അബദ്ധത്തിൽ കഴുത്തിൽ ഷാൾ കുരുങ്ങി മരിച്ചുവെന്ന ആദ്യവാർത്ത, പിന്നാലെ ക്രൂരപീഡനമാണ് മരണകാരണമെന്ന പോസ്റ്റ്മോർട്ടം റിപ്പോർട്ട്. ഘാതകൻ തൊട്ടപ്പുറത്തെ മുറിയിലെ യുവാവെന്ന അന്വേഷണറിപ്പോർട്ട്. പ്രതിയായി പിടിക്കപ്പെട്ട 21 കാരൻ രണ്ട് വർഷത്തെ വിചാരണയ്ക്ക് ശേഷം കുറ്റക്കാരനല്ലെന്ന കണ്ടെത്തൽ. 2023 ഡിസംബർ 14 മുതൽ ആ കേസിൽ പ്രതിയില്ല. കുഞ്ഞ് കൊല്ലപ്പെട്ടതാണെന്ന് വിധിന്യായത്തിൽ പറയുമ്പോഴും ആര് കൊന്നെന്ന് മാത്രം ഉത്തരം കണ്ടെത്തി വണ്ടിപ്പെരിയാറിലെ ആറുവയസുകാരിക്ക് നീതി ഉറപ്പാക്കാൻ ഭരണകൂടത്തിനോ നിയമസംവിധാനത്തിനോ ഇന്നോളമായിട്ടില്ല. 

To advertise here,

12 വർഷത്തെ കാത്തിരിപ്പിന് ശേഷം കിട്ടിയ പൊന്മകളാണ് ആ അച്ഛനും അമ്മയ്ക്കും നഷ്ടമായത്. അന്നു തൊട്ടിന്നോളം ആ വീട്ടിൽ ചിരി ഉയർന്നിട്ടില്ല...സ്വന്തം മകളുടെ ഘാതകൻ പുറത്ത് സുഖമായുറങ്ങുമ്പോൾ അവർക്കെങ്ങനെ ജീവിക്കാനാകും? കഴിഞ്ഞ ഒരു വർഷമായി പുനർവിചാരണയ്ക്കും പുനരന്വേഷണത്തിനുമായി പെൺകുട്ടിയുടെ കുടുംബം മുട്ടാത്ത വാതിലുകളില്ല. കയറാത്ത നിയമസംവിധാനങ്ങളുമില്ല. അന്ന് വെറുതെവിട്ടുവെന്ന വിധി കേട്ട് കട്ടപ്പന പോക്സോ അതിവേഗകോടതിക്ക് മുന്നിൽ തലതല്ലി കരഞ്ഞ ആ അമ്മ വണ്ടിപ്പെരിയാറിൽ ഇപ്പോഴുമുണ്ട്. വേദനയിലൊരംശം പോലും കുറയാതെ. ക്രൂരപീഡനമേറ്റ് കൊല ചെയ്യപ്പെട്ടത് പെറ്റുപോറ്റിയ മകളാണ്... ആ വേദനയ്ക്ക് പകരം വെയ്ക്കാൻ ഏത് വാക്കുണ്ട്? 

78 ദിവസത്തിനകം കുറ്റപത്രം സമർപ്പിച്ച് പോലീസ് മിടുക്ക് കാണിച്ച കേസ്. പോലീസിന്റെ ജാഗ്രതയെ വാനോളം പുകഴ്ത്തി സർവരും. പക്ഷേ, കോടതിയിൽ ആ ശുഷ്‌കാന്തി ശ്ലാഘിക്കപ്പെട്ടില്ല. പകരം നിരത്തപ്പെട്ടത് വീഴ്ചകളുടെ നീണ്ടനിര. പ്രതിയാക്കപ്പെട്ടയാൾ കുറ്റക്കാരനല്ലെന്ന് വിധിച്ച് വെറുതെ വിട്ടിട്ട് വർഷം ഒന്ന് കഴിയുന്നു. പ്രതി കുറ്റക്കാരനാണെന്ന് തെളിയിക്കുന്ന ശാസ്ത്രീയ തെളിവുകളൊന്നും തന്നെ ഹാജരാക്കാൻ പോലീസിനായില്ലെന്നായിരുന്നു വിധി പ്രസ്താവിച്ച കോടതിയുടെ കണ്ടെത്തൽ. എന്നാൽ കുറ്റവിമുക്തനാക്കപ്പെട്ട അവൻ തന്നെയാണ്‌ പ്രതിയെന്ന് ഇന്നും ഉറച്ചു വിശ്വസിക്കാൻ പെൺകുട്ടിയുടെ അച്ഛനും അമ്മയ്ക്കും സഹോദരനും മാത്രമല്ല, സുഹൃത്തുക്കൾക്ക് പോലും  കാരണങ്ങളുണ്ട്.

കേസന്വേഷണത്തിലെ പാളിച്ചകൾ കോടതി പോലീസിനെതിരേ അക്കമിട്ട് നിരത്തുമ്പോൾ, പ്രോസിക്യൂഷന്റെ വാദങ്ങൾ ശക്തമല്ലെന്ന് നിയമവിദഗ്ധർ ചൂണ്ടിക്കാട്ടുമ്പോൾ എസ്റ്റേറ്റ് ലയത്തിലെ ചെറിയ മുറിയിൽ ഇപ്പോഴും കണ്ണീരുണങ്ങാതെ ഇരിപ്പുണ്ടവർ.  

'തോട്ടം തൊഴിലാളികളുടെ ഉച്ചഭക്ഷണസമയമാണ് 11 മുതൽ ഒരുമണി വരെ. അന്ന് രാവിലെ ട്യൂഷന് പോയ കുഞ്ഞിനെ കൂട്ടിക്കൊണ്ട വരാൻ പന്ത്രണ്ടരയോടെ ഞാൻ മോനെ പറഞ്ഞയച്ചു. തൊട്ടു താഴെ മുറിയിലാണ് കുഞ്ഞിന്റെ അച്ഛന്റെ സഹോദരനും ഭാര്യയും മുത്തശ്ശനും മുത്തശ്ശിയും താമസം. വന്നപ്പോഴേ ബാഗുമായി അങ്ങോട്ട് പോയി ഭക്ഷണം കഴിച്ചാണ് ഇങ്ങോട്ട് മോൾ വരുന്നത്. ഭക്ഷണം കഴിച്ച് തിരികെപോവുമ്പോൾ ദാ.. ഈ പടിക്കെട്ടിൽ നിന്ന് പോയ് വാ അമ്മാന്ന് പറഞ്ഞ് ടാറ്റാ തരുന്നതാണ് എന്റെ കണ്ണിലെ അവസാന കാഴ്ച... അപ്പോഴും മോൾടെ അരികിൽ അവനുണ്ടായിരുന്നു. എന്നിട്ടാണ് പോലീസ് ചോദിച്ചപ്പോ അവൻ കുഞ്ഞിനെ അന്ന് കണ്ടില്ലെന്ന് പറഞ്ഞത്'. പ്രതിയെക്കുറിച്ചു മകളെക്കുറിച്ചും അന്ന് നടന്ന സംഭവങ്ങളെക്കുറിച്ചും കുട്ടിയുടെ അമ്മ പറയുന്നു 

'അവനൊരിക്കലും അങ്ങനെയൊന്നും ചെയ്യാനാവില്ലെന്ന് ഉറച്ചു വിശ്വസിച്ചവരാണ് ഞങ്ങൾ. ഒരു കുടുംബം പോലെ കഴിഞ്ഞവർ. അവനെ കസ്റ്റഡിയിലെടുത്ത വിവരമറിഞ്ഞ് അച്ഛനും അമ്മയും പൊട്ടിക്കരയുന്നത് കണ്ടിട്ട് പോലീസ് അടിച്ച് സമ്മതിപ്പിച്ചതാണെങ്കിൽ സ്റ്റേഷനിൽ പോയി അവനെ ഞങ്ങൾക്ക് സംശയമില്ലെന്ന് പറയാമെന്നും പറഞ്ഞതാ. പിറ്റേന്ന് തെളിവെടുപ്പിന് കൊണ്ടുവരുമ്പോഴും അവൻ ചെയ്തില്ലെന്ന് വിളിച്ചു പറയുമെന്ന് ഞങ്ങളെല്ലാവരും കരുതി. ഒന്നുമുണ്ടായില്ല. ഹീറോ പോലെ വന്ന് എല്ലാം വള്ളി പുള്ളി വിടാതെ പറഞ്ഞു. ജനലിൽ ഇറങ്ങുന്നത് വരെ കാണിച്ചു. അവൻ ചെയ്തിട്ടില്ലെങ്കിൽ ഇവനിതെങ്ങനെ പറഞ്ഞു? അവനെയിനി വേണ്ട, കൊന്നേക്ക് എന്നാണ് അവന്റെ അപ്പൻ അന്ന് പറഞ്ഞത്. എന്നിട്ട് അതേ മനുഷ്യൻ അവനെ ഇറക്കാൻ ചെലവാക്കിയത് ലക്ഷങ്ങളാ' 

വിധിക്കെതിരേ അപ്പീൽ നൽകി കാത്തിരിക്കുന്നതിനിടെയാണ് കുഞ്ഞിന്റെ അച്ഛൻ ബന്ധുവിനാൽ ആക്രമിക്കപ്പെടുന്നത്. കേസും കൂട്ടവുമായി നടക്കുന്നതിനിടെ മാസങ്ങളോളം കിടപ്പിലുമായി. 'എല്ലാത്തിനും ഓടാൻ അച്ഛനേ ഉള്ളൂ എന്നയാൾക്കറിയാം. അദ്ദേഹത്തിനെന്തെങ്കിലും പറ്റിയാൽ കേസ് നടത്താൻ ആരുമില്ല്. അതവർക്കറിയാം' പെൺകുട്ടിയുടെ അമ്മ പറയുന്നു 

'സ്വാഭാവിക മരണം' കൊലപാതകമായപ്പോൾ 

2021 ജൂൺ 30-നാണ് എസ്റ്റേറ്റ് ലയത്തിൽ ആറ് വയസുകാരിയെ കഴുത്തിൽ ഷാൾ കുരുങ്ങി മരിച്ചനിലയിൽ കണ്ടെത്തിയത്. കളിക്കുന്നതിനിടെ അബദ്ധത്തിൽ ഷാൾ കുരുങ്ങി മരണം സംഭവിച്ചതാകാമെന്നായിരുന്നു പ്രാഥമിക നിഗമനം. എന്നാൽ, കുഞ്ഞിനെ ആദ്യം പരിശോധിച്ച ഡോക്ടറുടെ ജാഗ്രത ഒന്നുകൊണ്ട് മാത്രമാണ് വെറുമൊരു സ്വാഭാവികമരണത്തിലേക്കൊതുങ്ങിപ്പോകുമായിരുന്ന മരണം ക്രൂരകൊലപാതകക്കേസിലേക്ക് വഴിതിരിഞ്ഞത്. കുഞ്ഞിന്റെ മരണത്തിൽ അസ്വഭാവികതയുണ്ടെന്ന് ആദ്യം പറയുന്നതും അതേ ഡോക്ടറാണ്. ഡോ.ഡോൺബോസ്‌കോ. 'കഴുത്തിൽ ഷാൾ കുരുങ്ങി മരിച്ച കുഞ്ഞിനെ' എന്തിനാണ് പോസ്റ്റ്‌മോർട്ടം ചെയ്യുന്നതെന്നായിരുന്നു ബന്ധുക്കളുടെ ചോദ്യം. അന്ന് ആശുപത്രി പരിസരത്ത് അതിൽ മുന്നിൽനിന്നവരിൽ ഒരാളും ഇതേ അർജുൻ സുന്ദറാണെന്ന് ബന്ധുക്കൾ ഓർക്കുന്നു. അമ്മയുടെ ഷാളെടുത്ത് കളിക്കുന്ന ശീലമുണ്ടായിരുന്നു കുഞ്ഞിന്. അറിയാതെ എങ്ങാൻ കുരുങ്ങിപ്പോയതാണെന്ന് കുടുംബം ധരിച്ചതും അതുകൊണ്ടാണ്. എന്നാൽ ഡോ.ഡോൺബോസ്‌കോ തന്റെ നിലപാടിലുറച്ച് നിൽക്കുകയും പോലീസിനെ വിവരമറിയിക്കുകയും ചെയ്തു

അന്ന് ബന്ധുക്കളുടെ ആവശ്യം മാനിച്ച് വാഴൂർ സോമൻ എം.എൽ.എയും കുഞ്ഞിന്റെ മൃതശരീരം വിട്ടുനൽകാൻ ആശുപത്രി അധികൃതരോട് ആവശ്യപ്പെട്ടിരുന്നു. തമിഴ് സമുദായത്തിന്റെ പതിവനുസരിച്ച് ചെറിയ കുട്ടികളുടെ പോസ്റ്റുമോർട്ടം നടത്തുന്ന പതിവില്ല. കുട്ടിയുടെ മാതാപിതാക്കൾ സ്വാഭാവികമരണമാണെന്നും ബോഡി വിട്ടുതരണമെന്നും ആവശ്യപ്പെട്ടതനുസരിച്ചാണ് വിട്ടു നൽകാൻ ആവശ്യപ്പെട്ടതെന്ന് വാഴൂർ സോമൻ പിന്നീട് മാധ്യമങ്ങളോട് പറഞ്ഞു. കേസിൽ അസ്വഭാവികതയുണ്ടെന്ന് പോലീസ് ഉദ്യോഗസ്ഥൻ ടി.ഡി സുനിൽകുമാർ പറഞ്ഞതനുസരിച്ച് താനാ ഉദ്യമത്തിൽ നിന്ന് പിന്മാറിയെന്നും വാഴൂർ സോമൻ പറയുന്നു 

കുഞ്ഞ് മരണപ്പെട്ടതിന്റെ കാരണം പറഞ്ഞില്ലെങ്കിലും അന്നുതന്നെ പോലീസ് സംഭവം നടന്ന ലയത്തിലെത്തുകയും ക്രൈംസീൻ സീൽ ചെയ്യുകയും ചെയ്തു. 2021 ജൂലൈ ഒന്നിന്, അതായത് കുഞ്ഞ് മരിച്ചതിന്റെ പിറ്റേദിവസമായിരുന്നു പോസ്റ്റ് മോർട്ടം. അതേദിവസം വൈകിട്ട് കുഞ്ഞിനെ അടക്കുകയും ചെയ്തു

ജൂലായ് മൂന്നിന് ലഭിച്ച പോസ്റ്റ്‌മോർട്ടം റിപ്പോർട്ടിൽ പീഡനം നടന്നതായി തെളിഞ്ഞതോടെയാണ് കേസിന്റെ ഗതി മാറിയത്. സംശയമുള്ളവരെ ചോദ്യം ചെയ്തതോടെയാണ് മൊഴിയിലെ വൈരുദ്ധ്യം കണക്കിലെടുത്ത് തൊട്ടടുത്ത ലയത്തിൽ താമസിക്കുന്നയാളിലേക്ക്‌ പോലീസിന്റെ ശ്രദ്ധ തിരിയുന്നത്. സംഭവദിവസം കുട്ടിയുടെ സഹോദരൻ അടക്കമുള്ളവർക്കൊപ്പമുണ്ടായിരുന്ന അയാൾ, കുട്ടി മരണപ്പെട്ടതായി കരുതുന്ന സമയം അവർക്കൊപ്പം ഇല്ലാതിരുന്നതും സംശയത്തിന് ആക്കംകൂട്ടി. 

മിഠായി നൽകി കുട്ടിയെ നിരന്തരം ഉപയോഗിച്ചിരുന്നതായും സംഭവദിവസം കുഞ്ഞിനെ ലൈംഗികമായി ഉപദ്രവിക്കുകയും ബോധരഹിതയായതോടെ ഷാൾ മുറുക്കി കൊലപ്പെടുത്തി കെട്ടിത്തൂക്കിയായിരുന്നുവെന്നും ചോദ്യം ചെയ്യലിൽ പ്രതി സമ്മതിച്ചതായും പോലീസ് റിപ്പോർട്ടിൽ പറയുന്നു. തുടർന്ന് വീടിന്റെ ജനലിലൂടെ രക്ഷപ്പെട്ട ഇയാൾ തൊട്ടപ്പുറത്തെ സ്വന്തം വീട്ടിലെത്തിയ ശേഷം പെൺകുട്ടിയുടെ സഹോദരനടക്കം മുടിവെട്ടിക്കൊണ്ടരുന്നിടത്തേക്ക് പോവുകയും പിന്നീട് കുഞ്ഞിനെ ആശുപത്രിയിലെത്തിക്കാനടക്കം മുന്നിൽ നിൽക്കുകയും സംസ്‌കാരച്ചടങ്ങുകളിലടക്കം ഭാവവ്യത്യാസമില്ലാതെ പങ്കെടുത്തെന്നുമായിരുന്നു കുറ്റപത്രം. 

മറക്കാനാവില്ല ആ ദിനം 

അച്ഛനും അമ്മയും ജോലിക്ക് പോവുന്നതിനാൽ തൊട്ടുമുന്നിലെ ലയത്തിൽ താമസിക്കുന്ന അച്ഛന്റെ സഹോദരനും ഭാര്യയ്ക്കുമൊപ്പമായിരുന്നു കുഞ്ഞ് അധികസമയവും. കുഞ്ഞുങ്ങളില്ലാതിരുന്ന അവർക്കും അവളായിരുന്നു ആശ്വാസവും. അന്ന് പക്ഷേ, മുൻപ് ജോലിചെയ്തിരുന്ന കടയിൽ പോകേണ്ട ആവശ്യമുണ്ടായിരുന്നതിനാലാണ് വളർത്തമ്മ കുഞ്ഞിനെ സഹോദരനൊപ്പം നിർത്തിയതെന്നും ബന്ധുക്കൾ പറയുന്നു

12 വയസിന്റെ വ്യത്യാസമുണ്ട് സഹോദരനും പെൺകുട്ടിയും തമ്മിൽ. അനുജത്തിയെ ജീവനായിരുന്നു അവന്. ചേട്ടനെ കണ്ടാൽ കിറുക്കനെപ്പോലുണ്ട്. പോയി മുടിവെട്ടാൻ പറ എന്ന് പറഞ്ഞ് തന്റെ അടുക്കലേക്ക് അനുജത്തിയെ പറഞ്ഞയച്ചത് അർജുനാണെന്ന് സഹോദരൻ പറയുന്നു. അവളുടെ നിർബന്ധം സഹിക്കവയ്യാതെയാണ് സഹോദരനും രണ്ട് കൂട്ടുകാരും അർജുനൊപ്പം മുടിവെട്ടാനായി വീടിന് സമീപത്തെ മരച്ചോട്ടിലേക്ക് പോയതെന്നാണ് സഹോദരന്റെ സാക്ഷ്യം. അർജുന്റെ അച്ഛൻ സമീപത്ത് വിറക് കീറുന്നുമുണ്ടായിരുന്നു. മുടിവെട്ടാൻ പോകുമ്പോൾ കുഞ്ഞ് ടിവി കാണുകയായിരുന്നെന്നും സഹോദരൻ പറയുന്നു. ലയത്തോട് ചേർന്നുകിടക്കുന്ന സ്ഥലമാണെങ്കിലും ചെടികളുടെ മറവുള്ളതിനാൽ കുഞ്ഞ് ഇരിക്കുന്ന ഭാഗത്തേക്ക് നേരിട്ട് നോട്ടമെത്തുമായിരുന്നില്ല

മുടിവെട്ടിക്കഴിഞ്ഞ അർജുന്റെ തന്നെ ആവശ്യപ്രകാരം വെള്ളം കൊണ്ടുവരാനായി എല്ലാവരും ഇറങ്ങുമ്പോഴാണ് കുളിക്കാനായി വിളിച്ചിട്ട് കുഞ്ഞിനെ കാണുന്നില്ലെന്ന് പറഞ്ഞ് മുത്തശ്ശി കരയുന്നത്. ലയത്തിലെ  മുറി അകത്തുനിന്ന് കൊളുത്തിട്ട നിലയിലായിരുന്നു. കൊളുത്തഴിച്ചതും കുഞ്ഞിനെ ആശുപത്രിയിലെത്തിച്ചതും സഹോദരനും അർജുനും അർജുന്റെ അച്ഛനുമടങ്ങുന്ന ബന്ധുക്കളും അയൽക്കാരുമാണ്. 

'ആശുപത്രിയിൽനിന്ന് ഞങ്ങൾ എത്തുമ്പോഴേക്കും പോലീസ് വീട് സീൽ ചെയ്തിരുന്നു. പക്ഷേ, പോലീസ് പിറ്റേ ദിവസം മാത്രമാണ് സ്ഥലത്തെത്തിയതെന്നാണ് വിധിയിൽ പറഞ്ഞത്. അത് സത്യമല്ല. പോലീസ് എല്ലാം പൂട്ടിയിരുന്നു. പക്ഷേ സി.എയെ ഞാൻ കാണുന്നതും എന്നോട് കാര്യങ്ങൾ ചോദിക്കുന്നതും പിറ്റേന്നാണ്. കുഞ്ഞിന്റെ അടക്കം കഴിഞ്ഞ് രാത്രി അർജുൻ എന്റടുത്ത് കട്ടിലിൽ വന്നിരുന്ന് കുറേ കരഞ്ഞു. പക്ഷേ, ആ വരവ് കുഞ്ഞിന് കൊടുത്ത മിഠായിയുടെ കടലാസ് എടുത്തു കളയാനാണെന്ന് പോലീസിനോട് പറഞ്ഞപ്പോഴാണ് ഞങ്ങളറിയുന്നത്' 

പോലീസ് അർജുനെ പ്രതിയാക്കിയപ്പോൾ അർജുൻ തന്നെയാണ് പ്രതിയെന്ന വിശ്വാസത്തിലേക്ക് കുട്ടിയുടെ സഹോദരനെ എത്തിച്ച പ്രധാന ഘടകം അർജുൻ സഹോദരനു മുന്നിൽ വെച്ച ഒരാവശ്യമായിരുന്നു. പോലീസ് ചോദിച്ചാൽ മുടിവെട്ടുന്ന സമയത്ത് എല്ലാവരും ഒരുമിച്ചുണ്ടായിരുന്നുവെന്ന് പറയണമെന്നതായിരുന്നു അർജുന്റെ ആവശ്യം. മാത്രമല്ല, സംഭവദിവസം കുഞ്ഞിനെ കണ്ടിരുന്നില്ലെന്ന അർജജുന്റെ മൊഴിയും കുരുക്കായി. ഒരാൾ മരിച്ചാൽ നമ്മളവസാനം കണ്ട ദിനമായിരിക്കില്ലേ ആദ്യമോർമ്മവരിക എന്ന കോമൺസെൻസിൽ പിടിക്കപ്പെട്ട കള്ളം. 

'അറുപതോളം പേരുടെ മൊഴി അന്നെടുത്തിരുന്നു. എല്ലാവരോടും കുഞ്ഞിനെക്കുറിച്ചും ചോദിച്ചിരുന്നു. അർജുൻ മാത്രമാണ് അന്ന് കുഞ്ഞിനെ കണ്ട കാര്യം പറയാതിരുന്നത്. ഇതാണ് പോലീസിന് അവനിൽ സംശയമുണ്ടാക്കിയ ആദ്യത്തെ കാര്യം. അറിയാതെ എങ്ങാനും പറഞ്ഞുപോയതാണോ എന്നറിയാൻ പോലീസ് പലതവണ ചോദിച്ചു. അപ്പോഴും കുഞ്ഞിനെ കണ്ടില്ലെന്നാണ് അവൻ പറഞ്ഞത്. നിന്റെ പെരിയമ്മ നിന്നെ കണ്ടതായി പറഞ്ഞല്ലോ എന്ന് പറഞ്ഞതും അവൻ ഞങ്ങളിരിക്കുന്നിടത്തേക്ക് ഓടി വന്നു. പോലീസ് ചോദിച്ചപ്പോ കുഞ്ഞിനെ കണ്ട കാര്യം പറയാൻ ഞാൻ മറന്നു അപ്പാ, ഞാനിനി പ്രതിയാകുമോ' എന്ന് ചോദിച്ച് അവൻ കരയാൻ തുടങ്ങി. 'നീയെന്തിനാ അതിന് പേടിക്കുന്നതെന്ന്' ഞങ്ങളിലൊരാൾ ചോദിക്കുകയും ചെയ്തു

അർജുൻ സ്ഥിരമായി മിഠായി വാങ്ങിയിരുന്നുവെന്ന കടക്കാരന്റെ സാക്ഷ്യപ്പെടുത്തലും സാഹചര്യത്തെളിവായി. അന്നും അർജുൻ മിഠായി വാങ്ങിയിരുന്നെന്നും കടക്കാരൻ മൊഴി നൽകി. പക്ഷേ ആ മൊഴി കള്ളമാണെന്ന് അർജുൻ ഒരു മാധ്യമത്തോട് പറഞ്ഞു

കടക്കാരന് ഇവനെതിരേ മൊഴി പറയേണ്ട ആവശ്യമെന്താണ്? ഇവൻ തന്നെയാണ് അവരെ കോടതി കയറ്റിയത്. അവൻ തന്നെയല്ലേ അവിടുന്നാണ് മിഠായി വാങ്ങാറെന്ന് പോലീസിനോട് പറഞ്ഞത്. അന്നേ ദിവസം കുഞ്ഞിനൊപ്പം അവനെ കണ്ടിരുന്നുവെന്ന് ഭാര്യ മാത്രമല്ല, അർജുന്റെ പെരിയമ്മ (അച്ഛന്റെ ജ്യേഷഠന്റെ ഭാര്യ)യും പറഞ്ഞിരുന്നല്ലോ. അവരും കള്ളം പറഞ്ഞതാണോ അപ്പോൾ?', കുട്ടിയുടെ അച്ഛൻ

കോടതിയിലെന്ത് സംഭവിച്ചു? 

90 ദിവസം കഴിഞ്ഞാൽ പ്രതിക്ക് സ്വാഭാവികജാമ്യം ലഭിക്കാനുള്ള സാധ്യതപോലും നൽകാതെയാണ് കൊലപാതകം, ബലാത്സംഗം ഉൾപ്പെടെയുള്ള വകുപ്പുകൾ ചുമത്തി 78 ദിവസത്തിനകം അന്വേഷണസംഘം കുറ്റപത്രം സമർപ്പിച്ചത്. അന്ന് പോലീസ് കാണിച്ച ജാഗ്രതയെ സകലരും അഭിനന്ദിച്ചു. ദൃക്‌സാക്ഷികളില്ലാത്ത കേസിൽ സാഹചര്യത്തെളിവുകളും ശാസ്ത്രീയ തെളിവുകളുമായിരുന്നു പ്രോസിക്യൂഷൻ ഹാജരാക്കിയത്. സാഹചര്യത്തെളിവുകൾ എതിരാവുകയും സാക്ഷികൾ കൂറുമാറുകയും ചെയ്യാത്ത കേസിൽ പക്ഷേ, ശാസ്ത്രീയ തെളിവുകൾ തിരിച്ചടിയായി. 

ഡി.എൻ.എ. അടക്കമുള്ള പരിശോധനകളിൽ വ്യക്തതയില്ലാതായതോടെയാണ് കേസിൽ പ്രതിയെ കോടതി വെറുതെവിട്ടത്. പിഴച്ചത് അന്വേഷണം നടത്തിയ പൊലീസ് സംഘത്തിനാണോ കേസ് വാദിച്ച പബ്ലിക് പ്രോസിക്യൂട്ടർക്കാണോ വിധിപ്രസ്താവിച്ച കോടതിക്കാണോ എന്ന ചർച്ച മുൻപെങ്ങുമില്ലാത്ത വിധം ഉയർന്നുവന്നു. 

വിധിന്യായത്തിൽ പാകപ്പിഴകൾ ഏറെയുണ്ടെന്ന് വാദിക്കുന്നു അന്വേഷണ ഉദ്യോഗസ്ഥരും വീട്ടുകാരും. ലയത്തിൽ കുഞ്ഞ് മരിച്ചുകിടന്ന പൂജാമുറിയിലെ ജനാലയെക്കുറിച്ചുള്ള പരാമർശമാണ് അതിൽ ഏറ്റവും പ്രധാനം. പ്രതി രക്ഷപ്പെട്ടു എന്ന് പറയപ്പെടുന്ന ജനാല അടഞ്ഞു കിടക്കുന്നു എന്നായിരുന്നു കുറ്റപത്രം. പക്ഷേ തുറന്നുകിടപ്പുണ്ടായിരുന്നെന്നായിരുന്നു സാക്ഷി മൊഴി. പുറത്തുനിന്ന് നോക്കിയാൽ ജനാല അഞ്ചരയടി ഉയരത്തിലുള്ള ജനാലയിലൂടെ പ്രതി എങ്ങനെ രക്ഷപ്പെടുമെന്നും കോടതി ചോദിച്ചു. വീടിന്റെ പിന്നിൽ തോട്ടമാണ്. അതുകൊണ്ട് പിന്നിലെ വാതിലിൽക്കൂടി ഇറങ്ങുന്നതായിരുന്നില്ലേ 'സുരക്ഷിതവും സൗകര്യപ്രദവു'മെന്നായിരുന്നു വിധിന്യായത്തിൽ കോടതിയുടെ ചോദ്യം. ജൂലായ് മൂന്നിനാണ് അന്വേഷണോദ്യോഗസ്ഥൻ വീണ്ടും കുഞ്ഞിന്റെ വീട് സന്ദർശിച്ച് പൂജാമുറിയിലെ കട്ടിലിൽനിന്ന് ബെഡ്ഷീറ്റ്, ഒരു തോർത്ത്, കത്തി എന്നിവ കസ്റ്റഡിയിലെടുക്കുന്നത്. അത് സീൽ ചെയ്യാതെയാണ് എടുത്തത്. രണ്ടുദിവസംമുൻപ് സീൻ മഹസർ തയ്യാറാക്കിയപ്പോൾത്തന്നെ ഇവയൊന്നും ഉദ്യോഗസ്ഥൻ കണ്ടിരുന്നില്ലെന്ന് കോടതിയുടെ കുറ്റപ്പെടുത്തൽ.

കേസിൽ എസ്.സി/എസ്.ടി പീഡനനിരോധന നിയമം ചുമത്തില്ലെന്നതാണ് പോലീസിനെതിരേ വന്ന മറ്റാരു ആരോപണം. എന്നാൽ പ്രതിയും കുട്ടിയും ബന്ധുക്കളും ഒരേ സമുദായത്തിൽ വരുന്നതിനാലാണ് ആ വകുപ്പ് ചേർക്കാതിരുന്നതെന്നാണ് പോലീസ് ഭാഷ്യം. സ്‌കൂൾ സർട്ടിഫിക്കറ്റ് അനുസരിച്ച് അർജുൻ എസ്.സി വിഭാഗത്തിലാണ് വരികയെന്നും പോലീസ് പറയുന്നു. എസ്.സി/എസ്.ടി പീഡനനിരോധന നിയമമനുസരിച്ചാണെങ്കിൽ കേസന്വേഷിക്കേണ്ടത് ഉഥടജ ആണെന്നും വണ്ടിപ്പെരിയാർ സംഭവത്തിൽ അതുണ്ടായില്ലെന്നും നിയമവിദഗ്ധർ ചൂണ്ടിക്കാട്ടുന്നുണ്ട്. 

ഡിസംബർ 14ന് കട്ടപ്പന പോക്സോ അതിവേഗ കോടതിക്ക് മുന്നിൽ വിധികാത്ത് നിന്ന ഒരാൾപോലും പ്രതി അർജുൻസുന്ദറിനെ വെറുതെ വിടുന്ന ഒരുരംഗം സ്വപ്നത്തിൽപോലും വിചാരിച്ചിരുന്നില്ല. സാഹചര്യത്തെളിവുകളും സാക്ഷിമൊഴികളും ശാസത്രീയ തെളിവുകളും പ്രതിയെ ശിക്ഷിക്കാൻ പര്യാപ്തമാണെന്ന് പോലീസിന്റെ ഓവർ കോൺഫിഡൻസ് കൂടിയാണ് അന്നവിടെ തകർന്നുപോയത്. ഞെട്ടിക്കുന്ന വിധിയിൽ പോലീസിനേയും പ്രോസിക്യൂട്ടർക്കുമെതിരേ വിമർശനങ്ങളുടെ പെരുമഴ തന്നെയുണ്ടായി. കേസന്വേഷണത്തിൽ വീഴ്ചപറ്റിയിട്ടില്ലെന്നും അപ്പീൽ നൽകുമെന്നുമായിരുന്നു സർക്കാർ നിലപാട്. എന്നാൽ നിയമസഭയിൽ പ്രതിപക്ഷ പ്രതിഷേധത്തിനൊടുവിൽ വിധി വന്ന് ഒന്നരമാസത്തിന് ശേഷം കേസന്വേഷിച്ച എസ്എച്ച്ഒ ടിഡി സുനിൽകുമാറിനെ ആഭ്യന്തരവകുപ്പ് സസ്പെൻഡ് ചെയ്തു. 

ഫൊറൻസിക് സർജന്റെയും സാക്ഷികളുടെയും മൊഴികളുടെ അടിസ്ഥാനത്തിൽ, ആറുവയസ്സുതികയാത്ത ആ കുഞ്ഞ് ആത്മഹത്യചെയ്തതല്ലെന്ന് കോടതി കണ്ടെത്തിയിട്ടുണ്ട്. നരഹത്യയാണ് എന്ന പ്രോസിക്യൂഷൻ വാദം ശരിവെച്ചിട്ടുമുണ്ട്. എന്നാൽ, ലോലമായ സാങ്കേതികബലത്തിൽ പ്രതിയെ കുറ്റവിമുക്തനാക്കിയ വിധി നിലനിൽക്കില്ലെന്ന് വിശ്വസിക്കുകയാണ് കുടുംബം. ഒപ്പം പോലീസിന് അൽപംകൂടി ജാഗ്രതയാകാമായിരുന്നെന്നും കുടുംബം പറയുന്നു 

കേസ് അട്ടിമറിക്കാനുള്ള നീക്കം പോലും പെൺകുട്ടിയുടെ കുടുംബം സംശയിക്കുന്നുണ്ട് ഇപ്പോൾ. സർക്കാർ നിയോഗിച്ച പബ്ലിക് പ്രോസിക്യൂട്ടറിൽ തൃപ്തിയില്ലെന്നും കേസിലെ പോരായ്മകളും കുടുംബം മുഖ്യമന്ത്രിയെ നേരിൽ കണ്ട് അറിയിച്ചിരുന്നു. കുടുംബത്തിന് അവരാവശ്യപ്പെട്ട പ്രോസിക്യൂട്ടറെ വച്ച് നൽകാമെന്നും മുഖ്യമന്ത്രിയുടെ ഓഫീസ് അറിയിച്ചു. എന്നാൽ കേസ്  ഇപ്പോഴും കോടതിമുറിയിലെ ഫയലിലുറങ്ങുകയാണെന്ന വേദനയിലാണ് കുടുംബം. 

In Short | The Vandiperiyar rape and murder case involves the tragic death of a six-year-old girl in June 2021, initially thought to be an accidental hanging. The autopsy later confirmed sexual assault and murder, leading to the arrest of a 21-year-old relative, Arjun. However, after two years of trial, a POCSO court acquitted him in December 2023, citing a lack of conclusive scientific evidence and prosecution failures. The case triggered public outrage and allegations of police negligence, with the Kerala government now appealing the verdict. Meanwhile, tensions escalated when a relative of the acquitted man attacked the victim's father and grandfather, further intensifying demands for justice.