നമ്മളുടെ ജീവിതത്തിൽ വൈദ്യുതിയെ ആശ്രയിക്കുന്ന കാര്യങ്ങൾ ഒരു സുപ്രഭാതത്തിൽ ഇല്ലാതെയാകുന്നത് സങ്കൽപ്പിക്കുക. എല്ലാ ഇലക്ട്രിക്കൽ ഉപകരണങ്ങളും- ഉദാഹരണത്തിന് ഫോൺ, ഫാൻ, മിക്സി, ഫ്രിഡ്ജ്, എസി, വാഷിങ് മെഷീൻ പോലെ  ഇലക്ട്രിക്കൽ വീട്ടുപകരണങ്ങൾ, ഇൻ്റർനെറ്റ് അങ്ങനെ ഒരു നിമിഷം ലോകമെമ്പാടുമുള്ള വൈദ്യുതി ഉത്പാദനം പെട്ടെന്ന് നീക്കം ചെയ്താൽ എങ്ങനെയിരിക്കും. അങ്ങനെ ചിന്തിക്കുമ്പോൾ അത് വളരെ ആഴത്തിലുള്ള കാര്യമാണെന്ന് മനസ്സിലാകും. നമ്മൾ മനുഷ്യർക്ക് ശ്വാസമെന്ന പോലെയാണ് യന്ത്രങ്ങൾക്കും ടെക്നോളജിയുമായി ബന്ധപ്പെട്ട ഉപകരണങ്ങൾക്കും വൈദ്യുതി. ഒരു നിമിഷമൊന്ന് ഇതൊന്ന് ഇല്ലാതാകുന്ന കാര്യം ഓർത്തു നോക്കുമ്പോൾ തന്നെ അരിശം കയറും.   ഇന്നത്തെ സാഹചര്യത്തിൽ ജീവിതത്തിൻ്റെ താളം തന്നെ തെറ്റിക്കുവാൻ ഇത് മതി. ഈ ഊർജ്ജം ഒട്ടും ചില്ലറക്കാരൻ അല്ലെന്ന് മാത്രമല്ല ലോകത്തെ ചലിപ്പിച്ചു കൊണ്ട് നടക്കുന്നത് തന്നെ ഈ ഊർജ്ജമാണ്. അതിൻ്റെ ഒരു ഗമയും പവറും പ്രൗഢിയും കക്ഷിക്ക് ഉണ്ട്. കാര്യം അർത്ഥം വേറെയാണെങ്കിലും പവർ സെക്ടർ എന്ന പേര് എന്തുകൊണ്ടും അനുയോജ്യമാണ് ഈ മേഖലയ്ക്ക്. ഇലക്ട്രിക്കൽ എൻജിനീയറിങ് മേഖലയെ കുറിച്ചാണ് ഈ ലക്കം.

To advertise here,

വൈദ്യുതി ഉത്പാദനത്തിൻ്റെ കാര്യത്തിൽ ഏതാണ്ട് 442 GW ഉത്പാദനവുമായി ലോകത്ത് മൂന്നാമത് നിൽക്കുന്ന നമ്മുടെ രാജ്യം,  എവിടെ നോക്കിയാലും പ്രോത്സാഹിപ്പിക്കപ്പെടുന്ന ഇലക്ട്രിക് വാഹന വിപണി, സമ്പൂർണ്ണ ഇലക്ട്രിഫിക്കേഷനിലേക്ക് അടുത്തുകൊണ്ടിരിക്കുന്ന ഇന്ത്യൻ റെയിൽവേ, ജല വൈദ്യുത നിലയങ്ങൾ, താപ വൈദ്യുത നിലയങ്ങൾ, ആണവ വൈദ്യുത നിലയങ്ങൾ.  അതും പോരാഞ്ഞ് കാറ്റ്, സൂര്യൻ എന്ന് വേണ്ട സർവ്വം വൈദ്യുതമയം ആണല്ലോ. നാടോടുമ്പോൾ നടുവേ ഓടണമെങ്കിൽ നാടിനെ ഓടിക്കാൻ വേണം ഈ വൈദ്യുതി എന്ന് വരുമ്പോൾ അതിൻ്റെ സാധ്യതകൾ സങ്കൽപ്പിക്കാമല്ലോ. ഇലക്ട്രിക്കൽ എൻജിനീയർമാരില്ലെങ്കിൽ നാമെല്ലാവരും ജീവിക്കുന്ന ജീവിതം തികച്ചും വ്യത്യസ്തമായിരിക്കും. പുതിയ ലോകത്തിൻ്റെ ഭാവിയിൽ നിർണായകമാകുന്ന പുനരുപയോഗ ഊർജ്ജം, ക്വാണ്ടം കമ്പ്യൂട്ടിംഗ്, അതിവേഗ ഡാറ്റ നെറ്റ്‌വർക്കുകൾ, വർദ്ധിച്ചുവരുന്ന ഇൻ്റർനെറ്റ് ഓഫ് തിംഗ്‌സ് (IoT) എന്നിവയും അവയ്ക്ക് അടിസ്ഥാനമേകുന്ന വൈദ്യുത സംവിധാനങ്ങൾ ആസൂത്രണം ചെയ്യാനും നിർമ്മിക്കാനും കഴിയുന്ന കൂടുതൽ കൂടുതൽ വൈദഗ്ധ്യമുള്ള ബിരുദധാരികൾ ആവശ്യമാണ്.

കേവലം വൈദ്യുതി ഉത്പാദനം മാത്രമാണോ ഇലക്ട്രിക്കൽ എൻജിനീയറിങ് ?

കറൻ്റ് പോലെയാണ് ഈ എൻജിനിയറിങ് വിഭാഗത്തിൻ്റെ കാര്യവും. നമുക്ക് പ്രത്യക്ഷത്തിൽ കാണാൻ സാധിക്കില്ല എന്നത് പോലെ  ഈ വിഭാഗത്തിൻ്റെ സാധ്യതാ മേഖലകൾ പടർന്ന് കിടക്കുന്നത് അത്രകണ്ട് എളുപ്പത്തിൽ മനസ്സിലാക്കാൻ തരമില്ല. ചില ഉദാഹരണങ്ങളിൽ കൂടി അവ മനസ്സിലാക്കുവാൻ ശ്രമിക്കാം.

ഒരു അടിസ്ഥാന ഉദാഹരണം ഒരു ബൾബ് ആയിരിക്കും, അത് വൈദ്യുതോർജ്ജത്തെ പ്രകാശമായും ചൂടായും മാറ്റുന്നു. ഇനി ഇതേ വിദ്യയെ  ഓരോ സെക്കൻഡിലും രണ്ടു തവണ അത് ഓണാക്കുകയും ഓഫാക്കുകയും ചെയ്യുക, അപ്പോൾ കാറിലെ ഒരു സൂചകം പോലെ ഒരു സിഗ്നലായി മാറുന്നു. ഇനി സെക്കൻഡിൽ ദശലക്ഷക്കണക്കിന് തവണ ഇത് ഓണാക്കുകയും ഓഫാക്കുകയും ചെയ്യുന്നു എന്ന് വിചാരിക്കുക. അതിന് ഒപ്റ്റിക്കൽ ഫൈബറിലൂടെ വലിയ അളവിലുള്ള ഡാറ്റ കൈമാറാൻ കഴിയും. ദശലക്ഷക്കണക്കിന് ലൈറ്റുകൾ ഒരുമിച്ച് വയ്ക്കുക എന്നിട്ട് അവയെ നിയന്ത്രിക്കുക, നിങ്ങൾക്ക് ടിവി അല്ലെങ്കിൽ മോണിറ്റർ പോലുള്ള ഒരു ഡിസ്പ്ലേ ലഭിക്കും. അതായത് ഒപ്റ്റിക്കൽ ഫൈബറുകളിലൂടെയോ വയർലെസ് വഴിയോ ആശയവിനിമയം നടത്തുന്നതിന് ലൈറ്റ് അല്ലെങ്കിൽ റേഡിയോ ഫ്രീക്വൻസികൾ ഉപയോഗിക്കുകയും വിവരങ്ങൾ പ്രോസസ്സ് ചെയ്യുന്നതിന് സിഗ്നൽ പ്രോസസ്സിംഗും നിയന്ത്രണ അൽഗോരിതങ്ങളും ഉപയോഗിക്കുകയും ചെയ്യുന്നു, (ഉദാ: ഹൃദയമിടിപ്പ് കണ്ടെത്തൽ ) ചലിക്കുന്ന കാര്യങ്ങൾ ഏകോപിപ്പിക്കുന്നതിൽ (ഉദാ. വിമാനം സുഗമമായി നിലത്തിറക്കുക).

ഇങ്ങനെ ക്വാണ്ടം ഇലക്ട്രോണിക്സ് (സെൻസറുകൾ ഉദാഹരണം )മുതൽ ഗതാഗതത്തിൻ്റെ വൈദ്യുതീകരണം, ഇൻ്റർനെറ്റ് ഓഫ് തിംഗ്സ് ഉപകരണങ്ങൾ, ഉയർന്ന നിലവാരമുള്ള ഓഡിയോ സിഗ്നൽ പ്രോസസ്സിംഗ്, ബ്രെയിൻ-മെഷീൻ ഇൻ്റർഫേസുകൾ, മൈക്രോസാറ്റലൈറ്റുകൾ, ഡ്രോണുകളുടെ നിയന്ത്രണം എന്നിവയുമായി ബന്ധപ്പെട്ട വിവിധ പരിഹാരങ്ങൾ എന്നീ മേഖലകളിൽ ഇലക്ട്രിക്കൽ എൻജിനീയർമാർ വിവിധ വ്യവസായങ്ങളിൽ പ്രവർത്തിക്കുന്നു.

ചുരുക്കത്തിൽ
വൈദ്യുത സംവിധാനങ്ങളും, അനുബന്ധ ആപ്ലിക്കേഷനും,  അതിനായുള്ള ഉപകരണങ്ങൾ, ബന്ധപ്പെട്ട സാങ്കേതികവിദ്യകൾ എന്നിവയുടെ പഠനം, രൂപകൽപ്പന, വികസിപ്പിക്കൽ, പ്രയോഗം എന്നിവ കൈകാര്യം ചെയ്യുന്ന എൻജിനീയറിംങ്ങിൻ്റെ ഒരു ശാഖയാണ് ഇലക്ട്രിക്കൽ എൻജിനീയറിംഗ്. വിവിധ വ്യവസായങ്ങൾക്കായി നൂതനമായ പരിഹാരങ്ങൾ വികസിപ്പിക്കുന്നതിന് വൈദ്യുതി, ഇലക്ട്രോണിക്സ്, വൈദ്യുതകാന്തികത എന്നിവയുടെ ഉപയോഗം ഇതിൽ ഉൾപ്പെടുന്നു:

1. വൈദ്യുതി ഉത്പാദനവും വിതരണവും
2. ഇലക്ട്രിക്കൽ സർക്യൂട്ടുകളും ഇലക്ട്രോണിക്സും
3. മൈക്രോകൺട്രോളറുകളും എംബഡഡ് സിസ്റ്റങ്ങളും
4. ആശയവിനിമയ സംവിധാനങ്ങൾ
5. നിയന്ത്രണ സംവിധാനങ്ങൾ
6. ഇലക്ട്രിക്കൽ മെഷീനുകളും ഡ്രൈവുകളും
7. പുനരുപയോഗ ഊർജ്ജ സംവിധാനങ്ങൾ
8. ലൈറ്റിംഗും പ്രകാശവും
9. ഇലക്ട്രിക്കൽ സുരക്ഷയും സംരക്ഷണവും
10. പുതിയ ഇലക്ട്രിക്കൽ സാങ്കേതികവിദ്യകളുടെ ഗവേഷണവും വികസനവും
11. വൈദ്യുത സംവിധാനങ്ങളുടെ പരിശോധനയും സാധൂകരണവും
12. ഇലക്ട്രിക്കൽ ഉപകരണങ്ങളുടെ ട്രബിൾഷൂട്ടിംഗും പരിപാലനവും
13. ഇലക്ട്രിക്കൽ സുരക്ഷയും ചട്ടങ്ങൾ പാലിക്കുന്നതും ഉറപ്പാക്കുന്നു. 

ചുരുക്കത്തിൽ, വിവിധ വ്യവസായങ്ങൾക്കും ആപ്ലിക്കേഷനുകൾക്കുമായി നൂതനമായ വൈദ്യുത പരിഹാരങ്ങൾ വികസിപ്പിച്ചുകൊണ്ട് ആധുനിക ലോകത്തെ രൂപപ്പെടുത്തുന്നതിൽ സുപ്രധാന പങ്ക് വഹിക്കുന്ന ചലനാത്മകവും വൈവിധ്യപൂർണ്ണവുമായ ഒരു മേഖലയാണ് ഇലക്ട്രിക്കൽ എൻജിനീയറിംഗ്.

ഇലക്ട്രിക്കൽ എൻജിനീയറിംഗിന് ആപ്ലിക്കേഷൻ

1. വൈദ്യുതി ഉൽപ്പാദനവും വിതരണവും: പവർ പ്ലാൻ്റുകൾ, ട്രാൻസ്മിഷൻ ലൈനുകൾ, വിതരണ സംവിധാനങ്ങൾ എന്നിവയുടെ രൂപകൽപ്പനയും വികസനവും.

2. ഇലക്‌ട്രോണിക്‌സ്: മൈക്രോകൺട്രോളറുകൾ, എംബഡഡ് സിസ്റ്റങ്ങൾ, ഐഒടി ഉപകരണങ്ങൾ എന്നിവയുൾപ്പെടെ ഇലക്ട്രോണിക് ഉപകരണങ്ങൾ, സർക്യൂട്ടുകൾ, സിസ്റ്റങ്ങൾ എന്നിവയുടെ രൂപകൽപ്പനയും വികസനവും.

3. കമ്മ്യൂണിക്കേഷൻ സിസ്റ്റങ്ങൾ: ടെലിഫോൺ നെറ്റ്‌വർക്കുകൾ, റേഡിയോ, ടെലിവിഷൻ പ്രക്ഷേപണം, ഇൻ്റർനെറ്റ് കണക്റ്റിവിറ്റി എന്നിവയുൾപ്പെടെയുള്ള ആശയവിനിമയ സംവിധാനങ്ങളുടെ രൂപകൽപ്പനയും വികസനവും.

4. കൺട്രോൾ സിസ്റ്റം: ഓട്ടോമേഷൻ, റോബോട്ടിക്സ്, പ്രോസസ് കൺട്രോൾ എന്നിവയുൾപ്പെടെയുള്ള നിയന്ത്രണ സംവിധാനങ്ങളുടെ രൂപകൽപ്പനയും വികസനവും.

5. ഇലക്ട്രിക്കൽ മെഷീനുകളും ഡ്രൈവുകളും: മോട്ടോറുകൾ, ജനറേറ്ററുകൾ, ട്രാൻസ്ഫോർമറുകൾ എന്നിവയുൾപ്പെടെയുള്ള ഇലക്ട്രിക്കൽ മെഷീനുകളുടെ രൂപകൽപ്പനയും വികസനവും.

6. റിന്യൂവബിൾ എനർജി സിസ്റ്റംസ്: സൗരോർജ്ജം, കാറ്റ്, ജലവൈദ്യുത ഊർജ്ജം എന്നിവയുൾപ്പെടെയുള്ള പുനരുപയോഗ ഊർജ്ജ സംവിധാനങ്ങളുടെ രൂപകൽപ്പനയും വികസനവും.

7. ലൈറ്റിംഗും പ്രകാശവും: LED ലൈറ്റിംഗും സ്മാർട്ട് ലൈറ്റിംഗ് സൊല്യൂഷനുകളും ഉൾപ്പെടെയുള്ള ലൈറ്റിംഗ് സിസ്റ്റങ്ങളുടെ രൂപകൽപ്പനയും വികസനവും.

8. ഇലക്ട്രിക്കൽ സേഫ്റ്റിയും പ്രൊട്ടക്ഷനും: സർക്യൂട്ട് ബ്രേക്കറുകൾ, ഫ്യൂസുകൾ, സർജ് പ്രൊട്ടക്ടറുകൾ എന്നിവയുൾപ്പെടെയുള്ള ഇലക്ട്രിക്കൽ സുരക്ഷാ, സംരക്ഷണ സംവിധാനങ്ങളുടെ രൂപകൽപ്പനയും വികസനവും.

9. മെഡിക്കൽ ഉപകരണങ്ങൾ: ഡയഗ്നോസ്റ്റിക് ഉപകരണങ്ങൾ, മെഡിക്കൽ ഇമേജിംഗ്, പ്രോസ്തെറ്റിക്സ് എന്നിവ ഉൾപ്പെടെയുള്ള മെഡിക്കൽ ഉപകരണങ്ങളുടെ രൂപകൽപ്പനയും വികസനവും.

10. എയറോസ്‌പേസും ഡിഫൻസും: വിമാനം, ബഹിരാകാശവാഹനം, സൈനിക ആവശ്യങ്ങൾ എന്നിവയ്‌ക്കായുള്ള വൈദ്യുത സംവിധാനങ്ങളുടെ രൂപകൽപ്പനയും വികസനവും.

11. ഓട്ടോമോട്ടീവ് സിസ്റ്റംസ്: ഇലക്ട്രിക് വാഹനങ്ങൾ, ഹൈബ്രിഡ് വാഹനങ്ങൾ എന്നിവയുൾപ്പെടെ വാഹനങ്ങൾക്കായുള്ള ഇലക്ട്രിക്കൽ സംവിധാനങ്ങളുടെ രൂപകൽപ്പനയും വികസനവും.

12. ഇൻഡസ്ട്രിയൽ ഓട്ടോമേഷൻ: SCADA സിസ്റ്റങ്ങൾ, PLC-കൾ, വ്യാവസായിക റോബോട്ടുകൾ എന്നിവയുൾപ്പെടെ വ്യാവസായിക ഓട്ടോമേഷൻ സിസ്റ്റങ്ങളുടെ രൂപകൽപ്പനയും വികസനവും.

13. ബിൽഡിംഗ് സർവീസസ്: HVAC, ലൈറ്റിംഗ്, സുരക്ഷാ സംവിധാനങ്ങൾ എന്നിവയുൾപ്പെടെ കെട്ടിടങ്ങൾക്കായുള്ള ഇലക്ട്രിക്കൽ സിസ്റ്റങ്ങളുടെ രൂപകൽപ്പനയും വികസനവും.

14. ഗതാഗത സംവിധാനങ്ങൾ: ഗതാഗതത്തിനായുള്ള ഇലക്ട്രിക്കൽ സംവിധാനങ്ങളുടെ രൂപകൽപ്പനയും വികസനവും ( റെയിൽവേ, മെട്രോ, ട്രാഫിക് മുതലായവ)

ടോപ് റിക്രൂടേഴ്‌സ് ( ഇലക്ട്രിക്കൽ എൻജിനീയർമാരെ ആവശ്യപ്പെടുന്ന രാജ്യത്തെ പ്രധാന കമ്പനികൾ)

1. ഭാരത് ഹെവി ഇലക്ട്രിക്കൽസ് ലിമിറ്റഡ് ( BHEL)
2. ഷ്നീഡർ ഇലക്ട്രിക് ( Schneider Electric)
3. ലാർസന് ആൻഡ് ടൂബ്രോ ( L&T)
4. സീമെൻസ് ( Seimens )
5. ബജാജ് ഇലക്ട്രിക്കൽ ലിമിറ്റഡ് 
6. കിർലോസ്‌കർ ഇലക്ട്രിക് കമ്പനി ലിമിറ്റഡ്
7. ക്രോംപ്ടൺ ( Crompton)
8. റിലയൻസ് ഇൻഡസ്ട്രിസ് 
9. ഹാവെൽസ് ഇന്ത്യ
10. ഫിലിപ്സ് ഇന്ത്യ
11. നാഷണൽ തെര്മൽ പവർ കോർപറേഷൻ
12. എബിബി ഇന്ത്യ
13. പവർ ഗ്രിഡ് കോർപറേഷൻ ഓഫ് ഇന്ത്യ
14. ജിൻഡാൽ സ്റ്റീൽ ആൻഡ് പവർ ലിമിറ്റഡ്
15. കോൾ ഇന്ത്യ ലിമിറ്റഡ് ( Coal India Limited)

തൊഴിൽ സാധ്യതകൾ, തസ്തികകൾ, കമ്പനികൾ ( ഈ അടുത്ത നാളുകളിൽ വന്നിട്ടുള്ളതായ ചില ഉദാഹരണങ്ങൾ)

1. പവർ സിസ്റ്റം എൻജിനീയർ ( എബിബി ഇന്ത്യ)
2. അസിസ്റ്റൻ്റ് ഇലക്ട്രിക് എൻജിനിയർ ( KSEB )
3. സീനിയർ ലീഡ് എൻജിനിയർ ( മഹീന്ദ്ര ഗ്രൂപ്പ്, 
4. എൻജിനിയർ മെയിൻ്റനൻസ് ഇലക്ട്രിക്കൽ ( റിലയൻസ് ഇൻഡസ്ട്രീസ്) 
5. റിസർച്ച് എൻജിനിയർ, ഇലക്ട്രിക്കൽ സിസ്റ്റം എൻജിനിയറിങ് ( ജിഇ എയ്റോസ്പേസ്)
6. ബിൽഡിംഗ് ഓട്ടോമേഷൻ എൻജിനിയർ
7. ലീഡ് കൺട്രോൾ ആൻഡ് പ്രൊട്ടക്ഷൻ എൻജിനിയർ ( ജിഇ റിന്യൂവബിൾ എനർജി)
8. HVAC ഡിസൈൻ എൻജിനിയർ
9. ഗ്രാജ്വേറ്റ് ട്രെയിനി എൻജിനിയർ ( സിമെൻസ്)
10. പ്രോജക്ട് ഡിസൈൻ ഇലക്ട്രിക്കൽ എൻജിനിയർ ( ആമസോൺ ഇന്ത്യ)
11. സീനിയർ എൻജിനിയർ, ഇലക്ട്രിക്കൽ സിസ്റ്റം ഡിസൈൻ ( കേറ്റർപില്ലർ)  
12. ഇലക്ട്രിക്കൽ ഡിസൈൻ എൻജിനിയർ ( UST ഗ്ലോബൽ)
13. സയൻ്റിസ്റ്/ എൻജിനിയർ ( ISRO)
14. എക്സിക്യൂട്ടീവ് ട്രെയിനി ( പവർ ഗ്രിഡ് കോർപറേഷൻ, NTPC)
15. ജൂനിയർ എൻജിനിയർ/ ഇലക്ട്രിക്കൽ എൻജിനിയർ/ സീനിയർ സെക്ഷൻ എൻജിനിയർ ( ഇന്ത്യൻ റെയിൽവേ)

ഭാവി

പുനരുപയോഗ ഊർജത്തിലേക്കുള്ള ( Renewable Energy ) മാറ്റം, സാങ്കേതികവിദ്യയിലെ പുരോഗതി, അനുദിനം മാറിക്കൊണ്ടിരിക്കുന്ന ഉപഭോക്തൃ പ്രവണതകൾ എന്നിവയാൽ നയിക്കപ്പെടുന്ന ഇന്ത്യൻ ഊർജമേഖല പരിവർത്തനത്തിന് വിധേയമായിക്കൊണ്ടിരിക്കുകയാണ്. പുതിയ വെല്ലുവിളികളെ നേരിടാനും ഉയർന്നുവരുന്ന അവസരങ്ങൾ പ്രയോജനപ്പെടുത്താനും ബിരുദധാരികളെ സജ്ജരാക്കി ഈ പരിവർത്തനത്തിന് വേണ്ടി മാനവ വിഭവശേഷി (എച്ച്ആർ) പരിശീലനങ്ങളിൽ ആവശ്യമായ മാറ്റങ്ങൾ വേണ്ട കാലമാണ് ഇത്.

സ്‌മാർട്ട് ഗ്രിഡുകൾ, ഐഒടി (ഇൻ്റർനെറ്റ് ഓഫ് തിംഗ്‌സ്), എഐ (ആർട്ടിഫിഷ്യൽ ഇൻ്റലിജൻസ്) തുടങ്ങിയ വൈദ്യുതി മേഖലയിലെ ഡിജിറ്റൽ സാങ്കേതികവിദ്യകളുടെ സംയോജനം ഈ മേഖലയ്ക്ക് പുതുമയും ഉണർവ്വും നൽകുന്നു. ഈ മുന്നേറ്റങ്ങൾക്ക് പരമ്പരാഗത ഊർജ്ജമേഖലയിലെ റോളുകളിൽ ഉള്ള വൈദഗ്ധ്യം മാത്രമല്ല, പുതിയ കാലത്തെ ഡിജിറ്റൽ സാങ്കേതികവിദ്യകളിൽ പ്രാവീണ്യവുമുള്ള ഒരു തൊഴിൽ ശക്തിയും ആവശ്യമാണ്.

സ്‌മാർട്ട് ഗ്രിഡുകളും ഐഒടിയും: സ്‌മാർട്ട് ഗ്രിഡുകൾ വൈദ്യുതി ഉൽപ്പാദിപ്പിക്കുന്നതിലും വിതരണം ചെയ്യുന്നതിലും ഉപഭോഗം ചെയ്യുന്നതിലും വിപ്ലവം സൃഷ്ടിക്കുന്നു. തത്സമയ നിരീക്ഷണവും നിയന്ത്രണവും പ്രവർത്തനക്ഷമമാക്കുന്നതിലൂടെ അവ പവർ സിസ്റ്റങ്ങളുടെ വിശ്വാസ്യതയും കാര്യക്ഷമതയും വർദ്ധിപ്പിക്കുന്നു. സ്‌മാർട്ട് ഗ്രിഡുകളുടെ വിന്യാസത്തിന് വിദഗ്ദ്ധരായ പ്രൊഫഷണലുകൾ ആവശ്യമാണ്:

ഡാറ്റ അനലിറ്റിക്‌സ്: സ്‌മാർട്ട് ഗ്രിഡുകൾ വലിയ അളവിലുള്ള ഡാറ്റ സൃഷ്‌ടിക്കുന്നു, അവ പെർഫോമൻസ് ഒപ്റ്റിമൈസ് ചെയ്യുന്നതിന് വിശകലനം ചെയ്യേണ്ടതുണ്ട്. ഗ്രിഡ് മാനേജ്‌മെൻ്റ് മെച്ചപ്പെടുത്തുന്നതിന് ഈ ഡാറ്റയെ വിശകലനം ചെയ്യുന്നതിൽ ഡാറ്റാ അനലിസ്റ്റുകളും ഡാറ്റാ സയൻ്റിസ്റ്റുകളും നിർണായക പങ്ക് വഹിക്കും.

വൈദ്യുതി സംവിധാനങ്ങളുടെ ഡിജിറ്റലൈസേഷൻ വർധിക്കുന്നതോടെ സൈബർ സുരക്ഷ പരമപ്രധാനമായി മാറുന്നു. സൈബർ ഭീഷണികളിൽ നിന്ന് ഗ്രിഡിനെ സംരക്ഷിക്കുന്നതിന് സൈബർ സുരക്ഷാ പ്രോട്ടോക്കോളുകളിലും സമ്പ്രദായങ്ങളിലും പ്രാവീണ്യമുള്ള ഒരു തൊഴിൽ ശക്തി ആവശ്യമാണ്.

ആർട്ടിഫിഷ്യൽ ഇൻ്റലിജൻസും മെഷീൻ ലേണിംഗും: ഊർജ്ജ ആവശ്യകത പ്രവചിക്കുന്നതിനും ഉൽപ്പാദനം ഒപ്റ്റിമൈസ് ചെയ്യുന്നതിനും ഗ്രിഡ് സ്ഥിരത വർദ്ധിപ്പിക്കുന്നതിനും AI, മെഷീൻ ലേണിംഗ് എന്നിവ ഉപയോഗിക്കുന്നു. വൈദ്യുതി മേഖലയിൽ ഈ സാങ്കേതികവിദ്യകളുടെ പ്രയോഗത്തിന് കഴിവുകൾ ആവശ്യമാണ്:

AI വികസനം: AI അൽഗോരിതങ്ങളും മോഡലുകളും വികസിപ്പിക്കുന്നതിൽ വൈദഗ്ധ്യമുള്ള പ്രൊഫഷണലുകൾ ഊർജ്ജ ഉപയോഗ രീതികൾ പ്രവചിക്കാനും നിയന്ത്രിക്കാനും കഴിയുന്ന പരിഹാരങ്ങൾ സൃഷ്ടിക്കുന്നതിന് ആവശ്യമാണ്.

ഓട്ടോമെഷൻ , പുനരുൽപ്പാദിപ്പിക്കാവുന്ന ഊർജ്ജ ഉൽപ്പാദനം, സെൻസറുകൾ, ഹൈ-സ്പീഡ് ഒപ്റ്റിക്കൽ ഫൈബർ, വയർലെസ് കമ്മ്യൂണിക്കേഷൻ നെറ്റ്‌വർക്കുകൾ എന്നിവ പോലെയുള്ള മുന്നേറ്റങ്ങൾ തുടങ്ങി 'സാങ്കേതികവിദ്യ' എന്ന് വിളിക്കുന്ന മിക്കതിൻ്റെയും ഉത്ഭവത്തിൽ ഒരു ഇലക്ട്രിക്കൽ എൻജിനീയറിംഗിൻറെ പങ്ക് വ്യക്തമാണ്. ഈ മേഖലയും ബന്ധപ്പെട്ട സാങ്കേതികവിദ്യയും ഒട്ടും നിസ്സാരമായി കാണാൻ കഴിയില്ല. ആധുനികതയിൽ സന്നിവേശിപ്പിക്കപ്പെട്ടാൽ ഇലക്ട്രിക്കൽ എൻജിനീയറിങ് ലോകത്തെ തന്നെ മാറ്റിമറിക്കുന്ന തരത്തിൽ മുന്നേറും..