ഈ സിനിമയെ മുളയിലേ നുള്ളിക്കളയാമെന്നാണ് സെൻസർ ബോർഡ് കരുതിയതെന്ന് തോന്നുന്നു

സംവിധായകന്‍ ആര്‍ ശരത്ത് ഒരു സിനിമ ചെയ്യണമെന്ന ആശയവുമായി എന്റെയടുത്തു വന്നത് ഞാന്‍ നല്ല സിനിമയെ സ്‌നേഹിക്കുകയും പ്രോത്സാഹിപ്പിക്കുകയും ചെയ്യുമെന്നറിഞ്ഞുകൊണ്ടാണ്. പല കഥകളും പല കാലഘട്ടങ്ങളിലായി ഞങ്ങള്‍ ചര്‍ച്ചചെയ്‌തെങ്കിലും പറുദീസയുടെ ആശയത്തോടാണ് എനിക്കു താത്പര്യം തോന്നിയത്. ആ കഥയില്‍ എന്റെയാത്മാവിന്റെ ഒരംശമുള്ളതുപോലെ എനിക്കു തോന്നി. 

എന്റെ മുത്തശ്ശന്‍ തെക്കേക്കൂറ്റ് ജോസഫ് പള്ളിയിലെ ഡീക്കനായിരുന്നതുകൊണ്ടാവാം അങ്ങനെ തോന്നിയത്. മുത്തശ്ശനെ എനിക്കോര്‍മയില്ല. പറഞ്ഞുകേട്ടിട്ടേയുള്ളു. ഏതോ വികാരിയച്ചനാണ് പൊന്‍കുന്നം പള്ളിയിലേക്ക് കുറവിലങ്ങാട്ട്‌നിന്നു കൂട്ടിക്കൊണ്ടുവന്നതെന്ന് വല്യമ്മച്ചി പറഞ്ഞറിയാം. ശരത്ത് ഈ കഥ പറഞ്ഞപ്പോള്‍ മുത്തശ്ശനെക്കുറിച്ചുള്ള ഓര്‍മകള്‍ എന്നെ ആവേശിച്ചിരിക്കാം. 

പള്ളിയിലെ കപ്യാര്‍പണി ഒരു താഴ്ന്ന ജോലിയാണെന്ന തോന്നല്‍ പൊതുവെ സമൂഹത്തിലുള്ളതായി എനിക്കു തോന്നിയിട്ടുണ്ട്. പള്ളിയില്‍ പൂജാകര്‍മങ്ങള്‍ക്ക് സഹായിക്കുന്ന പണി എന്തുകൊണ്ട് മോശമായെന്ന് എനിക്കു മനസ്സിലാകുന്നില്ല. പറുദീസയുടെ തുടക്കത്തില്‍, മരിച്ചുപോയ അപ്പന്റെയും അമ്മയുടെയും പടംകാണിച്ചതിനെപ്പോലും കുടുംബത്തിലാരും അനുമോദിച്ചുകണ്ടില്ല. ബന്ധുക്കളില്‍ പലരും പടം കാണാന്‍തന്നെ കൂട്ടാക്കിയില്ല. പക്ഷേ ഞാനതിനെയൊരു വെല്ലുവിളിയായി ഏറ്റെടുക്കുകയായിരുന്നു. അതുകൊണ്ട് കുടുംബത്തില്‍ നിന്നുതന്നെ വളരെയധികം എതിര്‍പ്പുകളുണ്ടായതായി പിന്നീടറിഞ്ഞു. സിനിമയുടെ പരാജയംകൂടിയായപ്പോള്‍ ആകെ തളര്‍ന്നെങ്കിലും ആരെയുമറിയിക്കാതെ എന്തൊക്കെയോ പ്രതീക്ഷിച്ചു. എവിടെനിന്നെങ്കിലും അംഗീകാരം കിട്ടുമെന്ന വിചാരം എനിക്കുണ്ടായിരുന്നു. 

ഞാന്‍ പ്രതീക്ഷിച്ചതുപോലെ ഒരു ദിവസം സന്തോഷവാര്‍ത്തയെത്തി. രണ്ടവാര്‍ഡുകളെക്കുറിച്ചുള്ള മെയിലുകളാണ് ഒന്നിച്ചുവന്നത്! മെക്​സിക്കോ രാജ്യാന്തരചലച്ചിത്രമേളയില്‍ ഏറ്റവും മികച്ച തിരക്കഥയ്ക്കുള്ള അവാര്‍ഡ് ലഭിച്ചതായിരുന്നു ആദ്യത്തേത്. ആംസ്റ്റര്‍ഡാം രാജ്യാന്തര ചലച്ചിത്രോത്സവത്തില്‍ ഏറ്റവും നല്ല ഡ്രമാറ്റിക് എഡിറ്റിംഗിനുള്ള അവാര്‍ഡായിരുന്നു രണ്ടാമത്തേത്. കേരളത്തിലും ഇന്ത്യയിലും ഒരവാര്‍ഡും കിട്ടാതിരുന്ന പറുദീസ രണ്ട് രാജ്യാന്തര ചലച്ചിത്രോത്സവങ്ങളില്‍ അവാര്‍ഡ് വാങ്ങിയത് അത്ര ചെറിയ കാര്യമല്ലല്ലോ! 

ഞാന്‍ ലോകോത്തര സിനിമയൊന്നും നിര്‍മിച്ചിട്ടുണ്ടെന്ന് അവകാശപ്പെടുന്നില്ലെങ്കിലും വെറും കച്ചവടത്തിനുവേണ്ടി ഒരിക്കലും ഒരു മോശം സിനിമ നിര്‍മിച്ചിട്ടില്ലെന്ന് അഭിമാനത്തോടെ എവിടെയും പറയാന്‍ കഴിയും. ബ്ലെസ്സിയുടെ 'കല്‍ക്കട്ടാ ന്യൂസ്' പോലും നല്ല സന്ദേശങ്ങളുള്ള  സിനിമയായിരുന്നല്ലോ! രാജീവ് അഞ്ചലിന്റെ 'ബിയോണ്ട് ദ സോള്‍' മുതല്‍ ജയന്‍ ചെറിയാന്റെ 'പാപ്പിലിയോ ബുദ്ധ'വരെ അങ്ങനെയേ സംഭവിച്ചിട്ടുള്ളു. തുടര്‍ന്നും ഈ രംഗത്തുണ്ടെങ്കില്‍ അങ്ങനെയേ സംഭവിക്കൂ.