നഗോയ: ജപ്പാനിലെ ഐച്ചി-നഗോയയിൽ നടക്കുന്ന ഏഷ്യൻ ഗെയിംസിൽ മിക്‌സഡ് മാർഷ്യൽ ആർട്‌സിൽ (എംഎംഎ) ഇന്ത്യയ്ക്കായി മെഡൽ ഉറപ്പാക്കി സുചിക തരിയാൽ. വനിതകളുടെ ട്രഡിഷണൽ 60 കിലോഗ്രാം വിഭാഗത്തിൽ സെമിഫൈനലിൽ പ്രവേശിച്ചതോടെയാണ് 36-കാരിയായ സുചിക ഇന്ത്യയ്ക്കായി മെഡൽ ഉറപ്പാക്കിയത്. ഏഷ്യൻ ഗെയിംസിന്റെ ചരിത്രത്തിൽ ആദ്യമായാണ് എംഎംഎ ഒരു മത്സര ഇനമായി ഉൾപ്പെടുത്തുന്നത്.

To advertise here,

ക്വാർട്ടർ ഫൈനൽ പോരാട്ടത്തിൽ യൂറേഷ്യൻ മേഖലയിൽ 92-ാം റാങ്കുകാരിയായ മംഗോളിയയുടെ അൽതാൻചൈമെഗ് ബൈഗൽമാക്കെതിരെ 2-0 എന്ന സ്‌കോറിനാണ് സുചിക വിജയം സ്വന്തമാക്കിയത്. മത്സരത്തിലുടനീളം കൃത്യമായ മേധാവിത്വം പുലർത്തിയ താരം തിങ്കളാഴ്ച നടക്കുന്ന സെമിഫൈനലിൽ പോരാട്ടത്തിനിറങ്ങും.

സെമിയിൽ പരാജയപ്പെട്ടാലും ഇരു താരങ്ങൾക്കും വെങ്കല മെഡൽ ലഭിക്കുമെന്നതിനാൽ സുചികയുടെ ഈ ജയം ഇന്ത്യയുടെ മെഡൽ പട്ടികയിൽ ഒരു മെഡൽ കൂടി ഉറപ്പിച്ചു.

വിവിധ പോരാട്ട കായിക ഇനങ്ങളിൽ നീണ്ട പരിചയസമ്പത്തുള്ള താരമാണ് സുചിക തരിയാൽ. 2022-ലെ കോമൺവെൽത്ത് ഗെയിംസിൽ ജൂഡോയിലും 2023-ലെ ഏഷ്യൻ ഗെയിംസിൽ കുരാഷിലും ഇന്ത്യയെ പ്രതിനിധീകരിച്ച സുചിക, 2024-ൽ ജിയു-ജിത്സുവിൽ ലോക ചാമ്പ്യൻ പട്ടവും സ്വന്തമാക്കിയിരുന്നു. കായികരംഗത്ത് നിന്ന് താത്കാലികമായി വിട്ടുനിന്നശേഷം സുഹൃത്തുക്കളുടെ പ്രോത്സാഹനത്തെ തുടർന്നാണ് താരം എംഎംഎയിലേക്ക് ചുവടുവെക്കുന്നത്.