വിവാഹേതര ബന്ധങ്ങൾ വിവാദങ്ങളായതിന് പിന്നാലെ ജെൻസെൻ ഹുവാങ് സിഇഒ സ്ഥാനം ഒഴിഞ്ഞതോടെ, എൻവിഡിയയുടെ ഇടക്കാല സിഇഒ ആയി ചുമതലയേൽക്കുകയാണ് കമ്പനിയുടെ ചീഫ് ഫിനാൻഷ്യൽ ഓഫീസറായ കോളെറ്റ് ക്രെസ്. വ്യാഴാഴ്ചയാണ് കമ്പനി ഇക്കാര്യം പ്രഖ്യാപിച്ചത്. സിഇഒ ചുമതലയ്ക്കൊപ്പം നിലവിലെ ചുമതലകളിലും അവർ തുടരും.

To advertise here,

ജെൻസെൻ ഹുവാങ്ങിന്റെ രണ്ട് വിവാഹേതര ബന്ധങ്ങളെക്കുറിച്ചുള്ള റിപ്പോർട്ടുകൾ വലിയ വിവാദമായതോടെയാണ് സിഇഒ സ്ഥാനം രാജിവെച്ചൊഴിയാൻ അദ്ദേഹം നിർബന്ധിതനായത്. ഇതിൽ ചൈനീസ് ചാരയാണെന്ന് ആരോപിക്കപ്പെടുന്ന ആലിസ് ഹുവാങ് എന്ന സ്ത്രീയുമായുള്ള ബന്ധവും ഉൾപ്പെടുന്നു. വിവാദങ്ങളുണ്ടായതിന് പിന്നാലെ കമ്പനിയുടെ ഓഹരിയിൽ വൻ ഇടിവുണ്ടായിരുന്നു. ഇതിന് പിന്നാലെ ഹുവാങ്ങിന്റെ സിഇഒ സ്ഥാനം നഷ്ടമായേക്കുമെന്ന റിപ്പോർട്ടുകൾ വന്നിരുന്നു.

ആരാണ് കോളെറ്റ് ക്രെസ്

എൻവിഡിയയുടെ ഇടക്കാല സിഇഒ ആയി ചുമതലയേൽക്കുന്ന കോളെറ്റ് ക്രെസ് കമ്പനിയുടെ സാമ്പത്തിക വിഭാഗത്തെ ഒരു പതിറ്റാണ്ടിലേറെയായി നയിക്കുന്ന വ്യക്തിയാണ്. 2013 സെപ്റ്റംബറിലാണ് എക്സിക്യുട്ടീവ് വൈസ് പ്രസിഡന്റായും ചീഫ് ഫിനാൻഷ്യൽ ഓഫീസറായും (CFO) അവർ എൻവിഡിയയിൽ ചേർന്നത്. അന്നുമുതൽ ഇതേസ്ഥാനത്ത് തുടരുകയാണ്. സിഇഒ ജെൻസെൻ ഹുവാങ്ങിനൊപ്പം മാധ്യമങ്ങളെയും നിക്ഷേപകരെയും അഭിസംബോധന ചെയ്യാറുള്ള വ്യക്തികൂടിയാണ് ക്രെസ്.

എൻവിഡിയയിൽ എത്തുമുമ്പ് എട്ട് വർഷത്തോളം ടെക്സസ് ഇൻസ്ട്രുമെന്റ്സിൽ വിവിധ സാമ്പത്തിക ചുമതലകൾ വഹിച്ച അവർ 1997-ൽ മൈക്രോസോഫ്റ്റിൽ ചേർന്നു. 2006-ൽ കമ്പനിയുടെ സെർവർ ആൻഡ് ടൂൾസ് വിഭാഗത്തിന്റെ ചീഫ് ഫിനാൻഷ്യൽ ഓഫീസറായി നിയമിതയായി. ഈ വിഭാഗത്തിന്റെ സാമ്പത്തിക തന്ത്രങ്ങൾ, ആസൂത്രണം, റിപ്പോർട്ടിങ് എന്നിവയായിരുന്നു പ്രധാന ചുമതലകൾ.

2010-ൽ സിസ്‌കോയിൽ ചേർന്ന ക്രെസ്, ബിസിനസ് ടെക്നോളജി ആൻഡ് ഓപ്പറേഷൻസ് ഫിനാൻസ് വിഭാഗത്തിന്റെ സീനിയർ വൈസ് പ്രസിഡന്റും സിഎഫ്ഒയുമായി പ്രവർത്തിച്ചു. 2013-ലാണ് എൻവിഡിയയിലേക്ക് മാറിയത്.

അരിസോണ സർവകലാശാലയിൽനിന്ന് ഫിനാൻസിൽ ബിരുദവും സതേൺ മെത്തഡിസ്റ്റ് സർവകലാശാലയിൽനിന്ന് എംബിഎയും നേടിയിട്ടുണ്ട്. ഫോർബ്സിന്റെ 2026-ലെ അമേരിക്കയിൽ സ്വയം സാമ്പത്തികമുന്നേറ്റമുണ്ടാക്കിയ ഏറ്റവും സമ്പന്നരായ വനിതകളുടെ പട്ടികയിൽ 32-ാം സ്ഥാനത്തുള്ള വ്യക്തികൂടിയാണ് ക്രെസ്. എൻവിഡിയയിലെ അവരുടെ ഓഹരികളുടെ മൂല്യം ബുധനാഴ്ചത്തെ വിപണി അവസാനിക്കുമ്പോൾ ഏകദേശം 750 ദശലക്ഷം ഡോളറായിരുന്നു. കഴിഞ്ഞമാസം ഓഹരിയുടെ മൂല്യം ഏറ്റവും ഉയർന്ന നിലയിലെത്തിയപ്പോൾ ഇത് ഒരു ബില്യൺ ഡോളറിലധികമായിരുന്നു.