ജാംനഗർ റിഫൈനറിയെ ലോകത്തിലെ ആദ്യത്തെ സമ്പൂർണ ഓട്ടോണോമസ് റിഫൈനറിയാക്കി മാറ്റാൻ എഐ ഉപയോഗിക്കുമെന്ന് റിലയൻസ്. ഹോർമുസ് കടലിടുക്കിലെ പ്രതിസന്ധികൾക്കിടയിലും ഓയിൽ-ടു-കെമിക്കൽസ് വരുമാനത്തിലും പ്രവർത്തനലാഭത്തിലും വളർച്ച കൈവരിച്ചതിനൊപ്പം പുതിയ പദ്ധതികളും മുന്നോട്ട് കൊണ്ടുപോകുന്നതിന്റെ ഭാഗമായാണിത്.

To advertise here,

നിർമിതബുദ്ധി (എഐ)യും ഡിജിറ്റൽ സാങ്കേതികവിദ്യകളും പ്രയോജനപ്പെടുത്തി റിലയൻസ് ഇൻഡസ്ട്രീസ് തങ്ങളുടെ ഊർജ്ജ ബിസിനസിനെ നവീകരിക്കാൻ ഒരുങ്ങുകയാണ്. ജാംനഗറിനെ ലോകത്തിലെ ആദ്യത്തെ എൻഡ്-ടു-എൻഡ് സ്വയംഭരണ റിഫൈനറിയാക്കി മാറ്റാൻ പദ്ധതിയിടുന്നതായി കമ്പനി എക്‌സിക്യൂട്ടീവ് ഡയറക്ടർ അനന്ത് അംബാനിയാണ് അറിയിച്ചത്. ജൂൺ 19-ന് നടന്ന കമ്പനിയുടെ 49-ാമത് വാർഷിക പൊതുയോഗത്തിലാണ് (AGM) അദ്ദേഹം ഇക്കാര്യം വ്യക്തമാക്കിയത്.

ആഗോള ഊർജ്ജ വിപണിയിലെ അസ്ഥിരതകൾക്കിടയിലും കാര്യക്ഷമത വർധിപ്പിക്കുന്നതിനും പ്രതിരോധശേഷി ശക്തിപ്പെടുത്തുന്നതിനും ഓയിൽ-ടു-കെമിക്കൽസ് (O2C) മേഖലയിൽ ലീഡർഷിപ്പ് നിലനിർത്തുന്നതിനുമുള്ള റിലയൻസിന്റെ വിപുലമായ തന്ത്രത്തിന്റെ ഭാഗമാണ് ഈ നീക്കം.

റിഫൈനിങ് പ്രവർത്തനങ്ങൾക്ക് കരുത്തേകി എഐ

വിവിധ പ്രവർത്തനങ്ങളിലുടനീളം റിലയൻസ് ഡിജിറ്റൽ ടൂളുകൾ വിന്യസിച്ചിട്ടുണ്ടെന്ന് അനന്ത് അംബാനി പറഞ്ഞു. ഏറ്റവും കാര്യക്ഷമമായ ക്രൂഡ് ഓയിൽ മിശ്രിതങ്ങൾ കണ്ടെത്തുന്നതിന് സഹായിക്കുന്ന എഐ അധിഷ്ഠിത പ്ലാറ്റ്ഫോം, വിതരണ ശൃംഖലകളും കപ്പൽ ചാർട്ടറിങ്ങും കാര്യക്ഷമമാക്കുന്ന ഡിജിറ്റൽ ലോജിസ്റ്റിക്‌സ് സംവിധാനം, ഉപഭോക്തൃ ഇടപാടുകൾ മെച്ചപ്പെടുത്തുന്ന സ്മാർട്ട് കോൺട്രാക്ട് എക്‌സിക്യൂഷൻ ടൂളുകൾ എന്നിവ ഇതിൽ ഉൾപ്പെടുന്നു.