അപൂര്‍വമായി കാണപ്പെടുന്ന ആല്‍ബിനോ പാണ്ടയെ ചൈനയില്‍ കണ്ടെത്തി. സെച്വാന്‍ പ്രവിശ്യയിലെ വോലോങ് നാഷണല്‍ നേച്വര്‍ റിസര്‍വാണ് ദേഹമാകെ വെള്ള നിറത്താല്‍ മൂടപ്പെട്ടിരിക്കുന്ന പാണ്ടയുടെ ദൃശ്യങ്ങള്‍ പുറത്തു വിട്ടത്. സാധാരണ പാണ്ടകള്‍ക്ക് കറുപ്പും വെളുപ്പും കലര്‍ന്ന ശരീരമാണ്, എന്നാല്‍ ഇതില്‍ നിന്നും വ്യത്യസ്തരാണ് ആല്‍ബിനോ പാണ്ടകള്‍.
ആല്‍ബിനിസം എന്ന രോഗാവസ്ഥയാണ് പാണ്ടയുടെ വെള്ള നിറത്തിന് പിന്നില്‍. ജനിതക വ്യതിയാനം മൂലം ശരീരത്തില്‍ മെലാനിന്റെ അളവ് കുറയുന്നതാണ് ആല്‍ബിനിസം എന്ന അവസ്ഥയ്ക്ക് കാരണം. 2019-ലാണ് നേച്വര്‍ റിസര്‍വിന്റെ ക്യാമറയില്‍ ആദ്യമായി ആൽബിനോ പാണ്ടയുടെ ചിത്രം പതിയുന്നത്. അഞ്ചോ ആറോ വയസ്സ് പ്രായം മതിക്കുന്ന പാണ്ടയ്ക്ക് മറ്റു ആരോഗ്യപ്രശ്‌നങ്ങളില്ല.
2019 മുതല്‍ ആല്‍ബിനോ പാണ്ട നേച്വര്‍ റിസര്‍വിലെ അധികൃതരുടെ നിരീക്ഷണത്തിലാണ്. സ്വഭാവസവിശേഷതകളും മറ്റും പഠിക്കുന്നതിനായി തുടര്‍ന്ന് ക്യാമറകള്‍ സ്ഥാപിക്കുകയായിരുന്നു. ഇതിലൂടെ ഭീമന്‍ പാണ്ടയുടെ നീക്കങ്ങള്‍ അധികൃതര്‍ പഠിച്ചു.
അടുത്തിടെ മറ്റുള്ള സാധാരണ പാണ്ടകളുമായി ഇടപഴകുന്ന ആല്‍ബിനോ പാണ്ടയുടെ ദൃശ്യങ്ങള്‍ പുറത്തു വന്നിരുന്നു. ഭീമന്‍ പാണ്ടയെ കുറിച്ചുള്ള കൂടുതല്‍ പഠനങ്ങള്‍ നടത്താനൊരുങ്ങുകയാണ് അധികൃതര്‍. അപൂര്‍വയിനത്തില്‍പ്പെട്ട ഭീമന്‍ പാണ്ടകളെ ഇതിനു മുമ്പും ചൈനയില്‍ കണ്ടെത്തിയിട്ടുണ്ട്. 1985-നും 2021-നുമിടയില്‍ തവിട്ടു നിറത്തിലുള്ള പത്ത് ഭീമന്‍ പാണ്ടകളുടെ സാന്നിധ്യം ചൈനയില്‍ രേഖപ്പെടുത്തി.
Content Highlights: rare albino giant panda spotted in the wild in southwest china
Published: 30 May 2023, 09:10 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented