ലണ്ടന്‍: ഇംഗ്ലീഷ് പ്രീമിയര്‍ ലീഗിലെ കിരീട പോരാട്ടം വീണ്ടും ആവേശകരമാക്കി വെസ്റ്റ് ഹാം. കിരീടപ്പോരില്‍ മുന്നിലുള്ള മാഞ്ചെസ്റ്റര്‍ സിറ്റിയെ വെസ്റ്റ് ഹാം സ്വന്തം മൈതാനത്ത് സമനിലയില്‍ തളച്ചു. രണ്ടു ഗോളിന് മുന്നിട്ടുനിന്ന വെസ്റ്റ് ഹാമിനെതിരേ സിറ്റി രണ്ടു ഗോള്‍ തിരിച്ചടിച്ച് സമനില പിടിക്കുകയായിരുന്നു. അവസാന നിമിഷം ജയം നേടാന്‍ സിറ്റിക്ക് അവസരം ലഭിച്ചെങ്കിലും പെനാല്‍റ്റി നഷ്ടപ്പെടുത്തിയ മെഹ്‌രസിന്റെ പിഴവ് സിറ്റിക്ക് തിരിച്ചടിയാകുകയായിരുന്നു. 

To advertise here,

കളിതുടങ്ങി 24-ാം മിനിറ്റില്‍ തന്നെ വെസ്റ്റ് ഹാം ലീഡെടുത്തു. പാബ്ലോ ഫോര്‍നല്‍സ് നല്‍കിയ പാസില്‍ നിന്ന് ജറോഡ് ബോവനാണ് വെസ്റ്റ് ഹാമിനായി വലകുലുക്കിയത്. പിന്നാലെ ആദ്യ പകുതി അവസാനിക്കുന്നതിന് തൊട്ടുമുമ്പ് ബോവന്‍ തന്നെ വെസ്റ്റ് ഹാമിന്റെ ലീഡ് രണ്ടാക്കി ഉയര്‍ത്തി. 

എന്നാല്‍ 49-ാം മിനിറ്റില്‍ ജാക്ക് ഗ്രീലിഷിലൂടെ സിറ്റി ഒരു ഗോള്‍ തിരിച്ചടിച്ചു. 69-ാം മിനിറ്റില്‍ വെസ്റ്റ് ഹാം ഡിഫന്‍ഡര്‍ വ്‌ളാഡിമിര്‍ കൗഫാല്‍ സിറ്റിയുടെ രക്ഷകനായി. മെഹ്‌രസെടുത്ത ഫ്രീകിക്ക് തട്ടിയകറ്റാനുള്ള ശ്രമത്തിനിടെ കൗഫാലിന്റെ തലയില്‍ തട്ടിയ പന്ത് സ്വന്തം പോസ്റ്റില്‍. ഇതോടെ 2-2ന് സിറ്റി ഒപ്പമെത്തി. 

പിന്നാലെ സിറ്റി വിജയ ഗോളിനായുള്ള ശ്രമമാരംഭിച്ചു. 83-ാം മിനിറ്റില്‍ ഗബ്രിയേല്‍ ജെസ്യുസിനെ ഡാവ്‌സണ്‍ ബോക്‌സില്‍ വീഴ്ത്തിയതിന് സിറ്റി താരങ്ങള്‍ പെനാല്‍റ്റിക്കായി അപ്പീല്‍ ചെയ്തു. വാര്‍ പരിശോധിച്ച റഫറി സിറ്റിക്ക് അനുകൂലമായി പെനാല്‍റ്റി അനുവദിക്കുകയും ചെയ്തു. പക്ഷേ റിയാദ് മഹ്‌രസെടുത്ത കിക്ക് വെസ്റ്റ് ഹാം ഗോള്‍കീപ്പര്‍ ഫാബിയാന്‍സ്‌കി തട്ടിയകറ്റി. ഇതോടെ മത്സരം സമനിലയില്‍ അവസാനിക്കുകയായിരുന്നു. 

ലീഗില്‍ ഒരു മത്സരം ശേഷിക്കേ സിറ്റി 90 പോയന്റുമായി ഒന്നാം സ്ഥാനത്ത് തന്നെ തുടരുകയാണ്. രണ്ടാമതുള്ള ലിവര്‍പൂളിന് രണ്ടു മത്സരങ്ങള്‍ ശേഷിക്കേ 86 പോയന്റുണ്ട്. ഇതോടെ ആസ്റ്റണ്‍ വില്ലയ്‌ക്കെതിരായ അവസാന മത്സരം സിറ്റിക്ക് നിര്‍ണായകമായി.