ബഹിരാകാശ സഞ്ചാരികളുടെ പരിശീലനം, ദൗത്യം നടപ്പാക്കല്‍, ഗവേഷണ പരീക്ഷണങ്ങള്‍ എന്നിവയ്ക്കായി യൂറോപ്യന്‍ സ്‌പേസ് ഏജന്‍സി (ഇഎസ്എ) യും ഐഎസ്ആര്‍ഒയും തമ്മില്‍ കരാര്‍. ഐസ്ആര്‍ഒ ചെയര്‍മാനും ബഹിരാകാശ വകുപ്പ് സെക്രട്ടറിയുമായ ഡോ. എസ് സോമനാഥും ഇഎസ്എ ഡയറക്ടര്‍ ജനറല്‍ ഡോ. ജോസഫ് അഷ്ബാച്ചറുമാണ് കരാറില്‍ ഒപ്പുവെച്ചത്.
മനുഷ്യരെ ബഹിരാകാശത്തെത്തിക്കുന്നതിനുള്ള ഇന്ത്യയുടെ ഭാവി ദൗത്യങ്ങള്‍ മുന്നില്‍ കണ്ടുകൊണ്ടാണ് ഈ കരാര്‍. ബഹിരാകാശ ദൗത്യങ്ങളുടെ ഗവേഷണങ്ങള്‍ക്കും പര്യവേക്ഷണങ്ങള്‍ക്കുമായി അന്താരാഷ്ട്ര ബഹിരാകാശ നിലയത്തിലെ ഇഎസ്എയുടെ സൗകര്യങ്ങള്‍ ഇന്ത്യയ്ക്ക് പ്രയോജനപ്പെടുത്താനാവും. മനുഷ്യരുടെ ബഹിരാശ യാത്രയ്ക്കുള്ള പരിശീലനങ്ങള്‍ സംയുക്ത വിദ്യാഭ്യാസം മറ്റ് പ്രവര്‍ത്തനങ്ങള്‍ എന്നിവയില്‍ രണ്ട് ബഹിരാകാശ ഏജന്‍സികളും സഹകരിക്കും.
വരാനിരിക്കുന്ന ആക്‌സിയം-4 ദൗത്യത്തില്‍ ഐഎസ്ആര്‍ഒയുടെ സഞ്ചാരിയും ഇഎസ്എയുടെ സഞ്ചാരിയും ബഹിരാകാശ നിലയത്തിലേക്ക് പുറപ്പെടും. രണ്ട് ഏജന്‍സികളും ചേര്‍ന്നുള്ള ശാസ്ത്ര പരീക്ഷണങ്ങളില്‍ ഇരുവരും സഹകരിക്കും.
ഇഎസ്എ കൗണ്‍സിലില്‍ സംസാരിച്ച ഡോ സോമനാഥന് നന്ദി അറിയിച്ച അഷ്ബാച്ചര്‍ ഈ കരാര്‍ രണ്ട് ഏജന്‍സികള്‍ തമ്മിലുള്ള സഹകരണത്തിന് ശക്തമായ അടിത്തറ പാകുമെന്ന് അഭിപ്രായപ്പെട്ടു. ആക്‌സിയം 4 ദൗത്യത്തിനായുള്ള സംയുക്ത പ്രവര്‍ത്തനങ്ങളുടെ പുരോഗതിയില്‍ ഇരു ഏജന്‍സികളുടെയും നേതൃത്വം സംതൃപ്തി രേഖപ്പെടുത്തിയെന്നും ഭാവിയില്‍ മനുഷ്യ ബഹിരാകാശ യാത്രാ മേഖലയില്‍ സഹകരണ പ്രവര്‍ത്തനങ്ങള്‍ തുടരേണ്ടതിന്റെ ആവശ്യകത അടിവരയിടുകയും ചെയ്തുവെന്നും ഐഎസ്ആര്‍ഒ പറഞ്ഞു.
Content Highlights: ISRO and ESA sign agreement for astronaut training, mission operations, and research
Published: 21 Dec 2024, 07:59 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented