വാർത്താ അവതരണത്തിനിടെ യുവാവിന് പാനിക് അറ്റാക്ക്.  എ.ബി.സി. ന്യൂസ് ബ്രോഡ്കാസ്റ്റ് റിപ്പോർട്ടറായ ഓസ്ട്രേലിയയിൽ സ്വദേശി നേറ്റ് ബ്രെയിനിനാണ് വാർത്ത അവതരണത്തിനിടെ പാനിക് അറ്റാക്ക് ഉണ്ടായത്. ക്വീൻസ്ലാൻഡിലെ കാലാവസ്ഥയേക്കുറിച്ച് റിപ്പോർട്ട് ചെയ്തുകൊണ്ടിരിക്കുന്നതിനിടെയാണ് നേറ്റിന് പാനിക് അറ്റാക്ക് ഉണ്ടായത്. 

To advertise here,

ചൊവ്വാഴ്ച പ്രാദേശികസമയം രാവിലെ 6.30-നായിരുന്നു സംഭവം. തനിക്ക് ശാരീരിക അസ്വാസ്ഥ്യം അനുഭവപ്പെടുന്നുവെന്നും ബ്രേക് എടുക്കുന്നുവെന്നും നേറ്റ് പറയുന്നതിന്റെ വീഡിയോയും പുറത്തുവന്നിട്ടുണ്ട്. തനിക്ക് ഇടയ്ക്ക് പാനിക് അറ്റാക്ക് ഉണ്ടാകുമെന്ന് ചിലർക്കെങ്കിലും അറിയുമായിരിക്കുമെന്നും ഇപ്പോഴത് സംഭവിക്കുകയാണെന്നും നേറ്റ് വീഡ‍ിയോയിൽ പറയുന്നുണ്ട്. 

തുടർന്ന് നേറ്റിനൊപ്പം വാർത്ത അവതരിപ്പിച്ചുകൊണ്ടിരുന്ന ലിസ മില്ലർ ഇടപെടുകയും നേറ്റിന്റെ ആരോ​ഗ്യാവസ്ഥയേക്കുറിച്ച് പങ്കുവെക്കുകയുമായിരുന്നു. നേറ്റ് നേരത്തേയും പാനിക് അറ്റാക്കിനേക്കുറിച്ച് തുറന്നുപറഞ്ഞിട്ടുണ്ടെന്നും പലർക്കും അതിലൂടെ ഈയവസ്ഥയേക്കുറിച്ച് മനസ്സിലാക്കാൻ സാധിച്ചിട്ടുണ്ടെന്നും ലിസ പറഞ്ഞു. ശേഷം ആരോ​ഗ്യം വീണ്ടെടുത്ത നേറ്റ് വാർത്താ അവതരണത്തിലേക്ക് തിരിച്ചെത്തുകയും ചെയ്തു. 

2022-ലും നേറ്റ് പാനിക് അറ്റാക്കിലൂടെ കടന്നുപോകുന്നതിനേക്കുറിച്ച് തുറന്നുപറഞ്ഞിരുന്നു. സ്റ്റുഡിയോയിൽ നിൽക്കവേ നെഞ്ചിടിപ്പ് കൂടുകയും ശ്വാസം കിട്ടാതാവുകയും വിയർക്കുകയും ചെയ്തതിനേക്കുറിച്ചാണ് നേറ്റ് അന്ന് കുറിച്ചത്. ‌

എന്താണ് പാനിക് അറ്റാക്ക്?

പ്രത്യേകിച്ച് കാരണമൊന്നുമില്ലാതെ പൊടുന്നനെ സംഭവിക്കുന്ന, ഏതാനും മിനിറ്റുമാത്രം നീണ്ടുനിൽക്കുന്ന തീവ്രമായ ഉത്കണ്ഠയാണ് ‘പാനിക് അറ്റാക്ക്.’ താഴെപ്പറയുന്ന ലക്ഷണങ്ങളിൽ നാലെണ്ണമെങ്കിലും ഇവര്‍ക്കുണ്ടാകും.

  • അമിതമായ നെഞ്ചിടിപ്പ്
  • നെഞ്ചുവേദനയോ നെഞ്ചിന്റെ ഭാഗത്ത് അസ്വസ്ഥതയോ.
  • ശരീരം വിയർത്തൊലിക്കുന്ന അവസ്ഥ
  • ശ്വാസംമുട്ടൽ
  • കൈകാലുകൾ വിറയ്ക്കുക
  • വിരലുകളുടെ അറ്റം തണുത്ത് മരവിക്കുക
  • വയറ്റിൽ തീവ്രമായ എരിച്ചിൽ
  • തലചുറ്റൽ, തലയ്ക്ക് മന്ദത
  • കണ്ണിൽ ഇരുട്ടുകയറുന്ന അവസ്ഥ
  • തൊണ്ടയിൽനിന്ന് വെള്ളമിറക്കാൻ ബുദ്ധിമുട്ട്
  • ഇപ്പോൾ വീണ് മരിച്ചുപോകുമെന്ന തോന്നൽ
  • മനസ്സിന്റെ സമനില തെറ്റിപ്പോകുമെന്നതരത്തിലുള്ള വെപ്രാളം.

സാധാരണഗതിയിൽ 10 മുതൽ 15 മിനിറ്റ് നേരം മാത്രമേ ഈ പ്രയാസം നീണ്ടുനിൽക്കാറുള്ളൂ. അതുകഴിഞ്ഞ് സ്വാഭാവികമായി ഇതിന്റെ തീവ്രത കുറഞ്ഞുവന്ന് അവസാനിക്കും. എന്നാൽ, ഈ അവസ്ഥയുടെ ലക്ഷണങ്ങൾ പലതും ഹൃദയാഘാതത്തിന്റെ ലക്ഷണങ്ങൾക്ക് സമാനമായതുകൊണ്ടുതന്നെ ഇത് അനുഭവപ്പെടുന്ന ആളുകൾ വല്ലാതെ ഭയപ്പെട്ടുപോകും.

ഒരു മാസക്കാലമെങ്കിലും തുടർച്ചയായി പാനിക് അറ്റാക്ക് ആവർത്തിച്ചുവരുന്ന അവസ്ഥയെയാണ് ‘പാനിക് ഡിസോഡർ’ എന്നു വിശേഷിപ്പിക്കുന്നത്. സമൂഹത്തിൽ ഏകദേശം മൂന്നു ശതമാനത്തോളം ആളുകൾക്ക് പാനിക് ഡിസോഡർ ഉണ്ടെന്ന് കണക്കുകൾ സൂചിപ്പിക്കുന്നു. പുരുഷന്മാരെ അപേക്ഷിച്ച് സ്ത്രീകളിൽ കൂടുതലായി കണ്ടുവരുന്നുമുണ്ട്.

പാരമ്പര്യമായി ഉത്കണ്ഠരോഗങ്ങളുള്ള കുടുംബങ്ങളിൽ ജനിക്കുന്ന വ്യക്തികളിൽ പാനിക് ഡിസോഡർ കൂടുതലായി കണ്ടുവരാറുണ്ട്. ചെറുപ്രായത്തിൽ വളരെ തീവ്രമായ സമ്മർദസാഹചര്യങ്ങളിലൂടെ കടന്നുപോകുന്ന വ്യക്തികളിലും ഇതു കൂടുതലായി കണ്ടുവരാറുണ്ട്. പാനിക് ഡിസോഡറുള്ള വ്യക്തികളുടെ തലച്ചോറിൽ സെറട്ടോണിൻ, നോർ എപ്പി നെഫ്രിൻ, ഗാബാ, എന്നീ രാസവസ്തുക്കളുടെ അളവ് കുറവാണെന്ന് ചില പഠനങ്ങൾ തെളിയിച്ചിട്ടുണ്ട്. കാപ്പി കൂടുതലായി കുടിക്കുന്നവരിലും പുകവലിശീലം ഉള്ളവരിലും ഈ രോഗം കൂടുതലായി കണ്ടുവരാറുണ്ട്. ഉറക്കക്കുറവ്, സമീപകാലത്തുണ്ടായ വേദനാജനകമായ ജിവിതാനുഭവങ്ങൾ എന്നിവയും ഈ അവസ്ഥയിലേക്ക് വഴിതെളിക്കാം.

പരിഹാരം എങ്ങനെ?

മരുന്നുകളും മനശ്ശാസ്ത്രചികിത്സകളും റിലാക്സേഷൻ വ്യായാമങ്ങളും സംയോജിപ്പിച്ച് ഉപയോ​ഗിച്ചാൽ പാനിക് ഡിസോർഡർ പൂർണമായും ചികിത്സിച്ച് ഭേദപ്പെടുത്താൻ സാധിക്കും. തലച്ചോറിൽ ക്രമംതെറ്റിക്കുന്ന രാസവസ്തുക്കളുടെ അളവ് ക്രമീകരിക്കാൻ സഹായിക്കുന്ന സുരക്ഷിതമായ മരുന്നുകൾ ഇന്ന് നിലവിലുണ്ട്. വയോജനങ്ങളിൽപ്പോലും സുരക്ഷികമായി ഉപയോ​ഗിക്കാവുന്ന ഇത്തരം മരുന്നുകൾ വളരെവേ​ഗം രോ​ഗലക്ഷണങ്ങൾ പരിഹരിക്കും. മരുന്നുകളോടൊപ്പം ചിന്താവൈകല്യങ്ങൾ പരിഹരിക്കാൻ സഹായിക്കുന്ന കോ​ഗ്നിറ്റീവ് ബിഹേവിയർ തെറാപ്പി ഏറെ ഫലപ്രദമായ ഒരു മനഃശാസ്ത്രചികിത്സാരീതിയാണ്.

പ്രോ​ഗ്രസീവ് മസിൽ റിലാക്സേഷൻ, ദീർ‌ഘശ്വസനവ്യായാമങ്ങൾ തുടങ്ങിയ റിലാക്സേഷൻ രീതികളും ഇവരിൽ ഏറെ ഫലപ്രദമാണ്. ചായയും കാപ്പിയും കുടിക്കുന്നത് ഒഴിവാക്കുക, ധാരാളം വെള്ളം കുടിക്കുക, ചിട്ടയായ വ്യായാമം ശീലമാക്കുക, മദ്യപാനം, പുകവലി തുടങ്ങിയ ശീലങ്ങൾ ഒഴിവാക്കുക എന്നിവയും പാനിക് ഡിസോർഡർ പൂർണമായും ഭേദപ്പെടാൻ സഹായിക്കുന്ന മാർ​ഗങ്ങളാണ്. ചികിത്സയെടുക്കാത്ത പാനിക് ഡിസോർ‍ഡർ പലപ്പോഴും വിഷാദരോ​ഗം, മദ്യപാനശീലം, ലഹരി അടിമത്തം തുടങ്ങിയ വിഷയങ്ങളിലേക്ക് നയിക്കാം. ഇത് പരിഹാരമില്ലാത്ത ഏതോ മാറാരോ​ഗമാണെന്ന് തെറ്റിദ്ധരിച്ചു വിഷമിക്കുന്ന ധാരാളം ആളുകൾ സമൂഹത്തിലുണ്ട്. വിദ​ഗ്ധനായ ഒരു മാനസികാരോ​ഗ്യ ചികിത്സകന്റെ സഹായത്തോടെ ഈ അനസ്ഥ പൂർണമായും ഭേദപ്പെടുത്താൻ കഴിയും. 

പാനിക് അറ്റാക്ക് സംബന്ധമായ വിവരങ്ങൾക്ക് കടപ്പാട്

ഡോ.അരുൺ ബി നായർ
സൈക്യാട്രിസ്റ്റ്
തിരുവനന്തപുരം മെഡിക്കൽ കോളേജ്