യൗവനത്തില്‍തന്നെ സ്വാതന്ത്ര്യസമരത്തില്‍ പങ്കാളിയായ കെ.പി. കേശവമേനോന്‍ ഗാന്ധിജി ഉള്‍പ്പെടെയുള്ള ദേശീയ പ്രസ്ഥാന നേതാക്കളുമായി അടുത്ത ബന്ധം പുലര്‍ത്തിയിരുന്ന വ്യക്തിയായിരുന്നു. ഗാന്ധിജിയുടെ ജീവചരിത്രകൃതിയായ 'രാഷ്ട്രപിതാവി'ന്റെ കര്‍ത്താവുമാണ് അദ്ദേഹം. മാതൃഭൂമി ബുക്‌സ് പ്രസിദ്ധീകരിച്ച'മഹാത്മജി: ഒപ്പം നടന്നവരുടെ ഓര്‍മകള്‍' എന്ന പുസ്തകത്തില്‍ കെ.പി. കേശവമേനോന്‍ എഴുതിയ കുറിപ്പ് വായിക്കാം...
ഒരു ഘാതകന്റെ കൈകൊണ്ട് മഹാത്മാഗാന്ധി മരണപ്പെട്ടു എന്ന വര്‍ത്തമാനം ലോകത്തെ സ്തംഭിപ്പിച്ചു. ഇന്ത്യയില്‍ ഈ വാര്‍ത്ത കേട്ട് ചിലര്‍ ഹൃദയസ്തംഭനംകൊണ്ടു മരിച്ചു. ലോകനേതാക്കന്മാരും രാഷ്ട്രത്തലവന്മാരും ചിന്തകരും മതാചാര്യന്മാരും എന്നുവേണ്ട വിവിധരംഗങ്ങളില്‍ പേരും പ്രസിദ്ധിയും നേടിയ പലരും അവരുടെ അഗാധദുഃഖം ഇന്ത്യാഗവണ്‍മെന്റിനെ അറിയിച്ചു. അമേരിക്കയിലെ പ്രസിഡന്റ് ട്രൂമാന്‍, ബ്രിട്ടീഷ് രാജാവ്, ഫ്രാന്‍സിന്റെ പ്രസിഡന്റ്, കാന്റര്‍ബറി ആര്‍ച്ച് ബിഷപ്പ്, മാര്‍പ്പാപ്പ പീയൂസ്, ലണ്ടനിലെ മുഖ്യറാബ്ബി, തിബത്തിലെ ദലയ്‌ലാമ എന്നിവര്‍ അവരില്‍പ്പെടും. ആയിരക്കണക്കായ അനുശോചനസന്ദേശങ്ങള്‍ വിദേശങ്ങളില്‍നിന്ന് ഇന്ത്യാഗവണ്‍മെന്റിന് ലഭിച്ചു. ഐക്യരാഷ്ട്രസഭയുടെ സെക്യൂരിറ്റി കൗണ്‍സില്‍ യോഗം നടന്നുകൊണ്ടിരിക്കുമ്പോഴാണ് ഗാന്ധിയുടെ മരണവാര്‍ത്ത അറിഞ്ഞത്. ഉടനേ സഭാപരിപാടികള്‍ നിറുത്തി. മഹാത്മാഗാന്ധിയുടെ സ്മരണയ്ക്ക് അഭിവാദ്യമര്‍പ്പിച്ചു. 'അനാഥരുടെയും ദരിദ്രരുടെയും ഉറ്റബന്ധുവായിരുന്നു ഗാന്ധി. അദ്ദേഹത്തിന്റെ വലിയ നേട്ടങ്ങള്‍ ഇനിയും നമുക്കനുഭവപ്പെടുവാനിരിക്കുന്നു' എന്നാണ് സെക്യൂരിറ്റി കൗണ്‍സിലിലെ ബ്രിട്ടീഷ് പ്രതിനിധി ഫിലിപ്പ് നോയല്‍ ബേക്കര്‍ പറഞ്ഞത്. സമാധാനത്തിനുവേണ്ടി ഗാന്ധി ചെയ്ത അക്ഷീണപരിശ്രമത്തെയും അദ്ദേഹത്തിന്റെ ആത്മീയശക്തിയെയും പ്രശംസിച്ചുകൊണ്ട് മറ്റു ചില അംഗങ്ങളും പ്രസംഗിച്ചു.
Content Highlights: K.P. Kesava Menon, Mahatma Gandhi, Books excerpt, Mathrubhumi books
Published: 30 Jan 2024, 01:06 pm IST
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented