പ്രീഡയബറ്റിസ്; ലക്ഷണങ്ങൾ എന്തെല്ലാം? ചികിത്സ ആവശ്യമാണോ?

അലസമായ ജീവിതശൈലി മൂലം പലയാളുകളുടെയും ജീവിതത്തിൽ വില്ലനായി പ്രമേഹം കണ്ടുവരുന്നുണ്ട്. കൃത്യമായി രോ​ഗം തിരിച്ചറിഞ്ഞ് ചികിത്സ തേടുകയാണ് പ്രധാനം. പ്രീഡയബറ്റിസ് സംബന്ധിച്ച ഒരു ചോദ്യത്തിന് ഉത്തരം നൽകുകയാണ് കോഴിക്കോട് ഇഖ്റ ഹോസ്പിറ്റൽ ഡയബറ്റോളജി വിഭാ​ഗം സീനിയർ കൺസൾട്ടന്റായ ഡോ.എസ്.കെ സുരേഷ് കുമാർ.

ചോദ്യം

ഞാൻ മുപ്പത്തിരണ്ടു വയസ്സുള്ള യുവാവാണ്. വർഷത്തിലൊരിക്കൽ ഷു​ഗർനില പരിശോധിക്കാറുണ്ട്. അങ്ങനെ പരിശോധിച്ചപ്പോഴാണ് ഷു​ഗർ അൽപം കൂടിയതായി കണ്ടത്. പ്രത്യേകിച്ച് ലക്ഷണങ്ങളൊന്നുമുണ്ടായിരുന്നില്ല. ഭക്ഷണത്തിനു മുമ്പാണ് രക്തപരിശോധന നടത്തിയത്. അപ്പോൾ 120 mg/dl എന്നാണ് കണ്ടത്. 

ഡോക്ടറെ കണ്ടപ്പോൾ, ഭക്ഷണശേഷമുള്ള ഷു​ഗർനിലയും പരിശോധിച്ചു. അത് 154 mg/dl ആയിരുന്നു. മരുന്നുകളൊന്നും കഴിക്കാൻ തുടങ്ങിയിട്ടില്ല. എനിക്ക് അമിത ബി.പി.യോ കൊളസ്ട്രോൾ പ്രശ്നങ്ങളോ ഇല്ല. അച്ഛന് അൻപതു വയസ്സ് കഴിഞ്ഞപ്പോൾ മുതൽ പ്രമേഹമുണ്ട്. മരുന്ന് കഴിക്കുന്നുണ്ട്. ഈ ഘട്ടത്തിൽ ഞാൻ മരുന്ന് തുടങ്ങണോ? അല്ലാതെതന്നെ ഷു​ഗർ നോർമലാക്കാൻ കഴിയുമോ?

നിഷാന്ത്

ഉത്തരം

പ്രമേഹമെന്ന ജീവിതശൈലീരോ​ഗം മിന്നൽപ്പിണർപോലെ പൊടുന്നനെ പ്രത്യക്ഷപ്പെടുന്ന ഒന്നല്ല. മറിച്ച് രോ​ഗം സ്ഥിരീകരിക്കാൻ കഴിയുന്നതിനും അഞ്ചുമുതൽ ഏഴുവർഷങ്ങൾക്കു മുമ്പുതന്നെ പ്രമേഹം അതിന്റെ മുന്നൊരുക്കങ്ങൾ ശരീരത്തിൽ തുടങ്ങിയിരിക്കും. 

ആദ്യവർ‌ഷങ്ങളിൽ ഇൻസുലിന്റെ ഉത്പാദനം വർധിപ്പിച്ച് ശരീരം അതിനെ പ്രതിരോധിക്കാൻ ശ്രമിക്കും. അതിനാൽ, രക്തപരിശോധനയിൽ ഷു​ഗർനില നോർമലായിരിക്കും. എന്നാൽ, കാലക്രമേണ ഇൻസുലിൻ ഉത്പാദനം മതിയാകാതെ വരികയും ശരീരത്തിൽ ഇൻസുലിന്റെ പ്രവർത്തനക്ഷമത കുറഞ്ഞുവരുകയും ചെയ്യും. അപ്പോൾ രക്തത്തിൽ ഷു​ഗർനില അൽപാൽപം വർധിക്കും. 

പ്രമേഹരോഹം സ്ഥിരീകരിക്കണമെങ്കിൽ വെറുംവയറ്റിൽ ഷു​ഗർനില 126 mg/dl- ന് മുകളിലോ ആഹാരശേഷം രണ്ടുമണിക്കൂർ കഴിയുമ്പോഴുള്ള ഷു​ഗർനില 200mg/dl-ന് മുകളിലോ വേണം. പ്രമേഹരോ​ഗമില്ലാത്ത വ്യക്തിയിൽ ഷു​ഗർ വെറുംവയറ്റിൽ 100mg/dl-ന് താഴെയും ആഹാരശേഷം രണ്ടുമണിക്കൂറാകുമ്പോൾ 140mg/dl-താഴെയുമാണ് കാണപ്പെടുക. നോർമലിനും പ്രമേഹത്തിനും ഇടയ്ക്കുള്ള അവസ്ഥയെ(ആഹാരത്തിനു മുമ്പ് 101-125mg/dl-, ആഹാരശേഷം 141-199mg/dl-വരെ) പ്രീഡയബറ്റിസ് എന്ന് പറയുന്നു. അപ്പുറവും ഇപ്പുറവുമല്ലാതെ നിൽക്കുന്ന ഈ പ്രീഡയബറ്റിസ് എന്നാൽ ഒരു രോ​ഗാവസ്ഥ തന്നെയാണ്. 

എന്തുകൊണ്ട് രോ​ഗാവസ്ഥ? 

പ്രമേഹരോ​ഗങ്ങളിലേക്ക് നയിക്കുന്ന ആപത്ഘടകങ്ങളിൽ ഏറ്റവും പ്രധാനപ്പെട്ട ഒന്നാണ് പ്രീഡയബറ്റിസ്. ശ്രദ്ധിച്ചില്ലെങ്കിൽ, പ്രീഡയബറ്റിസ് ഉള്ളവരിൽ 75 ശതമാനം പേരിലും മൂന്നുമുതൽ അഞ്ചുവർഷങ്ങൾക്കുള്ളിൽ തന്നെ രോ​ഗം സ്ഥിരീകരിക്കപ്പെടും. പ്രമേഹരോ​ഗികളിൽ കാണപ്പെടുന്ന രോ​ഗസങ്കീർണതകളായ റെറ്റിനോപ്പതി, ന്യൂറോപ്പതി, വൃക്കരോ​ഗം, ഹൃദ്രോ​ഗം, പക്ഷാഘാതം തുടങ്ങിയ പല സങ്കീർണതകളും വരാനുള്ള സാധ്യത പ്രീഡയബറ്റിസ്സുളളവരിൽ കൂടുതലാണ്. 

ലക്ഷണങ്ങൾ എന്തൊക്കെ? 

പ്രമേഹബാധിതരിൽ കാണുമ്പോലെയുള്ള പ്രകടമായ ലക്ഷണങ്ങളൊന്നും ഇവരിൽ കാണാറില്ല. അതുകൊണ്ട് രോ​ഗാവസ്ഥ കണ്ടെത്തുകയെന്നത് ശ്രമകരമാണ്. എന്നാലും അമിതവണ്ണമുള്ളവർ, അടുത്ത ബന്ധുക്കൾക്ക് പ്രമേഹമുള്ളവർ, ​ഗർഭകാല പ്രമേഹമുണ്ടായിരുന്നവർ, പോളിസിസ്റ്റിക് ഓവറി സിൻഡ്രം ഉള്ളവർ, വ്യായാമം ചെയ്യാത്തവർ തുടങ്ങിയവർ ഇടയ്ക്കിടെ രക്തപരിശോധന നടത്തുകയും രോ​ഗാവസ്ഥ ഇല്ലെന്ന് ഉറപ്പാക്കുകയും വേണം. 

ചികിത്സ ആവശ്യമാണോ? 

പ്രീഡയബറ്റിസ് കാലതാമസം കൂടാതെ കണ്ടെത്തുകയും കൃത്യമായി ചികിത്സിക്കുകയും ചെയ്യുകയാണെങ്കിൽ പകുതിയിലധികം പേരിലും പ്രമേഹരോ​ഗത്തിലേക്കുള്ള പ്രയാണം തടയാനോ വൈകിപ്പിക്കാനോ കഴിയും. അനേകംലക്ഷംപേരുടെ രോ​ഗസാധ്യത ചെറുക്കാൻ കഴിയുകയെന്നത് രോ​ഗികൾക്കും കുടുംബത്തിനും മാത്രമല്ല, രാജ്യത്തിനു പോലും ആശ്വാസമായിരിക്കും. 

ജീവിതശൈലിയിൽ വരുത്തുന്ന ​ഗുണകരമായ മാറ്റങ്ങളിലൂടെ ശരീരഭാരം കുറച്ചും നിത്യവ്യായാമം ശീലമാക്കിയുമാണ് ഇത് സാധ്യമാകുന്നത്. അമിത ശരീരഭാരം ഉള്ളവർ ശരീരഭാരം ഏഴ് ശതമാനമെങ്കിലും കുറയ്ക്കാൻ കഴിഞ്ഞാൽത്തന്നെ പലപ്പോഴും ഷു​ഗർനില സാധാരണ​ഗതിയിലെത്തിച്ചേരും. ആ ഷു​ഗർനില ചിലപ്പോൾ വർഷങ്ങളോളം നിലനിർത്താനാകും. ശരീരഭാരം കുറയ്ക്കാൻ എളുപ്പവഴികളൊന്നും തന്നെയില്ല. ആ​ഹാരം ക്രമീകരിച്ചും നിത്യവ്യായാമം ശീലമാക്കിയും മാത്രമേ ഇത് സാധ്യമാവുകയുള്ളു. ദിവസം മുപ്പതുമിനിറ്റെങ്കിലും അനുയോജ്യമായ വ്യായാമത്തിലേർപ്പെടണം. 

ജീവിതശൈലിയിലെ മാറ്റങ്ങൾക്കൊപ്പം മെറ്റ്ഫോർമിൻ എന്ന മരുന്നും ഈ അവസ്ഥയിൽ ചിലപ്പോൾ ഉപയോ​ഗിക്കാറുണ്ട്. പ്രമേഹചികിത്സയിൽ ആരംഭത്തിൽ കൊടുക്കുന്ന മരുന്നാണിത്. സാധാരണയായി ഷു​ഗർനില ആവശ്യത്തിലധികം കുറയ്ക്കാത്ത ഈ മരുന്ന് രോ​ഗപ്രതിരോധത്തിനും ശരീരഭാരം അൽപം കുറയുന്നതിനും ഹൃദ്രോ​ഗം മുതലായ രോ​ഗങ്ങൾ തടയുന്നതിനും സഹായിക്കുന്നു. 

ഷു​ഗർനില സാധാരണ നിലയിലെത്തിക്കുന്നതോടൊപ്പം അമിത രക്തസമ്മർദം, കൊഴുപ്പുകളിലെ വ്യതിയാനം മുതലായവയ്ക്കും ചിലപ്പോൾ ചികിത്സ വേണ്ടിവന്നേക്കാം.