ലോകശ്രദ്ധയാകര്‍ഷിച്ച വിനോദസഞ്ചാരകേന്ദ്രം, പക്ഷേ ഒരു പാലം ഇന്നാട്ടുകാര്‍ക്ക് നടക്കാത്ത മനോഹര സ്വപ്‌നം

പാലത്തിന് തടസ്സം ഒരു കാക്കത്തുരുത്തുകാരനും വക്കീലും

എം.എല്‍.എ. ആയി ചുമതലയേറ്റതു മുതല്‍ കാക്കത്തുരുത്ത് പാലത്തിനായി അഹോരാത്രം പണിപ്പെട്ടു. ആദ്യം ഒരു കാര്‍ട്ടബിള്‍ പാലം പണിയാന്‍ തുക അനുവദിപ്പിച്ചു. പിന്നെ വലിയ വാഹനങ്ങള്‍ പോകുന്ന പാലം തീര്‍ക്കാന്‍ തുക അനുവദിപ്പിച്ചു. അതിനുള്ള തൂണുകളും നാട്ടിത്തുടങ്ങി. മൊത്തം ദ്വീപ് നിവാസികള്‍ പാലത്തിനായി രംഗത്തിറങ്ങി. അപ്രോച്ച് റോഡിന് ഒരാള്‍ ഒഴികെ എല്ലാവരും സ്ഥലം തന്നു. അനുമതി നല്‍കാത്തയാളെ അനുനയിപ്പിക്കാന്‍ എല്ലാവിധ ശ്രമവും നടത്തി. അന്നത്തെ ഡെപ്യൂട്ടി കളക്ടര്‍ വരെ പ്രശ്‌നത്തിലിടപെട്ടു. വിട്ടുതരുന്ന സ്ഥലത്തിന് മികച്ച പ്രതിഫലം വാഗ്ദാനം ചെയ്തു. എന്നാല്‍ കേസിനുവേണ്ടി ദാഹിക്കുന്ന ഒരു വക്കീലുമായി കൂട്ടുചേര്‍ന്ന് ഒരു കാക്കത്തുരുത്തുകാരന്‍ പാലമെന്ന സ്വപ്നത്തെ തകിടം മറിച്ചിരിക്കുകയാണ്. തികച്ചും രാഷ്ട്രീയമായ കാരണങ്ങളാല്‍ വികസന വിരോധികളായാല്‍ എങ്ങനെ പുരോഗതിയുണ്ടാകും.

- എ.എം. ആരിഫ് എം.പി.

ഉടന്‍ വേണ്ടത് ഒരു നടപ്പാലം

കൊട്ടിഘോഷിക്കപ്പെട്ട രണ്ട് പാലങ്ങളായിരുന്നു പെരുമ്പളത്തേയും കാക്കത്തുരുത്തിലേയും. എന്നാല്‍ ഇത് രണ്ടും തുടങ്ങുന്നതിനുള്ള പ്രാഥമിക നടപടികള്‍ പോലും ആയിട്ടില്ല. നാട്ടുകാര്‍ക്കും വിനോദസഞ്ചാരികള്‍ക്കും സുന്ദര ദ്വീപിലേക്ക് എളുപ്പത്തില്‍ എത്തിച്ചേരാന്‍ മാര്‍ഗങ്ങളൊന്നുമില്ല. നിര്‍ദിഷ്ട പാലം പണിക്കായി കാത്തുനില്‍ക്കാതെ ഒരു നടപ്പാലത്തിനായി ആസ്തി വികസന ഫണ്ടില്‍നിന്ന് ഒരു കോടി രൂപ മാറ്റിവെച്ചിട്ടുണ്ട്. ഹൗസ് ബോട്ടുകള്‍ക്ക് അടിയിലൂടെ സഞ്ചരിക്കാന്‍ പറ്റിയ തരത്തില്‍ നടപ്പാലത്തിനുള്ള ഫീസിബിലിറ്റി സ്റ്റഡി നടന്നു. അധികം താമസമില്ലാതെ പാലം പണി പൂര്‍ത്തിയാക്കാനുള്ള നടപടിയുമായി മുന്നോട്ടു പോകും.

- ഷാനിമോള്‍ ഉസ്മാന്‍ എം.എല്‍.എ.

പാലം പണി തിരഞ്ഞെടുപ്പ് പ്രഹസനം

കാക്കത്തുരുത്ത് നിവാസികളുടെ സ്വപ്നപദ്ധതിക്കായി ചെലവഴിച്ച പണം നഷ്ടമായിരിക്കുകയാണ്. പാലം പണി തിരഞ്ഞെടുപ്പ് പ്രഹസനമായി മാറിക്കഴിഞ്ഞു. പാലത്തിനായി തൂണുകള്‍ നാട്ടുന്നതിനു മുമ്പേ മുഴുവന്‍ പേരുടെയും കണ്‍സെന്റ് വാങ്ങാതിരുന്നതാണ് പ്രശ്‌നമായത്. രമ്യമായ രീതിയില്‍ പ്രശ്‌നം പരിഹരിക്കാന്‍ കഴിഞ്ഞില്ല. ആവശ്യമായ നഷ്ടപരിഹാരം കൊടുത്ത് പാലം യാഥാര്‍ഥ്യമാക്കാന്‍ കൂട്ടായ ശ്രമം വേണം. എന്തായാലും ദ്വീപ് നിവാസികളുടെ ചിരകാല അഭിലാഷത്തെ രാഷ്ട്രീയ മുതലെടുപ്പിന് വേദിയാക്കരുത്.

- എന്‍.പി. തമ്പി

ആടിനെ തൂപ്പുകാണിച്ച് കൊണ്ടുപോകും പോലെയാണ് കാക്കത്തുരുത്ത് പാലം നിര്‍മാണം

തിരഞ്ഞെടുപ്പ് അടുക്കുമ്പോള്‍ ഇതാ നിങ്ങളുടെ പാലം പണി തുടങ്ങാന്‍ പോകുന്നു എന്നുള്ള പതിവ് കസര്‍ത്തുകളല്ലാതെ ഒന്നും നടക്കുന്നില്ല.

പാലത്തിനായി തറച്ച തൂണുകളും തുരുത്തുനിവാസികളെ കഷ്ടത്തിലാക്കുകയാണ്. തൂണുകളില്‍ തടഞ്ഞുനില്‍ക്കുന്ന പായല്‍ക്കൂട്ടം മൂലം ആകെയുള്ള വഞ്ചിയാത്രയും നടത്താന്‍ പറ്റാതായി.

എന്തായാലും കാക്കത്തുരുത്തില്‍ ജനിച്ചു വളര്‍ന്ന ഞങ്ങള്‍ക്ക് ഇവിടം വിട്ടുപോകാനാകുന്നില്ല. ഇനിയെങ്കിലും തുരുത്തുനിവാസികളോട് കരുണ കാട്ടണം.

- സുദേവന്‍, ഫൊട്ടോഗ്രാഫര്‍ കാക്കത്തുരുത്ത്