പാരിസ്: ഫ്രഞ്ച് ഓപ്പണ് പുരുഷ സിംഗിള്സ് കിരീടത്തില് മുത്തമിട്ട് സ്പെയിന് താരം കാര്ലോസ് അല്ക്കരാസ്. ജര്മന് താരം അലക്സാണ്ടര് സ്വരേവിനെ പരാജയപ്പെടുത്തിയാണ് അല്ക്കരാസ് കരിയറിലെ ആദ്യ ഫ്രഞ്ച് ഓപ്പണ് കിരീടം നേടിയത്. അഞ്ച് സെറ്റ് നീണ്ട പോരാട്ടത്തിനൊടുക്കമാണ് താരത്തിന്റെ ജയം. സ്കോര്: 6-3, 2-6, 5-7, 6-1, 6-2
മത്സരത്തിന്റെ തുടക്കത്തില് തകര്പ്പന് പ്രകടനമാണ് അല്ക്കരാസ് പുറത്തെടുത്തത്. ആദ്യ സെറ്റ് സ്വരേവിനെ നിഷ്പ്രഭനാക്കിയ അല്ക്കരാസ് 6-3 ന് സെറ്റ് സ്വന്തമാക്കി. എന്നാല് രണ്ടാം സെറ്റ് സ്വരേവ് ശക്തമായി തിരിച്ചുവന്നു. ആദ്യ സെറ്റിന്റെ മറുപടിയെന്നോണം 6-2 ന് രണ്ടാം സെറ്റ് സ്വന്തമാക്കി. ഫൈനല് പോരാട്ടത്തിന്റെ ആവേശം മുഴുവന് നിറഞ്ഞതായിരുന്നു മൂന്നാം സെറ്റ്. ഇരുതാരങ്ങളും വിട്ടുകൊടുക്കാന് മനസില്ലാതെ റാക്കറ്റേന്തിയപ്പോള് മത്സരം ആവേശക്കൊടുമുടിയിലായി.
മൂന്നാം സെറ്റില് ആദ്യം മുന്നിട്ടുനിന്നത് അല്ക്കരാസായിരുന്നു. സ്വരേവിന്റെ സര്വ് ഭേദിച്ച് മുന്നേറിയ സ്പെയിന് യുവതാരം 5-2 ന് മുന്നിലെത്തി. സെറ്റ് അനായാസം നേടുമെന്ന് തോന്നിച്ചു. എന്നാല് റോളണ്ട് ഗാരോസ് സാക്ഷിയായത് സ്വരേവിന്റെ സ്വപ്നസമാനമായ തിരിച്ചുവരവിനാണ്. പിഴവുകളൊന്നും വരുത്താതെ ശ്രദ്ധയോടെ റാക്കറ്റേന്തിയ താരം അല്ക്കരാസിന്റെ സര്വുകളോരോന്നും ബ്രേക്ക് ചെയ്തു. പിന്നീട് ഒരൊറ്റ ഗെയിം പോയന്റും അല്ക്കരാസിന് നേടാനായില്ല. 5-2-ല് നിന്ന് 7-5 ലേക്ക് കുതിച്ചെത്തിയ സ്വരേവ് സെറ്റ് സ്വന്തമാക്കി.
എന്നാല് ഏകപക്ഷീയമായിരുന്നു നാലാം സെറ്റ്. അല്ക്കരാസിന് മുന്നില് സ്വരേവിന് കാര്യമായി ഒന്നും ചെയ്യാനായില്ല. 6-1 നാണ് അല്ക്കരാസ് സെറ്റ് നേടിയത്. അതോടെ മത്സരം അഞ്ചാം സെറ്റിലേക്ക് നീണ്ടു. അഞ്ചാം സെറ്റിലും മികവ് തുടര്ന്ന അല്ക്കരാസ് 6-2 ന് സെറ്റും മത്സരവും സ്വന്തമാക്കി. താരത്തിന്റെ മൂന്നാം ഗ്രാന്ഡ്സ്ലാം കിരീടമാണിത്. 2022-ല് യുഎസ് ഓപ്പണും 2023-ല് വിംബിള്ഡണും നേടിയിട്ടുണ്ട്.
Content Highlights: Carlos Alcaraz vs Alexander Zverev French Open 2024 mens singles final
Published: 09 Jun 2024, 11:15 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented