ജൈവവൈവിധ്യങ്ങളുടെ കലവറയാണ് കണ്ണൂരിലെ മാടായിപ്പാറ. കാക്കപ്പൂവുകൾ പൂത്തുനിൽക്കുന്ന സമയത്ത് മാടായിപ്പാറ സഞ്ചാരികളുടെ സ്വർഗമാവും. ജൂതക്കുളമാണ് സഞ്ചാരികളെ മാടായിപ്പാറയിലേക്ക് ആകർഷിക്കുന്ന മറ്റൊരു ഘടകം. 

To advertise here,

പുരാതന കാലത്ത് ജൂതന്മാർ നിർമിച്ചതെന്ന് വിശ്വസിക്കപ്പെടുന്ന കുളമാണിത്. അങ്ങനെയാണ് ജൂതക്കുളം എന്ന പേരുവന്നത്. ചെങ്കല്ല് തുരന്നെടുത്താണ് ജൂതക്കുളം നിർമിച്ചിരിക്കുന്നത്. ഒരിക്കലും വറ്റാത്ത നീരുറവയാണിത്. 

അറുപതടി നീളവും നാല്പത്തഞ്ചടി വീതിയുമുണ്ട് ഈ നിർമിതിക്ക്. പല നൂറ്റാണ്ടുമുമ്പ് പലായനം ചെയ്ത് ജൂതന്മാർ ഇന്ത്യയിലെത്തി. ഏഴിമലയുടെ സമീപത്തെത്തിയ ജൂതന്മാർക്ക് മൂഷക രാജവംശം മാടായിയിൽ അഭയം നൽകുകയുമായിരുന്നു എന്നാണ് ചരിത്രം.