വിവാഹമോ കുട്ടികളോ വേണ്ട...പുരുഷന്മാരുമായി ഡേറ്റിങ്ങിനോ ലൈംഗികബന്ധത്തിനോ പോലും താത്പര്യമില്ല....യുഎസിൽ ട്രംപ് വീണ്ടും അധികാരത്തിൽ വന്നതിന് പിന്നാലെ അമേരിക്കയിൽ ശക്തമാവുകയാണ് 4ബി പ്രസ്ഥാനം. ലിംഗസമത്വം പാലിക്കാത്ത വ്യവസ്ഥകളോടുള്ള ഒരു കൂട്ടം സ്ത്രീകളുടെ പ്രതിഷേധം.  

To advertise here,

ട്രംപ് വിജയമുറപ്പിച്ചതോടെ ഗൂഗിൾ സെർച്ചിൽ 4ബി പ്രസ്ഥാനത്തെക്കുറിച്ച് 48 മണിക്കൂറിനുള്ളിൽ തിരഞ്ഞത് അഞ്ച് ലക്ഷം പേരാണ്. തീർന്നില്ല ടിക്ടോകിലും എക്‌സിലും ഫോർബിയെ പ്രോത്സാഹിപ്പിച്ച് സ്ത്രീകൾ രംഗത്തെത്തി. ലിംഗസമത്വം, ഗർഭഛിദ്ര നിയന്ത്രണം എന്നീ വിഷയങ്ങളോടുള്ള ട്രംപിന്റെ നിലപാടും  റിപ്പബ്ലിക്കൻ പാർട്ടിയുടെ പുരുഷാധിപത്യ- സ്ത്രീവിരുദ്ധ നയങ്ങളിലുള്ള പ്രതിഷേധമാണ് ഫോർബി പ്രസ്ഥാനത്തിലേക്കെത്തിച്ചത്.

സത്യത്തില് എന്താണ് ഈ 4ബി പ്രസ്ഥാനം? എവിടെയാണ് ഈ പ്രസ്ഥാനത്തിന്റെ തുടക്കം

വാസ്തവത്തിലെ ട്രംപിനോടുള്ള എതിർപ്പിൽ രൂപപ്പെട്ടതല്ല ഫോർബി. വർഷങ്ങൾക്ക് മുൻപ് ദക്ഷിണ കൊറിയയിലാണ് 4B പ്രസ്ഥാനത്തിന്റെ തുടക്കം. 4ബി എന്നാൽ 4 ബികൾ. കൊറിയൻ ഭാഷയിൽ ബി എന്നാൽ നോ എന്നാണർഥം. വിവാഹം, പ്രസവം, പ്രണയം, ലൈംഗികബന്ധം എന്നിവയോടാണ് ഇവിടെ നോ പറയുന്നത്. മാത്രമല്ല ഇത് നാല് കൊറിയൻ പദങ്ങളെയും സൂചിപ്പിക്കുന്നു. 1. bihon  എതിർ ലിംഗത്തിൽപ്പെട്ടവരുമായി വിവാഹമില്ല; 2. bichulsan  പ്രസവിക്കില്ല; 3.  biyeonae - ഇനി ഡേറ്റിങ് ഇല്ല; 4. bisekseu  എതിർ ലിംഗത്തിലുള്ളവരുമായി ലൈംഗിക ബന്ധങ്ങൾ പാടില്ല. അതായത്, 4B  അനുയായികൾ എതിർലിംഗത്തിൽപ്പെട്ടവരെ വിവാഹം കഴിക്കുകയോ സെക്‌സേലേർപ്പെടുകയോ പ്രസവിക്കുകയോ ചെയ്യില്ല. പുരുഷന്മാരുമായുള്ള ലൈംഗികവും സാമൂഹികവുമായ അടിമത്തം പൂർണ്ണമായും ഉപേക്ഷിക്കാനാണ് 4 ബി ആഹ്വാനം ചെയ്യുന്നത്.

തുടക്കം കൊറിയയിൽ

2010-ൽ ദക്ഷിണ കൊറിയയിൽ ഫെമിനിസത്തിൽ താത്പര്യം വർധിച്ചതോടെയാണ് 4ബി പ്രസ്ഥാനവും തുടങ്ങുന്നത്. എന്നാൽ പ്രസ്ഥാനത്തിന് ആക്കം കൂട്ടിയത് 2016-ൽ സിയോൾ സബ്വേ സ്റ്റേഷനിലെ ടോയ്ലറ്റിൽ യുവതി കൊല്ലപ്പെട്ടതും സ്ത്രീകളുടെ ഒളിക്യാമറാ ദൃശ്യങ്ങൾ വ്യാപകമായി പ്രചരിച്ചതുമാണ്. സ്ത്രീകളുടെ ബാത്ത്‌റൂമിൽ നിന്നും ലൈംഗികബന്ധത്തിനിടയിൽ നിന്നുള്ള ദൃശ്യങ്ങൾ വ്യാപകമായി പങ്കുവെക്കുകയും വിൽക്കുകയും ചെയ്തു. അപരിചിതർക്ക് പുറമെ അവർക്ക് അറിയാവുന്ന പുരുഷന്മാരും ഇതിനുപിന്നിലുണ്ടായിരുന്നതും പോലീസ് ഇരകൾക്കെതിരായ നിലപാട്് സ്വീകരിച്ചതും സ്ത്രീകളെ അരക്ഷിതരാക്കി.
ആരെ വിശ്വസിക്കുമെന്ന് സ്വയം ചോദിച്ച സ്ത്രീകൾ പുരുഷന്മാരിൽ നിന്നും സ്വയം വിട്ടുനിന്നു. ഇതിനിടെ ആർട്ട് ക്ലാസിൽ പങ്കെടുത്ത പുരുഷമോഡൽ  ജനനേന്ദ്രിയം മറയ്ക്കാതിരുന്നത് ചിത്രീകരിച്ച യുവതിയെ അറസ്റ്റ് ചെയ്തത് സ്ത്രീകൾ ചോദ്യം ചെയ്തു. ഇരട്ടത്താപ്പാണെന്ന് അവർ കുറ്റപ്പെടുത്തി. സ്ത്രീകൾക്ക് അവരുടെ നിരാശകൾ പങ്കുവെക്കാനും പുരുഷാധിപത്യ നിയമങ്ങളെ വിമർശിക്കാനും പ്രതിഷേധങ്ങൾ സംഘടിപ്പിക്കാനുമുള്ള ഇടങ്ങളായി ഓൺലൈൻ പ്ലാറ്റ്ഫോമുകൾ മാറി. പതിയെ യുവതികൾക്ക് തങ്ങളുടെ അതൃപ്തിയും രോഷവും പ്രകടിപ്പിക്കാനുള്ള ഒരു മാധ്യമമായി 4B പ്രസ്ഥാനം മാറി. സമാന്തരമായി ഉയർന്നുവന്ന MeToo പ്രസ്ഥാനവും ഫോർബിയുടെ ശക്തികൂട്ടി.

എന്തുകൊണ്ട് കൊറിയ?

ഒരു പുരുഷാധിപത്യ സമൂഹമാണ് ദക്ഷിണ കൊറിയയിലേത്. ലിംഗം, സൗന്ദര്യ സാമ്പത്തിക അസമത്വങ്ങൾ, സാംസ്‌കാരിക സമ്മർദ്ദങ്ങൾ, വീട്ടിലെ അസ്ഥിരത, ഡിജിറ്റലായുള്ള ലൈംഗിക അതിക്രമങ്ങൾ തുടങ്ങി ദക്ഷിണ കൊറിയയിലെ സ്ത്രീകൾ നേരിടുന്നത് നിരവധി പ്രശ്‌നങ്ങളാണ്. മക്കളെ നോക്കേണ്ടതും വീട്ടുജോലികൾ ചെയ്യേണ്ടതുമെല്ലാം അവിടെ സ്ത്രീയുടെ കടമയാണ്. ജോലിക്ക് പോകുന്ന സ്ത്രീയും ഇതെല്ലാം ചെയ്യേണ്ടിവരുമ്പോൾ അവരുടെ ജോലിഭാരം ഇരട്ടിയാവുകയാണ്. പുരുഷന്മാരേക്കാൾ കൊറിയയിലെ സ്ത്രീകൾ മൂന്നര മടങ്ങ് അധികം ജോലികൾ വീട്ടിൽ ചെയ്യുന്നുണ്ടെന്നാണ് ഔദ്യോഗിക കണക്കുകൾ സൂചിപ്പിക്കുന്നത്. ജോലിക്കുപോകുന്ന സ്ത്രീക്കും പുരുഷനും ലഭിക്കുന്ന വേതനത്തിന്റെ കാര്യത്തിലും വലിയ അന്തരമുണ്ട്.

നോ മാത്രമല്ല

പുരുഷന്മാരെ വെറുക്കുന്ന കുടുംബജീവിതം നശിപ്പിക്കാൻ ആഗ്രഹിക്കുന്ന സ്ത്രീകളുടെ വികലമായ ഒരു പ്രസ്ഥാനമെന്നാണ് 4ബിക്കെതിരെ ഉയരുന്ന പ്രധാന വിമർശനം. പക്ഷേ പുരുഷന്മാരോട് നോ പറയുന്നത് മാത്രമല്ല, അതിനുമപ്പുറം ചില കാര്യങ്ങൾ കൂടെ 4ബി മൂവ്‌മെന്റിലുണ്ട്.

ഭാര്യ, അമ്മ എന്നതിനപ്പുറത്തേക്ക് സ്ത്രീകളുടെ ലോകം വിശാലമാകണം. അത് സാധ്യമാകുന്നത് വേലിക്കെട്ടുകളില്ലാത്ത പുരുഷനിയന്ത്രണമില്ലാത്ത, ഇടങ്ങളിലാണെന്ന് ഫോർബി വാദിക്കുന്നു. വീട്ടുജോലികൾപ്പുറം അവനവനായി സമയം കണ്ടെത്തുന്ന സ്ത്രീകളത്രയും ഈ വേലിക്കെട്ടിന് പുറത്താണെന്നും ഫോർബി അനുയായിതൾ വിശ്വസിക്കുന്നു. പരസ്പരം താങ്ങാവുക എന്നുകൂടി ഉദ്ദേശിച്ച് ലെസ്ബിയൻ റിലേഷൻഷിപ്പുകളേയും ഫോർബി പ്രോത്സാഹിക്കുന്നു.

4B ചിലപ്പോൾ 6B4T ആയി വിപുലപ്പെടാറുണ്ട്. അതായത് സ്ത്രീവിരുദ്ധമായി കരുതപ്പെടുന്ന സ്ഥാപനങ്ങളിൽ നിന്ന് അകന്നു നിൽക്കുക, ഫാന്റം സംസ്‌കാരം നിരസിക്കുക, പുരുഷകേന്ദ്രീകൃത സൗന്ദര്യസങ്കൽപ്പങ്ങൾ നിരസിക്കുക എന്നിവയെല്ലാം ഉൾപ്പെടുന്നതാണിത്.

കുറയുന്ന ജനനനിരക്ക്

ദക്ഷിണ കൊറിയയിൽ ജനന നിരക്ക് കുറയുന്നതിൽ ഒരു കാരണമായി ചൂണ്ടിക്കാട്ടുന്നത് 4ബി പ്രസ്ഥാനമാണ്. ലോകത്തിലെ ഏറ്റവും കുറഞ്ഞ ജനനനിരക്കുള്ള രാജ്യങ്ങളിലൊന്നാണ് ദക്ഷിണ കൊറിയ. ഏകദേശം 42% ഇവിടെ കുടുംബങ്ങളും ഒറ്റയ്ക്ക് താമസിക്കുന്നവരാണ്. സിയോളിൽ, 40% യുവാക്കൾ കഴിഞ്ഞ വർഷം ലൈംഗിക ബന്ധത്തിൽ ഏർപ്പെട്ടിട്ടില്ലെന്നും സ്ത്രീകളുടെ താൽപ്പര്യക്കുറവാണ് ഇതിന്റെ പ്രധാന കാരണമെന്നുമാണ് റിപ്പോർട്ടുകള് സൂചിപ്പിക്കുന്നത്. 4B-പ്രസ്ഥാനത്തിലല്ലെങ്കിലും പരമ്പരാഗത ചട്ടകൂടിലൊതുങ്ങാതെ സ്വതന്ത്രപാതയിൽ തന്നെയാണ് മിക്ക സ്ത്രീകളും.

യുഎസിൽ 4B ആദ്യമായിട്ടോ?

ഒരിക്കലുമില്ല. 4B യ്ക്ക് മുൻപ് അമേരിക്കൻ സോഷ്യൽ മീഡിയയിൽ 'ബോയ്സോബർ' എന്നൊരു ട്രെൻഡ് ഉണ്ടായിരുന്നു. സ്ത്രീകൾ സ്വന്തം സന്തോഷത്തിനും ക്ഷേമത്തിനും സുരക്ഷയ്ക്കും മുൻഗണന നൽകാൻ പുരുഷന്മാരുമായുള്ള പ്രണയ, ലൈംഗിക ബന്ധങ്ങളിൽ നിന്ന് വിട്ടുനിൽക്കുന്നതായിരുന്നു ഈ ട്രെൻഡ്. അതുപോലെ 1960 കളുടെ അവസാനത്തിലും 1970 കളുടെ തുടക്കത്തിലും യുഎസിൽ സെൽ 16 പ്രസ്ഥാനം ഉണ്ടായിരുന്നു. സ്ത്രീകൾ ബ്രഹ്‌മചര്യം പാലിക്കണമെന്നും പുരുഷന്മാരിൽ നിന്ന് അകന്നുനിൽക്കണമെന്നും കരാട്ടെ പോലുള്ള സ്വയം പ്രതിരോധത്തിന്റെ ആയോധനരീതികൾ പഠിക്കണമെന്നുമായിരുന്നു ആ പ്രസ്ഥാനം വാദിച്ചത്.

ഫോർബി പ്രസ്ഥാനങ്ങളോട് അത്ര അനുകൂല പ്രതികാരണമല്ല സമൂഹത്തിൽ നിന്നുണ്ടായിട്ടുള്ളത്. സോഷ്യൽമീഡിയ ബുള്ളിയിങ്ങിനപ്പുറം യുക്തിസഹജമായ വിമർശനങ്ങളും പ്രസ്ഥാനത്തിനെതിരെ ഉയരുന്നുണ്ട്. പുരുഷന്മാരുടെ ചിന്താഗതിയിൽ മാറ്റമുണ്ടാക്കുന്നതിന് പകരം അവരിൽ നിന്ന് അകന്നു നിൽക്കേണ്ട ബാധ്യത കൂടി സ്ത്രീയുടെ മേൽ ചുമത്തുകയാണെന്നും പുരുഷന്മാരോടുള്ള സമ്പർക്കം കുറയ്ക്കുന്നത് പ്രശ്‌നത്തിനൊരു പരിഹാരമല്ലെന്നുമാണ് പ്രധാന വിമർശനം. ട്രംപ് അധികാരത്തിലെത്തിയാൽ തങ്ങളുടെ പ്രത്യുൽപാദന അവകാശങ്ങൾ കുറയുമെന്ന ആശങ്കയാണ് യുഎസിലെ സ്ത്രീകളെ 5ബി പ്രസ്ഥാനത്തിലേക്ക് ആകർഷിപ്പിച്ചത്. എന്തായാലും ഇനി യുഎസിനെ ഈ പ്രസ്ഥാനം സ്വാധീനിക്കുമോയെന്ന് കാണണം.

Inshort: The 4B movement, originating in South Korea, encourages women to reject marriage, childbirth, dating, and sex with men. Learn its origins, ideology, and impact on modern society.

Producer- Aswathi Ayanikkal
Camera- Shaheer CH
Edit- Anandrag K