പാലക്കാട്: 'ഇനി ചെയ്യരുത് ട്ടോ മോനെ', മോഷണക്കേസില്‍ പിടിയിലായ പ്രതിയുമായി തെളിവെടുപ്പിനെത്തിയപ്പോള്‍ അധ്യാപിക നല്‍കുന്ന ഉപദേശമാണ് ഇപ്പോള്‍ സാമൂഹികമാധ്യമങ്ങളില്‍ വൈറലാകുന്നത്. തന്റെ മോന്റെ പ്രായമേയുള്ളൂ എന്നുപറഞ്ഞ്, മോഷണക്കേസില്‍ പിടിയിലായ യുവാവിനോടാണ് മോഷണം നടന്ന വീട്ടിലെ അധ്യാപിക ഉള്ളുതുറന്ന് കാര്യങ്ങള്‍ പറയുന്നത്. പാലക്കാട് തൃത്താലയില്‍ കഴിഞ്ഞദിവസം പോലീസ് നടത്തിയ തെളിവെടുപ്പിനിടെയായിരുന്നു സംഭവം. അധ്യാപിക മോഷ്ടാവിനോട് പറയുന്ന വാക്കുകള്‍ പിന്നീട് സാമൂഹികമാധ്യമങ്ങളിലും വൈറലാവുകയായിരുന്നു.
തൃത്താല സ്വദേശിയും സ്‌കൂള്‍ അധ്യാപികയുമായ മുത്തുലക്ഷ്മിയാണ് തന്റെ വീട്ടില്‍ മോഷണശ്രമം നടത്തിയ കള്ളനെ നേരിട്ടുകണ്ടപ്പോള്‍ ഉപദേശവും നല്‍കിയത്. സെപ്റ്റംബര്‍ 14-ന് പുലര്‍ച്ചെയാണ് മുത്തുലക്ഷ്മിയുടെ 'ലക്ഷ്മിവിലാസം' വീട്ടില്‍ മോഷണശ്രമം നടന്നത്. സംഭവദിവസം അധ്യാപിക ബെംഗളൂരുവിലെ മകളുടെ വീട്ടിലായിരുന്നു. അന്നേദിവസം തന്നെ സമീപത്തെവീട്ടില്‍നിന്ന് പണവും കവര്‍ന്നിരുന്നു. ഈ കേസുകളില്‍ പ്രതിയായ കണ്ണൂര്‍ ഇരിക്കൂര്‍ സ്വദേശി ഇസ്മായിലി(31)നെ കഴിഞ്ഞദിവസമാണ് തൃത്താല പോലീസ് പിടികൂടിയത്. തുടര്‍ന്ന് പ്രതിയുമായി മുത്തുലക്ഷ്മിയുടെ വീട്ടില്‍ തെളിവെടുപ്പിന് എത്തിയപ്പോഴാണ് അധ്യാപിക ഇനി മോഷ്ടിക്കരുതെന്ന് യുവാവിനോട് ഉപദേശിച്ചത്. എന്തിനാണ് ഇങ്ങനെ ചെയ്യണേ മോനെ എന്നുപറഞ്ഞാണ് മുത്തുലക്ഷ്മി സംസാരിച്ചുതുടങ്ങിയത്.
''ഇനി ചെയ്യരുത് ട്ടോ മോന, ഞാനൊരു ടീച്ചറാണ്. കുട്ടികളെ എല്‍.കെ.ജി. മുതല്‍ പഠിപ്പിക്കുന്ന ടീച്ചറാണ്. അക്ഷരം പറഞ്ഞുകൊടുക്കുന്നതാണ്. എന്റെ 38 വയസ്സിലെ ജീവിതത്തിനിടെ എന്റെ അച്ഛന്‍, അമ്മ, ഭര്‍ത്താവ് എന്നിവരെയൊക്കെ നഷ്ടപ്പെട്ടതാണ്. എനിക്ക് രണ്ട് പെണ്‍കുട്ടികളാണ്. ഈ കുട്ടി ഡിഗ്രി കഴിഞ്ഞതാണ്. അതിനൊരു ജോലി കിട്ടി. ഞങ്ങളെയടുത്ത് ഒന്നുമില്ല. ഇപ്പോഴാണ് എന്റെ കുട്ടിക്കൊരു ജോലി കിട്ടിയത്. ആ ഒരു സാഹചര്യം മനസിലാക്കണം. ഞങ്ങളുടെ മാത്രമല്ല. എല്ലാ വീടുകളിലും ഇതുപോലെയുള്ള ആള്‍ക്കാരാണ്. നല്ലതായിട്ട് പെരുമാറാന്‍ ശ്രമിക്കുക. എന്റെ മോനെപോലെ, എന്റെ മോന്റെ പ്രായേ ആയിട്ടുണ്ടാവുകയുള്ളൂ നിനക്ക്'', എന്നായിരുന്നു അധ്യാപികയുടെ വാക്കുകള്‍. മുത്തുലക്ഷ്മി തന്റെ ജീവിതസാഹചര്യമെല്ലാം പറയുമ്പോള്‍ കൈയില്‍ വിലങ്ങുമായി തലതാഴ്ത്തി നില്‍ക്കുകയായിരുന്നു പ്രതിയായ ഇസ്മായില്‍. അധ്യാപിക പറഞ്ഞുനിര്‍ത്തിയതിന് പിന്നാലെ ഇത് അവസാനത്തെയാകണമെന്ന് ഒപ്പമുണ്ടായിരുന്ന പോലീസ് ഉദ്യോഗസ്ഥനും പ്രതിയോട് പറയുന്നത് വീഡിയോയില്‍ കാണാം.
അറസ്റ്റിലായത് നിരവധി മോഷണക്കേസുകളിലെ പ്രതി...
അറസ്റ്റിലായ കണ്ണൂര്‍ ഇരിക്കൂര്‍ സ്വദേശി ഇസ്മായില്‍ നിരവധി മോഷണക്കേസുകളിലെ പ്രതിയാണെന്ന് പോലീസ്. തൃത്താലയിലും ആനക്കരയിലും നടന്ന മോഷണപരമ്പരയിലാണ് ഇസ്മായിലിനെ തൃത്താല പോലീസ് അറസ്റ്റ് ചെയ്തത്.
ആനക്കരയില്‍ വീട് കുത്തിത്തുറന്ന് മോഷണം നടത്തുന്നതിനിടെ സി.സി.ടി.വി. ക്യാമറയില്‍ പതിഞ്ഞ ദൃശ്യങ്ങള്‍ കേന്ദ്രീകരിച്ച് നടത്തിയ അന്വേഷണത്തിലാണ് ഇയാളെ കണ്ടെത്തിയത്.ആനക്കരയിലും കണ്ണനൂരിലും വീടുകളില്‍ മോഷണം നടത്തിയതും ഞാങ്ങാട്ടിരിയില്‍ സ്ത്രീയുടെ മാലപൊട്ടിച്ചതുമടക്കമുള്ള അഞ്ചോളം മോഷണങ്ങളും പിടിച്ചുപറിയും നടത്തിയത് ഇയാളാണെന്ന് ചോദ്യംചെയ്യലില്‍ സമ്മതിച്ചതായി തൃത്താല എസ്.ഐ. കെ.എം. ഷാജി അറിയിച്ചു.
സംസ്ഥാനത്തിന്റെ വിവിധ ഭാഗങ്ങളില്‍ നിരവധി മോഷണക്കേസുകളില്‍ പ്രതിയായ ഇയാള്‍ തൃശ്ശൂര്‍ ജില്ലയിലെ ചാവക്കാട്ടാണ് താമസിക്കുന്നത്. തൃത്താല, കണ്ണനൂര്‍, ഞാങ്ങാട്ടിരി, ആനക്കര എന്നിവിടങ്ങളില്‍ നടന്ന തുടര്‍മോഷണങ്ങളിലെ പ്രതികളെ പിടികൂടാന്‍ കഴിയാത്തത് പോലീസിനെ സമ്മര്‍ദത്തിലാക്കിയിരുന്നു. തൃത്താല ഇന്‍സ്‌പെക്ടര്‍ സി. വിജയകുമാര്‍, എസ്.ഐ. കെ.എം. ഷാജി, ഷൊര്‍ണൂര്‍ ഡിവൈ.എസ്.പി.യുടെ സ്‌ക്വാഡ് അംഗങ്ങളായ ജി.എസ്. ഐ. ജോളി, സി.പി.ഒ.മാരായ അബ്ദുല്‍ റഷീദ്, ഷംസീര്‍, സജിത്ത് എന്നിവരടങ്ങിയ സംഘമാണ് ചൊവ്വാഴ്ച വൈകീട്ട് ഇസ്മയിലിനെ അറസ്റ്റുചെയ്തത്.
Content Highlights: trithala school teacher advice to thief who robbed her home during evidence taking
Published: 21 Sept 2023, 11:58 am IST
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented