ന്യൂഡൽഹി: യു.ജി.സി.-നെറ്റ് ജൂൺ സെഷൻ പരീക്ഷയുടെ 84 വിഷയങ്ങളിലെ പ്രൊവിഷണൽ ഉത്തര സൂചിക ദേശീയ ടെസ്റ്റിങ് ഏജൻസി (എൻ.ടി.എ.) പ്രസിദ്ധീകരിച്ചു. 18-ന് രാത്രി 11.59 വരെ ചാലഞ്ച് വിൻഡോ തുറന്നിരിക്കുമെന്ന് എൻ.ടി.എ. അറിയിച്ചു. ഒരു ചോദ്യത്തിന് 200 രൂപ വീതമാണ് ചാലഞ്ച് ചെയ്യാനുള്ള ഫീസ്. ഇത് 18-ന് രാത്രി 11.59-നകം അടച്ചിരിക്കണം. വിവരങ്ങൾക്ക്: ugcnet.nta.nic.in

To advertise here,

ബാക്കി മൂന്ന് വിഷയങ്ങൾക്ക് (ഇംഗ്ലീഷ്, കൊമേഴ്‌സ്, സോഷ്യോളജി) ചോദ്യപ്പേപ്പറുകളിലെ പിഴവുകൾ സംബന്ധിച്ച പരാതികൾ പരിശോധിക്കാൻ സമിതിയുണ്ടാക്കി. ഇവരുടെ ശുപാർശയുടെ അടിസ്ഥാനത്തിൽ ഈ മൂന്ന് വിഷയങ്ങൾക്കായി പിന്നീട് പ്രത്യേക നോട്ടീസിറക്കും. ഔദ്യോഗിക വെബ്‌സൈറ്റിൽ വരുന്നതല്ലാതെ മറ്റൊന്നും വിശ്വസിക്കരുതെന്ന് എൻ.ടി.എ. അറിയിച്ചു.

സി.എസ്.ഐ.ആർ. നെറ്റ് വിദ്യാർഥികൾക്കും ഉത്തരസൂചിക പരിശോധിച്ച് പരാതികൾ അറിയിക്കാം. വിവരങ്ങൾക്ക്: csirnet.nta.nic.in

നീറ്റ് പരീക്ഷയ്ക്ക് പിന്നാലെ ഇത്തവണ നെറ്റ് പരീക്ഷയിലും ക്രമക്കേടുകളുണ്ടായി എന്ന ആരോപണം ഉയർന്നിരുന്നു. സോഷ്യോളജി ചോദ്യക്കടലാസ്‌ ചോർന്നു എന്ന ആരോപണവും ശക്തമായിരുന്നു. ഇംഗ്ലീഷ് പരീക്ഷയിൽ 2024-ലെ ചോദ്യക്കടലാസിലെ 67 ചോദ്യങ്ങൾ ആവർത്തിച്ചു, സോഷ്യോളജി പരീക്ഷയിൽ ഒട്ടേറെ അക്ഷരത്തെറ്റുകളുണ്ടായി, പ്രമുഖ സോഷ്യോളജിസ്റ്റുകളുടെ പേരുകൾ, അക്കാദമിക് പദങ്ങൾ തുടങ്ങിയവ തെറ്റിക്കൊടുത്തു, സിലബസിന് പുറത്തുള്ള ചോദ്യങ്ങൾ ഉൾപ്പെടുത്തി തുടങ്ങിയ ആരോപണങ്ങളുമായി വിദ്യാർഥികളും വിദ്യാഭ്യാസവിദഗ്ധരും രംഗത്തെത്തിയിരുന്നു. ഈ പരാതികൾ പരിശോധിക്കാനാണ് സമിതിയെ നിയോഗിച്ചത്.

ജൂൺ 22 മുതൽ 30 വരെയാണ് യു.ജി.സി. നെറ്റ് പരീക്ഷ നടന്നത്. സാധാരണ, പരീക്ഷകഴിഞ്ഞ് രണ്ടാഴ്ചയ്ക്കുള്ളിൽ ഉത്തരസൂചിക പ്രസിദ്ധീകരിക്കും. തുടർന്ന് ഒരുമാസത്തിനുള്ളിൽ ഫലപ്രഖ്യാപനവും ഉണ്ടാകും.