറിന്. സഖ്യം അധികാരത്തിലേറിയാൽ പ്രധാനമന്ത്രിപദം ആരലങ്കലിക്കുമെന്ന ചോദ്യത്തിലേക്കുള്ള ചെറിയ സൂചനകളായിരിക്കണം ജെ.ഡി.യു ലക്ഷ്യം വയ്ക്കുന്നത്. 

എന്നാൽ വിചാരിക്കുന്നത്ര എളുപ്പമായിരിക്കില്ല നിതീഷിന് കാര്യങ്ങൾ. സ്ത്രീകൾ വിദ്യാഭ്യാസം നേടുമ്പോൾ ജനസംഖ്യാനിരക്ക് കുറയുന്നുവെന്ന നിതീഷിന്റെ പരാമർശം ഏറെ വിമർശനങ്ങൾക്ക് വഴിവച്ചിരുന്നു. വിഷയത്തിൽ ക്ഷമാപണവുമായി നിതീഷ് രം​ഗത്തെത്തിയെങ്കിലും വിവാദം കെട്ടടങ്ങിയില്ല. സഖ്യത്തിന്റെ നേതൃത്വത്തിലേക്ക് നിതീഷ് വരുന്നത് രാജ്യത്ത് സ്ത്രീ വോട്ടർമാരിലും ചെറുപ്പക്കാരിലും ഏത് രീതിയിൽ പ്രതിഫലിക്കുമെന്നതും ചോദ്യചിഹ്നമാണ്. ആർ.ജെ.ഡി., ജെ.ഡി.യു ആഭ്യന്തകലഹമാണ് അദ്ദേഹം നേരിടുന്ന മറ്റൊരു പ്രധാന പ്രശ്നം. തേജസ്വി യാദവിനെ സംസ്ഥാനത്തിന്റെ മുഖ്യമന്ത്രിപദത്തിലേക്കെത്തിക്കാനുള്ള ആർ.ജെ.ഡി ശ്രമം നിതീഷിന് വലിയ വെല്ലുവിളി ഉയർത്തുന്നുണ്ട്. വിഷയം രൂക്ഷമായാൽ പാർട്ടി പിളർപ്പിലേക്ക് നീങ്ങിയേക്കാമെന്ന ബോധ്യവും അദ്ദേഹത്തിനുണ്ട്. 

ആഭ്യന്തര കാര്യങ്ങളിൽ സമവാക്യത്തിലെത്തിയാലും മമതാ ബാനർജിയെന്ന വൻ വെല്ലുവിളി നിതീഷിന് മറികടക്കാനാകുമോ എന്നത് കണ്ടറിയണം. 42 ലോക്സഭാ സീറ്റുകളുണ്ട് ബം​ഗാളിൽ. അത്ര വേ​ഗം തള്ളിക്കളയാനാകില്ല മമതയെ. നിലവിലെ സാഹചര്യം പരിശോധിക്കുമ്പോൾ ജനസ്വാധീനത്തിൽ നിതീഷിനേക്കാളും ഒട്ടും പിറകിലല്ല മമത. അല്ലെങ്കിൽ, രാജ്യത്തെ മൊത്തം ചിത്രം കണക്കിലെടുക്കുമ്പോൾ ഒരു നേതാവെന്ന നിലയിലെ താരപരിവേഷത്തിൽ ഒരുപടി മുമ്പിൽ തന്നെയാണ് മമത.

ഉൾപ്പാർട്ടി കലഹങ്ങളും നീരസങ്ങളും പറഞ്ഞുതീർത്ത് ഒന്നിത്തുനീങ്ങാനുള്ള തീരുമാനത്തിലാണ് ആറാം തീയതിയിലെ  ‘ഇന്ത്യ’ സഭാനേതാക്കളുടെ യോഗം അവസാനിച്ചത്. നിലവിലെ തിരിച്ചടിയോടെ സഖ്യം കളമൊഴിഞ്ഞുവെന്ന് ആരും ധരിക്കേണ്ടകില്ലെന്നും നേതൃത്വം വ്യക്തമാക്കുന്നുണ്ട്. യോ​ഗം വെെകുന്നതിൽ പല പ്രമുഖരും തങ്ങളുടെ വിമർശനം ഉന്നയിച്ചു. മമത ബാനർജി കോൺഗ്രസ്സിനെതിരേ ഉന്നയിക്കുന്ന വിമർശനങ്ങൾ ഇന്ത്യയെ ദുർബലപ്പെടുത്തുന്നുവെന്ന് അധീർരഞ്ജൻ ചൗധരിയുടെ പരാമർശത്തിൽ പ്രതിഷേധിച്ച് തൃണമൂൽ യോ​ഗത്തിൽ നിന്നും വിട്ടുനിന്നെങ്കിലും ഇനിയങ്ങോട്ട് സജീവമാകാനുള്ള തീരുമാനത്തിലാണെന്നാണ് നിലവിലെ കണക്കുകൂട്ടൽ. 

പോയ പ്രതാപം തിരിച്ചുപിടിക്കാനുള്ള ശ്രമത്തിലായിരിക്കും കോൺ​ഗ്രസ്. ഭരണഘടനയ്ക്കും മതേതരത്വത്തിനും വേണ്ടിയാണ് പോരാട്ടമെന്ന് ‘ഇന്ത്യ’-യും വ്യക്തമാക്കുന്നുണ്ട്. കോൺ​ഗ്രസ് തങ്ങളുടെ പിടിവാശികൾ മാറ്റി വച്ച് കൃത്യമായ രീതിയിൽ സീറ്റുവിഭജനം നടത്തേണ്ടതുണ്ട്. മുന്നിൽ നിന്നും നയിക്കേണ്ടതും കോൺ​ഗ്രസ് തന്നെയാണ്. വൻമരങ്ങൾ കടപുഴകിയ ഒട്ടനവധി ഉദ്ദാഹരണങ്ങളുണ്ട് ഇന്ത്യൻ രാഷ്ട്രീയത്തിൽ. ഇതേ, പ്രതീക്ഷയിൽ തന്നെയായിരിക്കണം കോൺ​ഗ്രസും ‘ഇന്ത്യ’-യും.