മുംബൈ: സംഗീതസംവിധായകന്‍ പലാഷ് മുഛലുമായുള്ള വിവാഹം റദ്ദാക്കിയതായി പ്രഖ്യാപിച്ചതിനു പിന്നാലെ ക്രിക്കറ്റ് പരിശീലനത്തിലേക്ക് മടങ്ങി ഇന്ത്യന്‍ ക്രിക്കറ്റ് താരം സ്മൃതി മന്ദാന. ഒരു സ്വകാര്യ ഗ്രൗണ്ടില്‍ സ്മൃതി ബാറ്റിങ് പരിശീലനത്തില്‍ ഏര്‍പ്പെടുന്ന ചിത്രം താരത്തിന്റെ സഹോദരന്‍ ശ്രാവണ്‍ മന്ദാന ഇന്‍സ്റ്റാഗ്രാം സ്‌റ്റോറിയായി പങ്കുവെച്ചിട്ടുണ്ട്. ഈ ചിത്രം പെട്ടെന്നു തന്നെ സോഷ്യല്‍ മീഡിയയില്‍ വൈറലായി.
ജീവിതത്തിലെ ദുഷ്‌കരമായ സമയത്ത് കളിക്കളത്തിലേക്ക് തിരിച്ചെത്തിയതില്‍ നിരവധി പേരാണ് സ്മൃതിക്ക് അഭിനന്ദനമറിയിച്ച് രംഗത്തെത്തുന്നത്. സ്മൃതിയുടെ സമര്‍പ്പണത്തെ പലരും പ്രശംസിക്കുന്നുമുണ്ട്.
അടുത്തിടെ ഇന്ത്യയുടെ ലോകകപ്പ് വിജയത്തില്‍ അഭിവാജ്യ ഘടകമായിരുന്നു സ്മൃതി. ഡിസംബര്‍ 21-ന് ശ്രീലങ്കയ്‌ക്കെതിരായ അഞ്ചു മത്സരങ്ങളടങ്ങുന്ന ടി20 പരമ്പരയാണ് ഇനി സ്മൃതിക്ക് മുന്നിലുള്ളത്. ഇതിന് മുന്നോടിയായാണ് താരം പരിശീലനം ആരംഭിച്ചിരിക്കുന്നത്.
കഴിഞ്ഞ ദിവസമാണ് പലാഷ് മുഛലുമായുള്ള വിവാഹം റദ്ദാക്കിയതായി സ്മൃതി ഇന്‍സ്റ്റാഗ്രാം പോസ്റ്റിലൂടെ അറിയിച്ചത്. നവംബര്‍ 23-നായിരുന്നു സ്മൃതി-പലാഷ് വിവാഹം നടക്കേണ്ടിയിരുന്നത്. അതിനിടെ സ്മൃതിയുടെ പിതാവ് ശ്രീനിവാസ് മന്ദാനയ്ക്ക് ഹൃദയാഘാതമുണ്ടായതിനെ തുടര്‍ന്ന് പലാഷ് മുഛലുമായുള്ള വിവാഹം മാറ്റിവെച്ചതായി താരത്തിന്റെ മാനേജര്‍ അറിയിക്കുകയായിരുന്നു. ജന്മനാടായ സാംഗ്ലിയിലെ വിവാഹവേദിയിലേക്ക് അടിയന്തരമായി ആംബുലന്‍സ് എത്തിയതും അന്ന് വാര്‍ത്തയായിരുന്നു. പിന്നാലെ ആരോഗ്യപ്രശ്നങ്ങളെ തുടര്‍ന്ന് പലാഷ് മുഛലിനേയും ആശുപത്രിയില്‍ പ്രവേശിപ്പിച്ചതായി റിപ്പോര്‍ട്ടുകള്‍ വന്നു. വൈറല്‍ പനിയും അസിഡിറ്റിയും കാരണം മുംബൈയിലെ ആശുപത്രിയിലേക്ക് പലാഷിനെ മാറ്റിയെന്നാണ് പുറത്തുവന്ന വാര്‍ത്ത.
പിന്നാലെ വിവാഹവുമായി ബന്ധപ്പെട്ട എല്ലാ പോസ്റ്റുകളും സോഷ്യല്‍ മീഡിയയില്‍ നിന്ന് സ്മൃതി നീക്കം ചെയ്തതോടെ ആരാധകരില്‍ സംശയങ്ങള്‍ രൂപപ്പെട്ടു. വിവാഹം മാറ്റിവെച്ചതല്ല, മറിച്ച് റദ്ദാക്കിയതാണ് എന്ന് അന്ന് തന്നെ പലരും പറഞ്ഞിരുന്നു. പലാഷ് മുഛലിന് മറ്റൊരു യുവതിയുമായുള്ള ബന്ധം കൈയോടെ പിടിച്ചതിനെ തുടര്‍ന്നാണ് സ്മൃതിയും കുടുംബവും വിവാഹം റദ്ദാക്കാന്‍ തീരുമാനിച്ചതെന്നായിരുന്നു പ്രചാരണം. ഇതിന് ആധാരമായതാകട്ടെ പുറത്തുവന്ന ചില ചാറ്റുകളുടെ സ്‌ക്രീന്‍ ഷോട്ടുകളും.
ഒടുവില്‍ ഇത്തരം അഭ്യൂഹങ്ങള്‍ക്കും കിംവദന്തികള്‍ക്കുമെല്ലാം വിരാമമിട്ടുകൊണ്ടാണ് ഞായറാഴ്ച സ്മൃതി മന്ദാന വിവാഹം വേണ്ടെന്നുവെച്ചതായി അറിയിച്ചത്. പിന്നാലെ സ്മൃതിയുമായുള്ള ബന്ധത്തില്‍ നിന്ന് പിന്മാറുകയാണെന്ന് പലാഷും അറിയിച്ചതോടെ വിവാഹ വിവാദത്തിന് അന്ത്യമായി.
Content Highlights: Indian cricketer Smriti Mandhana resumes training after calling off her wedding. See her net practice photos and learn about her dedication.
Published: 08 Dec 2025, 06:38 pm IST
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented