ന്യൂഡൽഹി: അനുസന്ധാൻ നാഷണൽ റിസർച്ച് ഫൗണ്ടേഷൻ (ANRF) പ്രധാനമന്ത്രി ഏർളി കരിയർ റിസർച്ച ഗ്രാന്റിലേക്ക് അപേക്ഷകൾ ക്ഷണിച്ചു. തിരഞ്ഞെടുക്കപ്പെടുന്ന ഗവേഷകർക്ക് മൂന്ന് വർഷത്തെ കാലാവധിയിൽ ഓവർഹെഡ് ചാർജുകൾക്ക് പുറമെ 60 ലക്ഷം രൂപവരെ സാമ്പത്തിക സഹായമായി ലഭിക്കും. ഡിസംബർ രണ്ടാണ് അപേക്ഷ സമർപ്പിക്കാനുള്ള അവസാന തീയതി.

To advertise here,

പാർലമെന്റ് പാസാക്കിയ 2023-ലെ എ.എൻ.ആർ.എഫ് നിയമപ്രകാരം രൂപീകരിച്ച അനുസന്ധാൻ നാഷണൽ റിസർച്ച് ഫൗണ്ടേഷനാണ് പദ്ധതി നടപ്പാക്കുന്നത്. പ്രതിവർഷം വിവിധ ശാസ്ത്ര വിഷയങ്ങളിലായി 700 ഗ്രാന്റുകൾ വരെ വിതരണം ചെയ്യാനാണ് ഫൗണ്ടേഷന്റെ തീരുമാനം.

ഇന്ത്യൻ പൗരന്മാർക്കും നിശ്ചിത മാനദണ്ഡങ്ങൾക്ക് വിധേയമായി PIO, OCI കാർഡുടമകൾക്കും പദ്ധതിയിലേക്ക് അപേക്ഷിക്കാം. ശാസ്ത്രം അല്ലെങ്കിൽ എഞ്ചിനീയറിങ്ങിൽ പി.എച്ച്.ഡി അല്ലെങ്കിൽ MD, MS, MDS, MVSc ബിരുദമുള്ളവരും അംഗീകൃത റിസർച്ച് സ്ഥാപനങ്ങളിൽ സ്ഥിരം ജോലി ഉള്ളവരുമായിരിക്കണം അപേക്ഷകർ. ഉയർന്ന പ്രായപരിധി 42 വയസ്സാണ്. എങ്കിലും സംവരണ വിഭാഗങ്ങൾക്കും (SC/ST/OBC), ഭിന്നശേഷിക്കാർക്കും വനിതാ അപേക്ഷകർക്കും മൂന്ന് വർഷത്തെ പ്രായളവ് അനുവദിച്ചിട്ടുണ്ട്. സാധാരണയായി ജോലിയിൽ പ്രവേശിച്ച് രണ്ട് വർഷത്തിനകം അപേക്ഷിക്കണമെന്നാണ് വ്യവസ്ഥയെങ്കിലും നിലവിലെ ആപ്ലിക്കേഷൻ സൈക്കിളിൽ 2023 ഫെബ്രുവരി 1-നോ അതിനു ശേഷമോ ജോലിയിൽ പ്രവേശിച്ചവർക്ക് അപേക്ഷിക്കാനായി പ്രത്യേക ഇളവ് നൽകിയിട്ടുണ്ട്.

ഫണ്ട് വിനിയോഗത്തിലും റിസർച്ച് ജീവനക്കാരുടെ നിയമനത്തിലും കൂടുതൽ ഇളവുകൾ നൽകുന്നതിനൊപ്പം അന്താരാഷ്ട്ര യാത്രാ ചെലവുകൾ, പേറ്റന്റ് ഫയലിങ്, ഓപ്പൺ ആക്സസ് പബ്ലിക്കേഷൻസ് എന്നിവയ്ക്കും ഗ്രാന്റിൽനിന്ന് സാമ്പത്തിക സഹായം ലഭിക്കും. താല്പര്യമുള്ള ഉദ്യോഗാർഥികൾക്ക് anrfonline.in എന്ന ഔദ്യോഗിക പോർട്ടൽ വഴി ഓൺലൈനായി അപേക്ഷിക്കാം. നിലവിൽ SERB പോർട്ടലിൽ അക്കൗണ്ട് ഉള്ളവർക്ക് ലോഗിൻ ചെയ്യാവുന്നതാണ്. എക്സപേർട്ട് കമ്മിറ്റിയുടെ ശുപാർശയുടെ അടിസ്ഥാനത്തിലായിരിക്കും തിരഞ്ഞെടുപ്പ്.