ന്യൂഡൽഹി: ഡൽഹിയിൽ കനത്ത പുകമഞ്ഞിനെ തുടർന്ന് വായുമലിനീകരണം തുടർച്ചയായ ആറാംദിവസവും 'വളരെ മോശം' വിഭാഗത്തിൽ തുടരുന്നു. വെള്ളിയാഴ്ച നഗരത്തിലെ വായുഗുണനിലവാര സൂചിക 387 ആയി ഉയർന്നപ്പോൾ, പല പ്രദേശങ്ങളിലും മലിനീകരണ തോത് 'ഗുരുതരം' എന്ന വിഭാഗത്തിന് തൊട്ടടുത്ത് എത്തിയിരിക്കുകയാണ്.

To advertise here,

കേന്ദ്ര മലിനീകരണ നിയന്ത്രണ ബോർഡിന്റെ കണക്കുകൾ പ്രകാരം, വ്യാഴാഴ്ച ശരാശരി നിലവാര സൂചിക 369 ആയി ഉയർന്നിരുന്നു. ബുധനാഴ്ച ഇത് 377 എന്ന നിലയിലായിരുന്നു. തിങ്കളാഴ്ചയും ചൊവ്വാഴ്ചയും സൂചിക 300-ന് മുകളിലായിരുന്നു രേഖപ്പെടുത്തിയത്.

ദീപാവലിക്കും ഛാട്ട് പൂജയ്ക്കും ശേഷം വായുമലിനീകരണം വർധിക്കുകയാണെങ്കിൽ ക്ലൗഡ് സീഡിങ് വഴി കൃത്രിമമഴ പെയ്യിക്കാൻ ഡൽഹി സർക്കാർ പദ്ധതിയിടുന്നുണ്ട്. ഇതിന് മുന്നോടിയായി കഴിഞ്ഞ 15 ദിവസത്തിനിടെ ഡൽഹി വിമാനത്താവളത്തിന് സമീപം 30,000 മീറ്റർ ഉയരത്തിൽ രണ്ട് പരീക്ഷണങ്ങൾ നടത്തിയിരുന്നു. ഉത്സവാഘോഷങ്ങൾക്ക് ശേഷമുള്ള അന്തരീക്ഷ സ്ഥിതിയും കാലാവസ്ഥയും വിലയിരുത്തി കൂടുതൽ പരീക്ഷണങ്ങൾ നടത്താനും മലിനീകരണം കുറയ്ക്കാനുള്ള അധിക നടപടികൾ സ്വീകരിക്കാനുമാണ് അധികൃതരുടെ തീരുമാനം.