രുചിമാത്രമല്ല‌‌‌, കുടലിനെ സംരക്ഷിക്കാനും ബെസ്റ്റാണ് പഴങ്കഞ്ഞി;പ്രീ ബയോട്ടിക്കും പ്രോ ബയോട്ടിക്കും

രോ​ഗപ്രതിരോധം എങ്ങനെ മെച്ചപ്പെടുത്താനാകും എന്ന് ചിന്തിച്ചുകൊണ്ടിരിക്കുന്ന ഒരു കാലഘട്ടമാണിത്. ശരീരത്തിലുള്ള പ്രതിരോധത്തിന്റെ പോരാളികളാണ് കുടലിലെ ബാക്ടീരിയകൾ. ഇവയെ സംബന്ധിച്ച പഠനങ്ങൾ ഇന്ന് ശാസ്ത്രലോകം കൗതുകത്തോടെയാണ് നോക്കിക്കാണുന്നത്. കുടലിലെ സൂക്ഷ്മാണുക്കളുടെ വൈവിധ്യം രോ​ഗപ്രതിരോധത്തിന് അടിത്തറ പാകുന്നതാണെന്ന് പഠനങ്ങൾ തെളിയിക്കുന്നു. ​ഗുണകരമായ ഈ സൂക്ഷ്മാണുക്കളെ വളർത്തിയെടുക്കുന്നതിൽ ഭക്ഷണത്തിന്റെ പങ്ക് വളരെ വലുതാണ്. 

ശരീരത്തിന് ​ഗുണകരമായ കുടലിലെ ബാക്ടീരിയകൾ അമ്മയിൽ നിന്ന് നവജാതശിശുക്കളിലേക്ക് കൈമാറ്റം ചെയ്യപ്പെടുന്നു. സാധാരണ സുഖപ്രസവത്തിലൂടെയുള്ള ആരോ​ഗ്യകരമായ സൂക്ഷ്മാണുക്കളുടെ കൈമാറ്റം സിസേറിയൻ പ്രസവത്തേക്കാൾ കൂടുതലാണെന്നാണ് ശാസ്ത്രീയപഠനങ്ങൾ പറയുന്നത്. അതിനാൽ തന്നെ സാധാരണ സുഖപ്രസവരീതികൾ നവജാതശിശുവിന്റെ പ്രതിരോധശേഷി വർധിപ്പിക്കും. 

Also Read

'പ്രമേഹം മാറാൻ ചെറിയ ഗുളികയ്‌ക്കൊപ്പം ഒരു ലഡ്ഡുകൂടി കഴിക്കണം'; വ്യാജചികിത്സകരെ കരുതിയിരിക്കുക !

'വെറും' മുഖക്കുരു എന്ന് കരുതുന്നവ ചിലപ്പോൾ മറ്റുചില ചര്‍മരോഗങ്ങളാകാം; ശ്രദ്ധിക്കണം ഈ കാര്യങ്ങൾ

ഗർഭകാലത്ത് ബി.പി കൂടുന്നത് നിസ്സാരമല്ല,ഗര്‍ഭിണിയാകുന്നതിന് മുന്‍പെ ഇക്കാര്യങ്ങൾ ശ്രദ്ധിക്കാം

ഷർട്ടിന്റെ ബട്ടൻസ് ഇടാൻ പോലും ബുദ്ധിമുട്ടാകുന്ന അവസ്ഥ; ശ്രദ്ധിക്കണം ഈ രോഗത്തെ

രാത്രി വളരെ വൈകി ഉറങ്ങുന്നവരാണോ?; ഏതു സമയത്ത് ഉറങ്ങുന്നതാണ് അഭികാമ്യം?

ഉയർന്ന അളവിലുള്ള ആന്റിബയോട്ടിക് മരുന്നുകൾ ശരീരത്തിലെ നല്ല ബാക്ടീരിയകളുടെ ആവാസവ്യവസ്ഥയെ സാരമായി ബാധിക്കാറുണ്ട്. വൻകുടലിൽ ഈ സൂക്ഷ്മാണുക്കൾ തീർത്ത പ്രതിരോധനിര ആന്റിബയോട്ടിക്കിന്റെ പ്രവർത്തനഫലമായി തകരാറിലാകാം. ഈ അവസ്ഥയിൽ നിന്ന് ശരീരത്തെ സംരക്ഷിക്കാനും സൂക്ഷ്മാണുക്കളുടെ വൈവിധ്യം ഉറപ്പുവരുത്താനും സഹായിക്കുന്ന ആഹാരത്തിലെ ഘടകങ്ങളാണ് പ്രീബയോട്ടിക്കുകളും പ്രോബയോട്ടിക്കുകളും. പ്രത്യേക ഭക്ഷ്യനാരുകൾ അടങ്ങിയ ആഹാരമാണ് പ്രീബയോട്ടിക്കുകൾ. ആരോ​ഗ്യകരമായ ബാക്ടീരിയകൾ അടങ്ങിയതാണ് പ്രോബയോട്ടിക് ഭക്ഷണങ്ങൾ. 

കുടലിന്റെ ആരോ​ഗ്യം ഒരു വ്യക്തിയുടെ ആരോ​ഗ്യത്തിന്റെ അടിസ്ഥാനം കൂടിയാണ്. ഇത് ഉറപ്പുവരുത്താൻ പ്രീബയോട്ടിക്കുകളും പ്രോബയോട്ടിക്കുകളും സഹായിക്കുന്നു. സൂക്ഷ്മാണുക്കളുടെ വൈവിധ്യമാണ് മികച്ച ഉദരപ്രവർത്തനത്തിനും പ്രതിരോധശേഷിക്കും അടിസ്ഥാനം. ഈ വൈവിധ്യം ഉറപ്പുവരുത്തുന്നത് ആഹാരത്തിലൂടെയാണ്. 

പ്രീബയോട്ടിക് ഭക്ഷണങ്ങൾ

ആഹാരത്തിലടങ്ങിയിട്ടുള്ള നാരുകൾ ചെറുകുടലിൽ ദഹിക്കുന്നില്ല. ഇവ വൻകുടലിലെ നല്ല ബാക്ടീരിയകളുടെ ആരോ​ഗ്യത്തിനും വളർച്ചയ്ക്കും വൈവിധ്യത്തിനും സഹായകമാകുന്നു. ഇടയ്ക്കിടെ ഉണ്ടാകുന്ന വയറുവീക്കം, ​ഗ്യാസ്, വയറിളക്കം, വയറുവേദന എന്നിവ കുടലിന്റെ അനാരോ​ഗ്യത്തിന്റെ ലക്ഷണമാണ്. നല്ല സൂക്ഷ്മാണുക്കളുടെ സാന്നിധ്യം വർധിപ്പിക്കുന്നത് ഇത്തരം ലക്ഷണങ്ങളെ കുറയ്ക്കാൻ സഹായിക്കും. നല്ല സൂക്ഷ്മാണുക്കളെ വർധിപ്പിക്കാൻ പ്രീബയോട്ടിക്കുകൾ അടങ്ങിയ ഭക്ഷണങ്ങൾ പ്രയോജനപ്പെടുത്താം. 

തവിടോടുകൂടിയ ധാന്യങ്ങൾ, പച്ചക്കറികൾ, പയറുവർ​ഗങ്ങൾ, പഴവർ​ഗങ്ങൾ എന്നിവയിൽ പ്രീബയോട്ടിക്കുകൾ ധാരാളമായി അടങ്ങിയിരിക്കുന്നു. 
മുലപ്പാൽ കുടിച്ചുവളരുന്ന കുട്ടികളുടെ പ്രതിരോധശേഷി മറ്റു കുട്ടികളേക്കാൾ കൂടുതലാകുന്നത് മുലപ്പാൽ ഒരു സ്വാഭാവിക പ്രീബയോട്ടിക്കായി പ്രവർത്തിക്കുന്നതുകൊണ്ടാണ്. നവജാതശിശുവിന്റെ ആറുമാസംവരെയുള്ള നിർബന്ധിത മുലയൂട്ടലിന്റെ അടിസ്ഥാനവും ഇതാണ്. 

പ്രോബയോട്ടിക് ഭക്ഷണങ്ങൾ

ആഹാരത്തിലെ ​ഘടകമായ പ്രോബയോട്ടിക്കുകളിലൂടെ നേരിട്ടും ഈ സൂക്ഷ്മാണുക്കളെ ശരീരത്തിലെത്തിക്കാൻ സാധിക്കും. ഉദര ആരോ​ഗ്യം പരിപാലിക്കുന്നതിനും രോ​ഗപ്രതിരോധശേഷി വർധിപ്പിക്കുന്നതിനും വൻകുടലിലുണ്ടാകുന്ന കാൻസർ, ക്രോൺസ് എന്നിവയുടെ പ്രതിരോധത്തിനും പ്രോബയോട്ടിക്കുകൾ പ്രധാന പങ്ക് വഹിക്കുന്നു. തൈര്, പുളിപ്പിച്ച സോയാപാൽ എന്നിവയിൽ ധാരാളം പ്രോബയോട്ടിക്കുകളുണ്ട്. 

കുടലിന്റെ ആരോ​ഗ്യത്തിന്

• പ്രീബയോട്ടിക്കുകളും പ്രോ ബയോട്ടിക്കുകളും അടങ്ങിയ ഭക്ഷണം കഴിക്കുക
• നന്നായി ചവച്ച്, ആസ്വദിച്ച് സാവധാനം ആഹാരം കഴിക്കുന്ന ശീലമുണ്ടാക്കുക
• ചിട്ടയായ വ്യായാമവും ഉറക്കവും ഉറപ്പുവരുത്തുക
• പഴങ്ങളും പച്ചക്കറികളും ആഹാരത്തിൽ ഉൾപ്പെടുത്തുക

പഴങ്കഞ്ഞി എന്ന സൂപ്പർഫുഡ്‌

പരമ്പരാ​ഗതമായി കൈമാറുന്ന ആഹാരരീതികളിൽ കേരളത്തിന്റെ വ്യക്തിമുദ്ര പതിപ്പിച്ച ഒരു വിഭവമാണ് പഴങ്കഞ്ഞി. ലാക്ടോ ബാസിലസ് എന്ന നല്ല ബാക്ടീരിയകളടങ്ങിയ ഈ സൂപ്പർ ഫുഡാണ് ഒരുകാലത്ത് കേരളീയരുടെ കുടലുകളെ സംരക്ഷിച്ചിരുന്നതെന്ന് നമുക്ക് പറയാം. രുചിയോടൊപ്പം പല ​ഗുണങ്ങളുമടങ്ങിയതാണ് ഈ ആഹാരം. 

കോഴിക്കോട് എം.വി.ആർ കാൻസർ സെന്റർ & റിസർച്ച് സെന്റർ ന്യൂട്രീഷ്യൻ ഓങ്കോളജിസ്റ്റാണ് ലേഖിക