നാരുകളുള്ള കറികൾ ആദ്യം, പായസം ഒഴിവാക്കേണ്ട; പ്രമേഹരോഗികൾക്കും സദ്യ ആസ്വദിക്കാം, ശ്രദ്ധിക്കേണ്ടത്

ഓണം എന്നാൽ കുടുംബവും ആഘോഷവും ഒപ്പം ഒരു നല്ല സദ്യയും കൂടിയാണ്. പ്രമേഹമുള്ളവർക്ക് സദ്യ ഒഴിവാക്കണമെന്നില്ല. അൽപ്പം ആസൂത്രണത്തോടെയാണെങ്കിൽ, ആഘോഷങ്ങൾ ആസ്വദിക്കുകയും അതേസമയം രക്തത്തിലെ പഞ്ചസാരയുടെ അളവ് നിയന്ത്രിക്കുകയും ചെയ്യാം.

സദ്യ എങ്ങനെ ആസ്വദിക്കാം?

ചോറ്, വിവിധയിനം കറികൾ, പപ്പടം, ഉപ്പേരി, അവസാനം പായസം എന്നിവയടങ്ങിയതാണ് സാധാരണ സദ്യ. ഇവയൊന്നും ഒഴിവാക്കണമെന്നല്ല പറയുന്നത് - എത്ര അളവിൽ കഴിക്കുന്നു എന്നതിൽ അൽപ്പം ശ്രദ്ധ വേണം എന്നു മാത്രം. പച്ചക്കറി വിഭവങ്ങളിൽ നിന്ന് തുടങ്ങാം - സദ്യയിൽ സാധാരണയായി ധാരാളം പച്ചക്കറി വിഭവങ്ങൾ ഉണ്ടാകും, ഇവയാണ് നിങ്ങളുടെ ഏറ്റവും വലിയ സഹായി. ശ്രദ്ധിക്കേണ്ട ചില കാര്യങ്ങൾ:

• പ്ലേറ്റിൽ ഏറ്റവും കൂടുതൽ സ്ഥലം പച്ചക്കറികൾക്കായി മാറ്റിവയ്ക്കുക.
• നാരുകൾ (ഫൈബർ) കൂടുതലുള്ള കറികൾ ആദ്യം കഴിക്കുക.
• ചോറിന്റെ അളവ് മിതമായി സൂക്ഷിക്കുക - ഒരു തവണ മതി.
• ചോറ് വീണ്ടും വീണ്ടും വിളമ്പുന്നത് ഒഴിവാക്കുക.
• ഒരു ചെറിയ കഷണം പപ്പടവും ഒന്നോ രണ്ടോ സ്പൂൺ ഉപ്പേരിയും മതിയാകും.
• തിടുക്കം കൂട്ടാതെ കഴിക്കുക. വയറ് നിറഞ്ഞു എന്ന് ശരീരം തിരിച്ചറിയാൻ കുറച്ച് സമയം കൊടുക്കുക.
• ഭക്ഷണത്തിനു ശേഷം രക്തത്തിലെ ഗ്ലൂക്കോസിന്റെ അളവ് പെട്ടെന്ന് ഉയരാതിരിക്കാൻ നാരുകൾ സഹായിക്കും. അതുകൊണ്ട് ഇത്തരത്തിൽ പ്ലേറ്റ് ക്രമീകരിക്കുന്നത് യഥാർഥത്തിൽ ഗുണം ചെയ്യും - അതേസമയം വിശപ്പ് മാറാതെയും ഇരിക്കില്ല.

പായസത്തിന്റെ കാര്യമോ?

പായസം കഴിക്കാം, തീർച്ചയായും. പായസം പൂർണമായി ഒഴിവാക്കുന്നത് പലപ്പോഴും തിരിച്ചടിയാകാറുണ്ട് - ആഘോഷഭക്ഷണം ശിക്ഷയായി തോന്നിത്തുടങ്ങും, അത് അധികകാലം നിലനിൽക്കില്ല. പൂർണമായി ഒഴിവാക്കുന്നതിനേക്കാൾ ചെറിയ അളവിൽ കഴിക്കുന്നതാണ് നല്ലത്.

ശ്രദ്ധിക്കേണ്ട ചില കാര്യങ്ങൾ:

• ഒരു ചെറിയ പാത്രം മതി, നിറച്ചു വേണ്ട.
• മൂന്നോ നാലോ തരം പായസം രുചിക്കുന്നതിന് പകരം ഒരു തരം മാത്രം തിരഞ്ഞെടുക്കുക.
• പ്രധാന ഭക്ഷണം പൂർത്തിയാക്കിയ ശേഷം മാത്രം പായസത്തിലേക്ക് കടക്കുക.
• ഒരു തവണ മതി - രണ്ടാമത് വിളമ്പുന്നത് ഒഴിവാക്കുക.
• ഭക്ഷണത്തിനൊപ്പം മധുരപാനീയങ്ങൾക്ക് പകരം വെള്ളം കുടിക്കുക.
• ഓർത്തിരിക്കേണ്ട കാര്യം: എല്ലാ പായസങ്ങളും ഒരുപോലെയല്ല - ചിലതിൽ പഞ്ചസാരയോ പാലോ തേങ്ങാപ്പാലോ ശർക്കരയോ കൂടുതലായിരിക്കും. പരമ്പരാഗത ചേരുവകൾ ഉപയോഗിച്ചാലും, അളവ് തന്നെയാണ് ഏറ്റവും പ്രധാനം.

പിറ്റേ ദിവസം

ഒരു ആഘോഷഭക്ഷണം കൊണ്ട് നിങ്ങളുടെ പുരോഗതി മുഴുവൻ ഇല്ലാതാകില്ല. അധികം തിരുത്താൻ ശ്രമിക്കാതെ, സാധാരണ ജീവിതശൈലിയിലേക്ക് തിരിച്ചെത്തുക എന്നതാണ് കൂടുതൽ പ്രധാനം.

പിറ്റേ ദിവസം രാവിലെ ഇവ ശ്രദ്ധിക്കുക:

• ദിവസം മുഴുവൻ ആവശ്യത്തിന് വെള്ളം കുടിക്കുക.
• പതിവ് ഭക്ഷണസമയത്തിലേക്ക് തിരിച്ചെത്തുക.
• ഭക്ഷണം ലളിതവും സമീകൃതവുമായി സൂക്ഷിക്കുക.
• പച്ചക്കറികളും പ്രോട്ടീനും വീണ്ടും ഭക്ഷണത്തിൽ ഉൾപ്പെടുത്തുക.
• തലേദിവസത്തെ 'നികത്താൻ' വേണ്ടി ഭക്ഷണം ഒഴിവാക്കരുത് അത് പലപ്പോഴും തിരിച്ചടിയാകും.
• പതിവുള്ളതെങ്കിൽ നടക്കുകയോ വ്യായാമം ചെയ്യുകയോ ചെയ്യുക.
• ഡോക്ടർ നിർദേശിച്ച പ്രകാരം പ്രമേഹത്തിനുള്ള മരുന്ന് കൃത്യമായി കഴിക്കുക.
• വീട്ടിൽ രക്തത്തിലെ ഗ്ലൂക്കോസ് പരിശോധിക്കാറുണ്ടെങ്കിൽ, പതിവ് പരിശോധനാ ക്രമം തുടരുക.

കുറ്റബോധമില്ലാതെ ആഘോഷിക്കാം

ഉത്സവങ്ങൾ ആസ്വദിക്കാനുള്ളതാണ്, അതിജീവിക്കാനുള്ളതല്ല. പ്രമേഹമുള്ളവർക്ക് ഇതിനർഥം സദ്യ വേണ്ടെന്നുവയ്ക്കണം എന്നല്ല - ശ്രദ്ധയോടെ ഭക്ഷണം കഴിക്കുകയും അളവ് നിയന്ത്രിക്കുകയും ആഘോഷത്തിനു ശേഷം സാവധാനം പതിവ് ജീവിതശൈലിയിലേക്ക് മടങ്ങുകയും ചെയ്യുക എന്നതാണ്.

സമീകൃതമായ ഒരു പ്ലേറ്റ്, മിതമായ ഒരു പാത്രം പായസം, അൽപ്പം ശാരീരികാധ്വാനം - ആരോഗ്യം കൈവിടാതെ ഓണം ആസ്വദിക്കാൻ ഇത്രയും മതി. ആഘോഷിക്കാം നന്നായി, കഴിക്കാം നന്നായി - ഓരോ പ്ലേറ്റും ശ്രദ്ധയോടെ

 

ഡോ. മോഹൻസ് ഡയബറ്റിസ് സ്പെഷ്യാലിറ്റീസ് സെന്റർ വൈസ്ചെയർമാനാണ് ലേഖകൻ