പൊന്മുടിയിലെ 22 ഹെയർപിൻ വളവുകൾ പിന്നിട്ട് സർവീസ് നടത്തുന്ന പ്രിയദർശിനി ബസിലെ സൗജന്യ യാത്ര മൂന്ന് അധ്യാപികമാർക്ക് സമ്മാനിച്ചത് ഒരു നല്ല ആശയമാണ്. യാത്രയ്ക്കായി പ്രതിമാസം ചെലവാകുമായിരുന്ന 3,000 രൂപയോളം മിച്ചംപിടിച്ച് 30 കുരുന്നുകളുടെ വൈകുന്നേരത്തെ വിശപ്പകറ്റാൻ നൽകുകയാണ് ഇവർ. പൊന്മുടി ജി.യു.പി.എസ്. സ്കൂളിലെ ഒന്നുമുതൽ ഏഴുവരെ ക്ലാസുകളിലെ കുട്ടികൾക്കാണ് ഈ തുക ഉപയോഗിച്ച് ഭക്ഷണം ഒരുക്കുന്നത്. പി. നിമിഷ, കെ. ജയശ്രീ ദേവൻ, ശാലു പൗലോസ് എന്നിവരാണ് ഈ മാതൃകാപ്രവർത്തനത്തിന് പിന്നിൽ.

To advertise here,

 

മാതാപിതാക്കൾ തോട്ടങ്ങളിൽനിന്ന് മടങ്ങിയെത്താൻ വൈകുന്നതിനാൽ വൈകുന്നേരങ്ങളിൽ ഭക്ഷണം ലഭിക്കാതെ ബുദ്ധിമുട്ടുന്ന കുട്ടികൾക്ക് ആശ്വാസമാകുകയാണ് ഇവരുടെ സഹായം. 2024 ഡിസംബറിൽ വിതുര കെ.എസ്.ടി.എ. ബ്രാഞ്ച് ആരംഭിച്ച സായാഹ്ന ഭക്ഷണപദ്ധതിക്ക് സ്പോൺസർമാരുടെ സഹായത്തോടെയാണ് ഇതുവരെ പണം കണ്ടെത്തിയിരുന്നത്. ഒരാളെ മാത്രം ആശ്രയിക്കാതെ പദ്ധതി മുന്നോട്ടുകൊണ്ടുപോകാനുള്ള ബദൽ മാർഗമായാണ് അധ്യാപികമാർ സ്വന്തം യാത്രയിലെ മിച്ചം കുട്ടികൾക്കായി മാറ്റിവെക്കാൻ തീരുമാനിച്ചത്. ഇവരുടെ സ്നേഹവും കരുതലും ശ്രദ്ധയിൽപ്പെട്ട ഗതാഗതവകുപ്പ് മന്ത്രി സി.പി. ജോൺ അധ്യാപികമാരെ വസതിയിലേക്ക് ക്ഷണിച്ച് ആദരിക്കുകയും ചെയ്തു.