കാസിരം​ഗ (അസം): അസമിൽ കൂട്ടം തെറ്റിയ കുട്ടിയാനയെ അമ്മയാനയ്ക്ക് അരികിലെത്തിച്ച് അസം വനംവകുപ്പ്. കാസിരം​ഗ നാഷണൽ പാർക്ക് ആൻഡ് ടെെ​ഗർ റിസർവിലാണ് സംഭവം. വനംവകുപ്പ് അധികൃതരും രക്ഷാപ്രവർത്തകരുടെ സംഘവും നടത്തിയ കൂട്ടായ പരിശ്രമത്തിലാണ് കുട്ടിയാന വീണ്ടും അമ്മയാനയുമായി ഒന്നിച്ചത്. 

To advertise here,

ശനിയാഴ്ച പുലർച്ചെയാണ് കുട്ടിയാന കൂട്ടംതെറ്റിയതായി ബോക്കോഘാത്ത് പട്ടണത്തിലെ ബോർജൂരി ബസ്തി ഗ്രാമനിവാസികളുടെ ശ്രദ്ധയിൽപ്പെടുന്നത്. കാസിരം​ഗ ടെെ​ഗർ റിസർവിന് ഉള്ളിലേക്ക് ആനകൾ വരുകയും പുറത്തേക്ക് പോവുകയും ചെയ്യുന്ന വെറോണി പ്രദേശത്താണ് കുട്ടിയാന കൂട്ടം തെറ്റിയത്.  ​

ഗ്രാമവാസികൾ അറിയിച്ചതിനുസരിച്ച് വനംവകുപ്പിന്റെ പട്രോളിങ് സംഘം ഉടൻ പ്രദേശത്തെത്തി. സമീപത്തുള്ള തേയിലത്തോട്ടത്തിലേക്ക് നീങ്ങുകയായിരുന്ന കുട്ടിയാനയെ സെന്റർ ഫോർ വെെൽഡ്ലെെഫ് റീഹാബിലിറ്റേഷൻ ആൻഡ് കൺസർവേഷനിലെ (സിഡബ്ല്യുആർസി) രക്ഷാ സംഘത്തിന്റെ കൂടി പിന്തുണയോടെ വിജയകരമായി പിടികൂടി. തുടർന്ന് സിഡബ്ല്യുആർസിയിലെത്തിച്ച കുട്ടിയാനയുടെ ആരോ​ഗ്യസ്ഥിതി വിലയിരുത്തി. 

പൂർണ ആരോ​ഗ്യവാനാണെന്ന കണ്ടെത്തിയതോടെ അമ്മയാനയുടെ കൂട്ടത്തിനൊപ്പം വിടാൻ അധികൃതർ തീരുമാനിച്ചു. പിന്നീട് കുട്ടിയാനയെ കണ്ടെത്തിയ വെറോണി മേഖലയ്ക്ക് സമീപം കുട്ടിയാനയെ എത്തിച്ചു. രാവിലെ 8.30-ന് കുട്ടിയാനയുടെ കരച്ചിലിനോട് അമ്മയാന പ്രതികരിച്ചു. പാർക്കിൽ നിന്നെത്തിയ അമ്മയാന കുട്ടിയാനയ്ക്കൊപ്പം മടങ്ങിയതോടെ രക്ഷാപ്രവർത്തനത്തിന് ശുഭപര്യവസാനമായി.