നാടക വാഹനങ്ങളെ തിരിച്ചറിഞ്ഞിരുന്നത് തന്നെ വണ്ടിക്ക് മുകളില് വെച്ചിട്ടുള്ള വലിയ ബോര്ഡ് കണ്ടിട്ടായിരുന്നു. ഇന്ന് ഇത്തരം വാഹനങ്ങള് വിരലിലെണ്ണാവുന്നതായി ചുരുങ്ങിയിട്ടുണ്ട്. എന്നാല്, ഇത്തരമൊരു നാടകവണ്ടിയാണ് ഇപ്പോള് സമൂഹമാധ്യമത്തില് ഏറ്റവുമധികം ചര്ച്ചചെയ്യപ്പെടുന്നത്. നാടകത്തിലെ ട്രൂപ്പ് അംഗങ്ങളുമായി പോകുകയായിരുന്ന വാഹനത്തിന് മോട്ടോര് വാഹന വകുപ്പ് ഉദ്യോഗസ്ഥ 24,000 രൂപ പിഴയിട്ടതാണ് ചര്ച്ചയ്ക്ക് വഴിവെച്ചിട്ടുള്ളത്. വാഹനത്തിന് മുകളില് നാടക സമിതിയുടെ പേരെഴുതിയ ബോര്ഡ് വെച്ചതിനാണ് ഉദ്യോഗസ്ഥ കാല്ലക്ഷത്തോളം രൂപ പിഴയിട്ടത്.
ബ്ലാങ്ങാട് നാടകം കളിക്കാനായി ചെറായിയില് നിന്ന് പോയ ആലുവ അശ്വതി നാടക സമിതിയുടെ വാഹനമാണ് ചേറ്റുവ പാലത്തിന് സമീപത്തുനിന്ന് മോട്ടോര് വാഹനവകുപ്പ് പിടികൂടിയത്. ബോര്ഡ് വെച്ചിരിക്കുന്നത് നിയമവിരുദ്ധമാണെന്നും വാഹനത്തിലുള്ള ബോര്ഡിന്റെ പരസ്യതുക അടച്ചിട്ടില്ലെന്നും കാട്ടിയാണ് പിഴയൊടുക്കണമെന്ന് ആവശ്യപ്പെട്ടത്. ഇതിനുശേഷമാണ് വാഹനത്തിലുണ്ടായിരുന്ന ഒരാള് ഇത് മൊബൈലില് പകര്ത്താനാരംഭിച്ചത്. മറ്റൊരു ഉദ്യോഗസ്ഥനെ വിളിച്ച് വാഹനത്തിന്റെ മുകളില് കയറി ബോര്ഡ് അളന്ന ശേഷമാണ് വനിതാ ഇന്സ്പെക്ടര് 24000 രൂപ പിഴ ഈടാക്കിയത്. ഞങ്ങളുടെ നാടകം മുടങ്ങുമെന്നും ഇതൊരു വലിയ തെറ്റൊന്നുമല്ലല്ലോയെന്നും ഒരാള് ഉദ്യോഗസ്ഥയോട് ചോദിക്കുന്നതും വീഡിയോയിലുണ്ട്.
നിയമപരമായ നടപടിയാണ് വനിതാ ഇന്സ്പെക്ടര് സ്വീകരിച്ചതെങ്കിലും സമൂഹമാധ്യമങ്ങളില് വലിയ വിമര്ശനങ്ങളാണ് അവര്ക്കെതിരേ ഉയരുന്നത്. വളരെ ചുരുങ്ങിയ വരുമാനം മാത്രമുള്ള ആളുകളാണ് നടക പ്രവര്ത്തകരെന്നും അവരെ മനപ്പൂര്വ്വം ബുദ്ധമുട്ടിക്കുകയാണ് ഈ ഉദ്യോഗസ്ഥയെന്നുമൊക്കെയാണ് വിമര്ശകരുടെ പക്ഷം. അതേസമയം, സിനിമാ രംഗത്തുനിന്ന് പലരും മോട്ടോര് വാഹന വകുപ്പിനെതിരേ പരസ്യവിമര്ശനവുമായി രംഗത്തെത്തിയിട്ടുണ്ട്. സംവിധാനകന് ഡോ. ബിജു, നടനായ ഹരീഷ് പേരടി എന്നിവരാണ് വകുപ്പിനെയും ഉദ്യോഗസ്ഥരേയും വിമര്ശിച്ച് ഫെയ്സ്ബുക്ക് പോസ്റ്റുള് ഇട്ടിരിക്കുന്നത്.
ഡോ.ബിജുവിന്റെ ഫെയ്സ്ബുക്ക് പോസ്റ്റ്
ആലുവ അശ്വതി തിയറ്റേഴ്സിന്റെ നാടക വണ്ടി മോട്ടോര് വാഹന വകുപ്പ് റോഡില് പരിശോധിക്കുന്നതിന്റെ ഒരു ദൃശ്യം കണ്ടു. വാഹനത്തില് വെച്ചിരിക്കുന്ന നാടക സമിതിയുടെ ബോര്ഡ് അല്പ്പം വലുപ്പം കൂടുതല് ആണത്രേ..ടേപ്പുമായി വണ്ടിയില് വലിഞ്ഞു കയറി ബോര്ഡിന്റെ അളവെടുക്കുന്ന ഉദ്യോഗസ്ഥരെയും ദൃശ്യത്തില് കാണാം. നാടക വണ്ടിയില് നാടക സമിതിയുടെ ബോര്ഡ് വെച്ചത് ഏതാനും സെന്റീമീറ്റര് കൂടിപ്പോയി എന്ന ഭൂലോക ക്രിമിനല് കുറ്റത്തിന് ആ നാടക കലാകാരന്മാര്ക്ക് വലിയ ഒരു തുക പിഴ അടിച്ചു കൊടുക്കുകയും ചെയ്തു. അവരുടെ ഒരു ദിവസത്തെ നാടകത്തിന്റെ മുഴുവന് കാശും കൂട്ടിയാലും വീണ്ടും പിഴ തുകയ്ക്കായി കാശ് കണ്ടെത്തേണ്ടി വരും ആ നാടക കലാകാരന്മാര്ക്ക്..നിയമം ഒക്കെ പാലിക്കുന്നത് കൊള്ളാം പക്ഷെ അത് എല്ലാവര്ക്കും ഒരു പോലെ ആകണം. സര്ക്കാര് വാഹനത്തില് പച്ചക്കറി മേടിക്കാനും , മക്കളെ സ്കൂളില് വിടാനും, വീട്ടുകാര്ക്ക് ഷോപ്പിംഗിനും, ബാഡ്മിന്റണും ഗോള്ഫും കളിക്കാനും പോകുന്ന ഉദ്യോഗസ്ഥരെകൂടി പിടിച്ചു പിഴ ചുമത്തണം, പാവം നാടക കലാകാരന്മാരുടെ വണ്ടിയുടെ ബോര്ഡ് അളക്കാന് കാണിക്കുന്ന ഈ ഉത്സാഹം സിനിമാ താരങ്ങളുടെയും, രാഷ്ട്രീയ നേതാക്കളുടെയും സമൂഹത്തിലെ മറ്റ് ഉയര്ന്ന ആളുകളുടെയും വാഹനങ്ങള് കൂടി പരിശോധിക്കാന് ഉണ്ടാകണം. പറഞ്ഞാല് ഒത്തിരി കാര്യങ്ങള് പറയേണ്ടി വരും..നിയമം നടപ്പിലാക്കേണ്ടത് സാധാരണക്കാരന്റെ മാത്രം നെഞ്ചത്തു കയറിയില്ല..മലയാളിയുടെ സാമൂഹ്യ രാഷ്ട്രീയ സാംസ്കാരിക രംഗത്തു നാടകത്തിനുള്ള സ്ഥാനം ഈ ഉദ്യോഗസ്ഥര്ക്ക് അറിയാന് യാതൊരു സാധ്യതയും ഇല്ലല്ലോ..സാമൂഹ്യ ബോധവും സാംസ്കാരിക ബോധവും എല്ലാവര്ക്കും ഉണ്ടായിക്കൊള്ളണം എന്നില്ലല്ലോ...
ഹരീഷ് പേരടിയുടെ ഫെയ്സ്ബുക്ക് പോസ്റ്റ്
നമുക്ക് ഈ സഹോദരിയെ കഥാപാത്രമാക്കി സത്യസന്ധമായി നിയമം നടപ്പാക്കുന്ന നായികയാക്കി ഒരു സിനിമയെടുക്കാം..ഏതെങ്കിലും സൂപ്പര് നായികമാരെ കൊണ്ട് അഭിനയിപ്പിക്കാം....എന്നിട്ട് ഇവര്ക്ക് കേരളം മുഴുവന് സ്വീകരണം കൊടുക്കാം...കാരണം നാടകവണ്ടിയുടെ ബോര്ഡ് വീണ് ആയിരകണക്കിന് ആളുകള് മരിച്ച നാടല്ലെ കേരളം.. അതിനാല് ഇതിന്റെ വീഡിയോയില് കാണുന്ന നിസ്സഹായരായ നാടകക്കാരെ വില്ലന്മാരാക്കി സമൂഹ മാദ്ധ്യമങ്ങളിലൂടെ തെറി പറയാം...പ്രിയപ്പെട്ട സഹോദരി ഇങ്ങിനെ ആയിരകണക്കിന് നാടക കലാകാരന്മാര് കേരളം മുഴുവന് നാടകബോര്ഡുവെച്ച് തലങ്ങും വിലങ്ങും ഓടിയിട്ടാണ് ഇന്ന് നിങ്ങള് കാണുന്ന കേരളമുണ്ടായത്..ഒരു നാടകം കളിച്ചാല് 500 രൂപ തികച്ച് കിട്ടാത്ത നാടക കലാകാരന്മാരും 5000 രൂപ പോലും ബാക്കിയുണ്ടാവാത്ത നാടകസമതിയുടെ നടത്തിപ്പുകാരനും 24000/- രൂപ കൊടുത്ത തെരുവില് അപമാനിക്കപ്പെടുമ്പോള് നമ്മള് ഇത്രനാളായി ഉണ്ടാക്കിയെടുത്ത സാംസ്കാരിക കേരളമാണ് ലോകത്തിന്റെ മുന്നില് നാണം കെടുന്നത്...വിഡിയോ എടുത്ത ആ സഹോദരന്റെ ഡയലോഗ് ഒരിക്കല് കൂടി ആവര്ത്തിക്കുന്നു...'ഇതിനെതിരെ പ്രതികരിച്ചില്ലെങ്കില് നമ്മളെന്തിനാണ് ഈ പണിയുമായി നടക്കുന്നത് ?
Content Highlights: Motor Vehicle Inspector Give 24000 Rupees Penalty For Drama Troupe Vehicle
Published: 05 Mar 2020, 12:15 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented