നഗോയ: ഐച്ചി-നഗോയയിൽ നടക്കുന്ന 2026 ഏഷ്യൻ ഗെയിംസിന്റെ 13-ാം ദിനത്തിൽ മികച്ച പ്രകടനവുമായി ഇന്ത്യ. അമ്പെയ്ത്തിലും ബോക്സിങ്ങിലും മികച്ച പ്രകടനം പുറത്തെടുത്ത ഇന്ത്യ തങ്ങളുടെ മെഡൽ വേട്ട തുടരുകയാണ്.
വനിതകളുടെ 75 കിലോഗ്രാം ബോക്സിങ് ഫൈനലിൽ ചൈനയുടെ ബാവോ സിയെയെ നേരിട്ട ഒളിമ്പിക് മെഡൽ ജേതാവ് ലവ്ലിന ബോർഗോഹെയ്ൻ സ്വർണ മെഡൽ സ്വന്തമാക്കി. ഇതിഹാസതാരം മേരി കോമിന് ശേഷം ഏഷ്യൻ ഗെയിംസ് ചാമ്പ്യനാകുന്ന രണ്ടാമത്തെ മാത്രം വനിതാ താരമാണ് ലവ്ലിന. വനിതകളുടെ 65 കിലോഗ്രാം വിഭാഗത്തിൽ പർവീൺ ഹൂഡയും സ്വർണം നേടി.
അമ്പെയ്ത്തിൽ പുരുഷൻമാരുടെ റിക്കർവ് ടീം ഇനത്തിൽ ഇന്ത്യയ്ക്ക് വെള്ളി. ധീരജ് ബൊമ്മദേവര, യഷ്ദീപ് ഭോഗെ, നീരജ് ചൗഹാൻ എന്നിവരടങ്ങിയ ടീമാണ് ഇന്ത്യയ്ക്കായി മെഡൽ നേടിയത്. ഒകാസാക്കി ചുഓ സോഗോ പാർക്ക് മൾട്ടിപർപ്പസ് സ്ക്വയറിൽ നടന്ന കലാശപ്പോരാട്ടത്തിൽ ദക്ഷിണ കൊറിയയോട് 1-5 എന്ന സ്കോറിന് ഇന്ത്യൻ സംഘം പരാജയപ്പെടുകയായിരുന്നു. സെമിഫൈനലിൽ ഇറാനെ 6-0 ന് തോൽപ്പിച്ചാണ് ഇന്ത്യ ഫൈനലിൽ കടന്നത്.
അതേസമയം ഈ ഏഷ്യൻ ഗെയിംസിൽ ഇന്ത്യൻ അമ്പെയ്ത്ത് സംഘം മികച്ച പ്രകടനമാണ് കാഴ്ചവെക്കുന്നത്. പുരുഷ ടീമിന്റെ വെള്ളി മെഡൽ നേട്ടത്തിന് മുൻപ്, ഇന്ത്യൻ വനിതാ റിക്കർവ് ടീം ദക്ഷിണ കൊറിയയെ 5-3 ന് പരാജയപ്പെടുത്തി ചരിത്രത്തിലാദ്യമായി സ്വർണ മെഡൽ നേടിയിരുന്നു. കൂടാതെ മിക്സഡ് ടീം വെള്ളി മെഡലും, വനിതാ കോമ്പൗണ്ട് ടീം ചൈനയെ കീഴടക്കി സ്വർണ മെഡലും കരസ്ഥമാക്കിയിട്ടുണ്ട്.
അമ്പെയ്ത്തിൽ മികച്ച പ്രകടനം തുടരുന്ന ഇന്ത്യ, റിക്കർവ് മിക്സഡ് ടീം ഇനത്തിൽ വെള്ളി നേടി. കുങ്കും മൊഹദ് - ധീരജ് ബൊമ്മദേവര സഖ്യമാണ് ഇന്ത്യയ്ക്കായി മെഡൽ സ്വന്തമാക്കിയത്.
Content Highlights: India won its first-ever historic gold medal in women's recurve archery at the Asian Games., The Indian team defeated South Korea 5-3 in the thrilling final., The winning team comprises Ankita Bhakat, Keerthi, and Kunkum Mohad.
Published: 02 Oct 2026, 10:35 am IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented