ജപ്പാനിലെ കുടിയേറ്റ നിയമങ്ങളിൽ അടുത്തിടെ വരുത്തിയ മാറ്റങ്ങൾ ഇന്ത്യക്കാർക്ക് രാജ്യത്ത് പെർമനന്റ് റെസിഡൻസി (പിആർ) നേടുന്നത് വളരെ എളുപ്പവും ചെലവ് കുറഞ്ഞതുമാക്കി. പിആർ അപേക്ഷയ്ക്കുള്ള ഫീസ് ഇപ്പോൾ വെറും 8,000 യെൻ (ഏകദേശം 5,000 രൂപ) മാത്രമാണ്.

To advertise here,

ഇത് വിദഗ്ദ്ധ തൊഴിലാളികൾക്കും ദീർഘകാല താമസക്കാർക്കും ജപ്പാനിൽ നിയന്ത്രണങ്ങളില്ലാതെ താമസിക്കാനും ജോലി ചെയ്യാനും പഠിക്കാനും അവസരം നൽകുന്നു. കുറഞ്ഞുവരുന്ന ജനസംഖ്യ, അതിവേഗം പ്രായമാകുന്ന തൊഴിൽ സമൂഹം തുടങ്ങിയ ഗുരുതരമായ ജനസംഖ്യാപരമായ ആശങ്കകളാണ് ജപ്പാന്റെ ഈ തീരുമാനത്തിന് പിന്നിൽ. സ്ഥിരതാമസത്തിനുള്ള നടപടികൾ ലഘൂകരിക്കുന്നതിലൂടേയും അപേക്ഷാ ഫീസ് കുറയ്ക്കുന്നതിലൂടെയും ലോകമെമ്പാടുമുള്ള വിദഗ്ധരെ ആകർഷിക്കാൻ സർക്കാർ ലക്ഷ്യമിടുന്നു.

യോഗ്യതാ മാനദണ്ഡങ്ങൾ 

സാധാരണയായി, ജപ്പാനിൽ സ്ഥിരതാമസം ഉറപ്പാക്കാൻ കുറഞ്ഞത് അഞ്ച് വർഷമെങ്കിലും നിയമപരമായ വർക്ക് വിസയിലോ ഫാമിലി വിസയിലോ ഉൾപ്പെടെ പത്ത് വർഷം തുടർച്ചയായി രാജ്യത്ത് താമസിക്കേണ്ടതുണ്ട്. എന്നിരുന്നാലും, പ്രത്യേക മാനദണ്ഡങ്ങൾ പാലിക്കുന്നവർക്ക് ഈ കാത്തിരിപ്പ് കാലയളവ് ഗണ്യമായി കുറയ്ക്കുന്നതിനുള്ള എളുപ്പവഴികൾ ലഭ്യമായേക്കാം.

വേഗത്തിലുള്ള വഴികൾ

ജപ്പാനിലെ പോയിന്റ് അടിസ്ഥാനമാക്കിയുള്ള സംവിധാനം ഉയർന്ന വൈദഗ്ധ്യമുള്ള പ്രൊഫഷണലുകൾക്ക് വേഗത്തിലുള്ള മാർഗം നൽകുന്നു. 70 പോയിന്റോ അതിൽ കൂടുതലോ നേടുന്നവർക്ക് മൂന്ന് വർഷം തുടർച്ചയായി താമസിച്ചതിന് ശേഷം സ്ഥിരതാമസത്തിന് യോഗ്യത നേടാം. 80 പോയിന്റോ അതിൽ കൂടുതലോ നേടുന്നവർക്ക് ഒരു വർഷത്തിനുള്ളിൽ തന്നെ അപേക്ഷിക്കാൻ അർഹതയുണ്ടായേക്കാം.

മറ്റ് യോഗ്യതാ മാർഗങ്ങൾ

കുടുംബബന്ധങ്ങൾ വഴിയും സ്ഥിരതാമസം നേടാവുന്നതാണ്. ഒരു വ്യക്തി ജാപ്പനീസ് പൗരന്റെയോ നിലവിലുള്ള സ്ഥിരതാമസക്കാരന്റെയോ പങ്കാളിയാണെങ്കിൽ, വിവാഹം കഴിഞ്ഞ് മൂന്ന് വർഷം പൂർത്തിയാക്കുകയും അപേക്ഷകൻ കുറഞ്ഞത് ഒരു വർഷമെങ്കിലും ജപ്പാനിൽ താമസിക്കുകയും ചെയ്തിട്ടുണ്ടെങ്കിൽ അങ്ങനെയുള്ള വ്യക്തിക്ക് പിആറിന് അർഹതയുണ്ട്.

അതുപോലെ, ജാപ്പനീസ് പൗരന്മാരുടേയോ സ്ഥിരതാമസക്കാരുടെയോ മക്കൾക്ക് ഒരു വർഷത്തെ തുടർച്ചയായ താമസത്തിന് ശേഷം അപേക്ഷിക്കാം. ഏത് മാർഗത്തിലൂടെയാണെങ്കിലും, അപേക്ഷകർ സാമ്പത്തിക ഭദ്രത തെളിയിക്കുകയും കുറ്റമറ്റ ക്രിമിനൽ റെക്കോർഡ് ഉണ്ടായിരിക്കുകയും നികുതി, സാമൂഹിക സുരക്ഷാ ബാധ്യതകൾ സ്ഥിരമായി പാലിക്കുന്നുണ്ടെന്ന് കാണിക്കുകയും വേണം.

അപേക്ഷാ നടപടിക്രമം

ജപ്പാനിൽ സ്ഥിരതാമസത്തിന് അപേക്ഷിക്കുന്നത് ലളിതമായ ഒരു പ്രക്രിയയാണ്. എന്നിരുന്നാലും എല്ലാ രേഖകളും ശ്രദ്ധയോടെ കൈകാര്യം ചെയ്യേണ്ടതുണ്ട്.

പൂർണമായി പൂരിപ്പിച്ച പിആർ അപേക്ഷാ ഫോം, റെസിഡൻസ് കാർഡിനൊപ്പം സാധുവായ പാസ്‌പോർട്ട്, നികുതി രേഖകൾ അല്ലെങ്കിൽ പേ സ്ലിപ്പുകൾ പോലുള്ള സ്ഥിരവരുമാനത്തിന്റെ തെളിവുകൾ, പെൻഷൻ, ആരോഗ്യ ഇൻഷുറൻസ് പേയ്‌മെന്റുകളുടെ തെളിവ്, ഒരു ജാപ്പനീസ് പൗരനിൽ നിന്നോ നിലവിലുള്ള സ്ഥിരതാമസക്കാരനിൽ നിന്നോ ഉള്ള ഗ്യാരണ്ടി ലെറ്റർ എന്നിവ അത്യാവശ്യ രേഖകളിൽ ഉൾപ്പെടുന്നു.

വിദേശ ഭാഷയിലുള്ള ഏതൊരു രേഖകൾക്കൊപ്പവും ഔദ്യോഗിക ജാപ്പനീസ് വിവർത്തനങ്ങൾ ഉണ്ടായിരിക്കണം.പരിശോധനാ കാലയളവ് സാധാരണയായി നാല് മുതൽ എട്ട് മാസം വരെയാണ്. ഈ സമയത്ത് അപേക്ഷകർക്ക് സാധുവായ വിസ ഉണ്ടായിരിക്കണം.

അംഗീകാരം ലഭിച്ചുകഴിഞ്ഞാൽ സ്ഥിരതാമസം വിസ പുതുക്കേണ്ടതിന്റെ ആവശ്യകത ഇല്ലാതാക്കുന്നു. നിയന്ത്രണങ്ങളില്ലാത്ത തൊഴിലവസരങ്ങൾ നൽകുന്നു. കൂടാതെ വായ്പകളും മോർട്ട്ഗേജുകളും ഉൾപ്പെടെയുള്ള സാമ്പത്തിക സേവനങ്ങൾ നേടുന്നത് എളുപ്പമാക്കുകയും ചെയ്യും.