ഫ്രഞ്ച് വാഹന നിര്‍മാതാക്കളായ സിട്രോണിന്റെ കൂപ്പെ എസ്.യു.വി. മോഡലായ ബസാള്‍ട്ടിന്റെ പ്രൊഡക്ഷന്‍ മോഡല്‍ ഇന്ത്യയില്‍ പ്രദര്‍ശിപ്പിച്ചു. മുമ്പ് പുറത്തിറക്കിയ കണ്‍സെപ്റ്റ് മോഡലിലെ ഡിസൈനോട് നീതി പുലര്‍ത്തിയാണ് പ്രൊഡക്ഷന്‍ മോഡലും ഒരുക്കിയിരിക്കുന്നത്. വാഹനത്തിന്റെ ഫീച്ചറുകളും ഡിസൈനും മെക്കാനിക്കല്‍ സവിശേഷയും വെളിപ്പെടുത്തിയെങ്കിലും വില സംബന്ധിച്ച വിവരം അവതരണത്തോട് അനുബന്ധിച്ചായിരിക്കും പ്രഖ്യാപിക്കുകയെന്നാണ് റിപ്പോര്‍ട്ട്.
ഇന്ത്യന്‍ നിരത്തുകളില്‍ ശക്തമായ വേരോട്ടം ഉറപ്പാക്കുന്നതിനായി സിട്രോണ്‍ പ്രഖ്യാപിച്ചിട്ടുള്ള സി-ക്യൂബ്ഡ് പ്രോഗ്രാമിന്റെ ഭാഗമായി എത്തിയിട്ടുള്ള നാലാമത്തെ വാഹനമാണ് ബസാള്‍ട്ട്. ഇന്ത്യയില്‍ എത്തിക്കുന്നതിന് പുറമെ, സൗത്ത് അമേരിക്കന്‍ വിപണികളിലും യൂറോപ്യന്‍ നിരത്തുകളിലേക്കും ഈ വാഹനം എത്തിക്കുമെന്നാണ് സിട്രോണ്‍ അറിയിച്ചിരിക്കുന്നത്. ഇന്ത്യയില്‍ ടാറ്റ മോട്ടോഴ്‌സില്‍ നിന്നെത്തുന്ന കര്‍വ് കൂപ്പെ എസ്.യു.വിയായിരിക്കും ഈ വാഹനത്തിന്റെ മുഖ്യ എതിരാളി.
കണ്‍സെപ്റ്റ് മോഡലിനോട് ചേര്‍ന്ന് നില്‍ക്കുന്ന ഡിസൈനില്‍ തന്നെയാണ് ഈ വാഹനവും എത്തിയിരിക്കുന്നത്. സിട്രോണ്‍ വാഹനങ്ങളുടെ സിഗ്നേച്ചര്‍ ഡിസൈനായ ഗ്രില്ല്, എല്‍.ഇ.ഡിയില്‍ ഒരുങ്ങിയിട്ടുള്ള വി ഷേപ്പ് ഡി.ആര്‍.എല്‍, പ്രൊജക്ഷന്‍ സംവിധാനത്തിലുള്ള ഹെഡ്‌ലാമ്പ്, ബ്ലാക്ക് ഫിനീഷിങ്ങ് പ്ലാസ്റ്റിക്കില്‍ ബോക്‌സുകള്‍ പോലെ നല്‍കിയിട്ടുള്ള ഗ്രില്ല്, സ്‌കിഡ് പ്ലേറ്റ് നല്‍കിയിട്ടുള്ള ബമ്പര്‍ എന്നിങ്ങനെയാണ് മുന്‍ഭാഗം ഒരുങ്ങിയിരിക്കുന്നത്. കണ്‍സെപ്റ്റ് മോഡലിലെ ക്രോമിയം ഭാഗങ്ങള്‍ക്ക് പകരം പ്ലാസ്റ്റിക്കാണ് പ്രൊഡക്ഷന്‍ പതിപ്പിലുള്ളത്.
മറ്റ് സിട്രോണ്‍ മോഡലുകളില്‍ നല്‍കിയിട്ടുള്ളതിന് സമാനമായ ഡിസൈനിലാണ് ബസാള്‍ട്ടിലെയും അലോയി വീല്‍ ഒരുക്കിയിരിക്കുന്നത്. ബ്ലാക്ക് ഫിനീഷിങ്ങ് വീല്‍ ആര്‍ച്ചും ഡോര്‍ ക്ലാഡിങ്ങുകളും നല്‍കിയിട്ടുണ്ട്. ചരിഞ്ഞിറങ്ങുന്ന റൂഫ് ലൈനാണ് വശകാഴ്ചയില്‍ ഏറ്റവും അഴകേകുന്നത്. വളരെ ലളിതമായി ഒരുക്കിയിട്ടുള്ള ടെയ്ല്‍ലാമ്പ്, ബസാള്‍ട്ട് ബാഡ്ജിങ്ങ്, സിട്രോണ്‍ ലോഗോ, ഡ്യുവല്‍ ടോണ്‍ നിറങ്ങളിലുള്ള ബമ്പര്‍ എന്നിവയാണ് പിന്‍ഭാഗത്തിന് ഡിസൈന്‍ മികവ് നല്‍കുന്നത്.
ഫീച്ചറുകളുടെ ആധിക്യം ഇല്ലാതെയാണ് ബസാള്‍ട്ടിന്റെ അകത്തളം ഒരുങ്ങിയിരിക്കുന്നത്. സി3 എയര്‍ക്രോസില്‍ നിന്ന് കടംകൊണ്ട ഡാഷ്‌ബോര്‍ഡാണ് ബസാള്‍ട്ടിലും നല്‍കിയിട്ടുള്ളത്. മൂന്ന് നിറങ്ങളാണ് ഇതില്‍ നല്‍കിയിരിക്കുന്നത്. 10.25 ഇഞ്ച് വലിപ്പത്തിലുള്ള ഇന്‍ഫോടെയ്ന്‍മെന്റ് സിസ്റ്റം, ഏഴ് ഇഞ്ച് ഡിജിറ്റല്‍ ഇന്‍സ്ട്രുമെന്റ് ക്ലെസ്റ്റര്‍, ഓട്ടോമാറ്റിക് ക്ലൈമറ്റ് കണ്‍ട്രോള്‍ യൂണിറ്റ്, സി-ക്യൂബ്ഡ് ഡിസൈനില്‍ ഒരുങ്ങിയിട്ടുള്ള എ.സി. വെന്റുകള്‍, മറ്റ് മോഡലുകള്‍ നല്‍കിയിട്ടുള്ള ത്രീ സ്‌പോക്ക് സ്റ്റിയറിങ്ങ് വീലുകള്‍ എന്നിങ്ങനെയാണ് ഇന്റീരിയറിലെ ഫീച്ചറുകള്‍.
മുന്‍നിരയില്‍ താരതമ്യേന വലിപ്പം കൂടിയ ആംറെസ്റ്റാണ് നല്‍കിയിട്ടുള്ളത്. ഉയര്‍ന്ന വേരിയന്റുകളില്‍ ലെതര്‍ സീറ്റുകളും ഒരുങ്ങിയിട്ടുണ്ട്. പിന്‍നിരയിലെ ബെഞ്ച് സീറ്റില്‍ അഡ്ജസ്റ്റ് ചെയ്യാന്‍ സാധിക്കുന്ന തൈസ് സപ്പോര്‍ട്ട് നല്‍കിയിട്ടുണ്ട്. സെഗ്മെന്റിലെ തന്നെ ആദ്യ ഫീച്ചറാണിത്. 15 വോള്‍ട്ട് വയര്‍ലെസ് ചാര്‍ജര്‍, പിന്‍നിര യാത്രക്കാര്‍ക്ക് റൂഫിലും ആംറെസ്റ്റിന്റെ പിന്നിലായും എ.സി.വെന്റുകളും നല്‍കിയിട്ടുണ്ട്. ഇതിനെല്ലാം പുറമെ 470 ലിറ്ററിന്റെ ഉയര്‍ന്ന സ്റ്റേറേജ് സ്‌പേസും ബസാള്‍ട്ട് ഉറപ്പാക്കുന്നുണ്ട്.
മെക്കാനിക്കല്‍ ഫീച്ചറുകളിലും സി3 എയര്‍ക്രോസിനെ ബസാള്‍ട്ട് പിന്തുടരുന്നുണ്ട്. 1.2 ലിറ്റര്‍ നാച്വറലി ആസ്പിരേറ്റഡ്, ടര്‍ബോചാര്‍ജ്ഡ് പെട്രോള്‍ എന്‍ജിനുകളാണ് ഈ വാഹനത്തിന് കരുത്തേകുന്നത്. ഇതിലെ എന്‍.എ. എന്‍ജിന്‍ 82 ബി.എച്ച്.പി. പവറും 115 എന്‍.എം. ടോര്‍ക്കുമാണ് ഉത്പാദിപ്പിക്കുന്നത്. ടര്‍ബോ എന്‍ജിന്‍ 110 ബി.എച്ച്.പി. പവറാണ് ഉത്പാദിപ്പിക്കുന്നത്. ടര്‍ബോ എന്‍ജിനൊപ്പം മാനുവല്‍ ഗിയര്‍ബോക്‌സ് 190 എന്‍.എം. ടോര്‍ക്കും ഓട്ടോമാറ്റിക് ഗിയര്‍ബോക്‌സ് 205 എന്‍.എം. ടോര്‍ക്കുമാണ് ഉത്പാദിപ്പിക്കുന്നത്. എന്‍.എം. എന്‍ജിനൊപ്പം അഞ്ച് സ്പീഡ് മാനുവല്‍ ഗിയര്‍ബോക്‌സ് മാത്രമാണ് നല്‍കുന്നത്.
Content Highlights: Citroen coupe suv Basalt unveiled in India
Published: 03 Aug 2024, 11:38 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented